پاکستان ایتھوپیا دے نال ثقافتی تے سیاحتی تعلقات مزید ودھاوݨ چاہندے ، وفاقی وزیر قومی ورثہ و ثقافت اورنگزیب خان کھچی

اسلام آباد۔ 4 جون (اے پی پی) وفاقی وزیرقومی ورثہ و ثقافت اورنگزیب خان کھچی آکھیے جو پاکستان ایتھوپیا دے نال ثقافتی تے سیاحتی تعلقات کوں مزید ودھاوݨ چاہندے تے وزیراعظم پاکستان دی ہدایات موجب ݙوہیں ملکاں وچال عوامی سطح تے رابطے کوں تکڑابݨاوݨ کیتے ہر ممکن تعاون ݙتا ویسی۔ اے ڳالھ انھاں وزارتِ قومی ورثہ و ثقافت، اسلام آباد اچ ایتھوپیا دے سفیر پاکستان ڈاکٹر عمر حسین اوبا کوں ملاقات اچ آکھی۔ وفاقی وزیر آکھیا جو پاکستان ایتھوپیا دے نال اپݨے تعلقات کوں اہمیت ݙیندے تے ثقافت و ورثے دے شعبے اچ تعاون  ودھاوݨ چاہندے۔ انھاں آکھیا جو ثقافتی سفارتکاری دے ودھارے کیتے وفد دے تبادلیں، ثقافتی گروپس دے دوریں تے مشترکہ ثقافتی تقریبات دا انعقاد ویلھے دی لوڑھ اے۔انھاں تجویز ݙتی جو پاکستان اچ ایتھوپیا دے کلچر ڈیز متعارف کرائے ونڄن جݙاں جو ݙوہیں ملکاں دے ثقافتی وفد دے سانجھے دوریں دا وی اہتمام کیتا ونڄے۔ انھاں آکھیا جو پاکستان پہلے ہی ترکیہ تے تاجکستان سودھے مختلف ملکاں دے نال ثقافتی ہفتے منعقد کرچکئے، تے ایتھوپیا دے ثقافتی وفد کوں وی لوک ورثہ اچ منعقد تھیوݨ آلی تقریبات اچ شرکت دی دعوت ݙتی ویندی اے۔ جتھاں پاکستان دے علاقائی ثقافتی رنگ بھرپور انداز اچ پیش کیتے ویندن۔ ایتھوپیا دے سفیر پاکستان دی مہمان نوازی دی تعریف کریندے اپݨے ملک دے شاندار ثقافتی ورثے، منفرد کیلنڈر سسٹم، روایتی تہواراں تے لسانی و نسلی تنوع تے تفصیلی بریفنگ ݙتی۔ انھاں ایتھوپین ایئرلائنز دی اہمیت تے وی روشنی پاتی تے آکھیا جو اے ایئرلائن پاکستان تے ایتھوپیا دے نال نال افریقہ وچال رابطے مزید تکڑے بݨیندی پئی اے، جیں نال سیاحت تے ثقافتی تبادلے کوں ودھارا ملدا پئے۔ سفیر ݙوہیں ملکاں دیاں وزارتاں وچال ثقافتی تعاون کوں ادارہ جاتی شکل ݙیوݨ کیتے مفاہمت دی یادداشت (MoU) تے دستخط دی تجویز وی پیش کیتی۔ وفاقی وزیر ایں تجویز دا خیرمقدم کریندے مکمل تعاون دا یقین ݙیوائے تے آکھیا جو پاکستان ایتھوپیا دے نال ثقافتی تعلقات کوں ٻیا ودھاوݨ کیتے تیار اے۔ اجلاس اچ سیکرٹری قومی ورثہ و ثقافت ڈویژن اسد رحمن گیلانی وی شرکت کیتی تے آکھیا جو ایتھوپیا دے ثقافتی وفد دے پاکستان دورے توں ݙوہیں ملکاں وچال تعلقات مزید تکڑے تھیسن۔