معروف ادیبہ، صحافی تے پی ایف یو جے دی صدر ڈاکٹر سعدیہ کمال دی کتاب “تریمت کتھا” دی تقریبِ رونمائی

اسلام آباد۔ 4 جون (اے پی پی) اسلام آباد لائبریری ڈیپارٹمنٹ دے زیرِ اہتمام معروف صحافی تے پاکستان فیڈرل یونین آف جرنلسٹس دی صدر ڈاکٹر سعدیہ کمال دی کتاب “تریمت کتھا” دی تقریبِ رونمائی منعقد تھئی جیندے اچ ادبی شخصیات، ماہرینِ تعلیم، صحافیاں، لائبریرینز، طلبہ و طالبات تے کتاب دوست لوکاں وݙی تعداد اچ شرکت کیتی۔ لائبریری ڈیپارٹمنٹ دی طرفوں جاری پریس ریلیز موجب عشرت نسیم تے غلام عباس کتاب تے اپݨے تاثرات تے تنقیدی جائزے پیش کریندے ایں دے مختلف ادبی تے سماجی پہلوؤاں تے روشنی پاتی۔ ایں موقع تے معروف محقق تے نقاد ڈاکٹر واجد تبسم کتاب دا تفصیلی جائزہ پیش کریندے آکھیا جو “تریمت کتھا” تریمتاں کوں درپیش سماجی، معاشی تے ثقافتی مسئلیں دی مؤثر عکاسی کریندی اے تے انھاں دے احساسات، جدوجہد تے تجربیں کوں ٻہوں حساس انداز اچ پیش کریندی اے۔ انھاں آکھیا جو کتاب تریمتاں دے حقوق تے معاشرے اچ انھاں دے مقام دے حوالے نال سوچ وچار دی دعوت ݙیندی اے تے سماجی شعور و مثبت تبدیلی دے ودھارے اچ معاون ثابت تھی سڳدی اے۔مصنفہ ڈاکٹر سعدیہ کمال تقریب توں خطاب اچ کتاب دی تخلیق دے پسِ منظر، موضوعات تے اپݨے ادبی سفر تے روشنی سٹیندے آکھیا جو “تریمت کتھا” معاشرے اچ تریمتاں کوں پیش آندے مسئلے ، انھاں دی جدوجہد، محرومیاں تے کامیابیاں دی داستان اے۔ انھاں امید ظاہر کیتی جو کتاب قارئین کوں تریمتاں دے مسئلیں کوں بہتر انداز اچ سمجھݨ تے انھاں دے حل کیتے مثبت سوچ اپناوݨ اچ مدد ݙیسی۔ تقریب دے چھیکڑ تے ڈائریکٹر جنرل محکمہ لائبریریز اسلام آباد محمد ارشد اپݨے صدارتی خطاب اچ ڈاکٹر سعدیہ کمال کوں کتاب دی اشاعت تے مبارخ ݙیندے انھاں دی ادبی خدمات دی تعریف کیتی ۔ انھاں آکھیا جو عوامی لائبریریاں علم و ادب دے ودھارے، مطالعے دی ثقافت دے استحکام تے فکری مکالمے کوں اڳوں ودھاوݨ اچ اہم کردار ادا کریندیاں پئن۔ انھاں ایں عزم دا اظہار کیتا جو محکمہ لائبریریز مستقبل اچ وی ایجھی ادبی تے علمی سرگرمیاں دے انعقاد دا سلسلہ جاری رکھیسی تاں جو معاشرے اچ مطالعے دے رجحان تے علمی و ادبی شعور کوں ودھارا ݙتا ونڄ سڳے۔ تقریب دے شرکاء مصنفہ تے منتظمین دی کوششاں دی تعریف کریندے امید ظاہر کیتی جو ایجھی ادبی تقریبات معاشرے اچ کتاب دوستی تے مطالعے دی ثقافت دے ودھارے اچ اہم کردار ادا کریندیاں رہسن۔