نیشنل ٹیرف کمیشن دی فعال تے شفاف کارکردگی ملکی صنعت، تجارت تے سرمایہ کاری دے ودھارے کیتے ناگزیر اے، وزیراعظم

اسلام آباد۔ 4 جون (اے پی پی)وزیراعظم محمد شہباز شریف برآمدات تے مبنی ترقیاتی اہداف دے حصول کوں اولین ترجیح قرار ݙیندے آکھیا اے جو نیشنل ٹیرف کمیشن دی فعال تے شفاف کارکردگی ملکی صنعت، تجارت تے سرمایہ کاری دے ودھارے کیتے ناگزیر اے۔ وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف دی زیرِصدارت معیشت دی مجموعی ترقی تے ایں حوالے نال نیشنل ٹیرف پالیسی 2025۔30 دے نفاذ تے اہم جائزہ اجلاس تھیا۔ اجلاس اچ نائب وزیراعظم تے وزیرِخارجہ اسحاق ڈار، وفاقی وزیرِ قانون و انصاف اعظم نذیر تارڑ، وفاقی وزیرِموسمیاتی تبدیلی مصدق ملک، وفاقی وزیرِاقتصادی امور احد خان چیمہ، وفاقی وزیرِ خزانہ و محصولات محمد اورنگزیب، وزیرِ پٹرولیم علی پرویز ملک، وزیرِ مملکت خزانہ و ریلوے بلال اظہر کیانی، وزیراعظم دے معاونِ خصوصی ہارون اختر تے متعلقہ اعلیٰ سرکاری افسراں شرکت کیتی۔اجلاس اچ نیشنل ٹیرف پالیسی 2025۔30 دے نفاذ دے حوالے نال بریفنگ ݙتی ڳئی۔ اجلاس کوں ݙسایا ڳیا جو نیشنل ٹیرف پالیسی 2025۔30 کے تحت مختلف شعبیں کیتے ٹیرف اچ مرحلہ وار کمی کیتی ویسی جیں دا مقصد برآمدات تے مبنی اقتصادی ترقی دے اہداف دا حصول اے، لاجسٹک دے شعبے دی ترقی تے ودھارے کیتے ریفرز کنٹینرز تے سیمی ٹریلرز تے عائد ڈیوٹیز دا خاتمہ کیتا ویسی، تعمیراتی شعبے دے ودھارے دے حوالے نال سپیشلائزڈ وہیکلز تے مشینری تے کسٹمز ڈیوٹیز گھٹ کیتیاں ویندیان پئن، فارماسیوٹیکل سیکٹر کوں سہولتاں ݙیوݨ کیتے خام مال خصوصاً کینسر دی دوائیں اچ استعمال تھیوݨ آلے خام مال تے کسٹم ڈیوٹی ختم کیتیاں ویسن۔ وزیراعظم آکھیا جو نیشنل ٹیرف کمیشن دی فعال تے شفاف کارکردگی ملکی صنعت، تجارت تے سرمایہ کاری دے ودھارے کیتے ناگزیر اے، سرمایہ کاراں تے صنعت کاراں دی سہولت کیتے نیشنل ٹیرف کمیشن اپݨا فعال کردار ادا کرے۔ وزیراعظم آکھیا جو دنیا اچ رائج بہترین طریقیں تے جدید ٹیکنالوجی بشمول انفارمیشن ٹیکنالوجی تے مصنوعی ذہانت دا استعمال کریندے کمیشن اچ جدت گھن آئی ونڄے