پاکستان تے تاجکستان وچال معاشی تعاون دا نواں باب، تجارت 20 کروڑ ڈالرتئیں ودھاوݨ دا ہدف

دوشنبے۔ 4 جون (اے پی پی) پاکستان تے تاجکستان ݙوطرفہ تجارت، سرمایہ کاری، توانائی تے علاقائی رابطے دے ودھارے کیتے اہم پیشرفت کریندے آندے ترائے سالاں اچ سانجھا تجارتی حجم 20 کروڑ امریکی ڈالر تئیں ودھاوݨ دے روڈ میپ تے اتفاق کر ڳھدے۔ حکومتِ پاکستان تے جمہوریہ تاجکستان وچال تجارت، اقتصادی تے سائنسی و تکنیکی تعاون متعلق مشترکہ کمیشن (جوائنٹ کمیشن) دا اٹھواں اجلاس تاجکستان دے دارالحکومت دوشنبے اچ منعقد تھیا۔ اجلاس دی مشترکہ صدارت پاکستان دے وفاقی وزیر توانائی (پاور ڈویژن) سردار اویس احمد خان لغاری تے تاجکستان دے وزیرِ توانائی و آبی وسائل جمعہ دلیر شفقیر کیتی۔ اجلاس اچ پاکستان دی طرفوں وزارتِ اقتصادی امور، وزارتِ تجارت، وزارتِ قومی غذائی تحفظ و تحقیق، وزارتِ قومی صحت، وزارتِ صنعت و پیداوار، پاورڈویژن، پٹرولیم ڈویژن، بین الصوبائی رابطہ ڈویژن تے سٹیٹ بینک آف پاکستان دے نمائندیں شرکت کیتی جݙاں جو تاجکستان دے متعلقہ سرکاری اداریں دے حکام وی شریک تھئے۔تاجک شریک چیئرمین پاکستانی وفد دا خیرمقدم کریندے توانائی، تجارت، صنعت، صحت، ٹرانسپورٹ و مواصلات، زراعت، تعلیم، سائنس و ٹیکنالوجی، میڈیا، سیاحت، کھیݙ تے ثقافت سودھے مختلف شعبیں اچ تھیوݨ آلی تکنیکی سطح دی مفید ڳالھ مہاڑ دی تعریف کیتی۔ وفاقی وزیر سردار اویس احمد خان لغاری تاجک حکومت تے عوام دی طرفوں پرتپاک مہمان نوازی تے شکریہ ادا کریندے ݙوہیں ملکاں دے ماہرین وچال تھیوݨ آلی تعمیری ڳالھ مہاڑ دی تعریف کیتی تے مشترکہ کمیشن اچ کیتے ڳئے فیصلیں تے مؤثر عملدرآمد دی لوڑھ تے زور ݙتا۔ پاکستان تجارت، سرمایہ کاری تے علاقائی رابطے دے ودھارے دی اہمیت اجاگر کیتی۔ ݙوہیں ملکاں تجارتی وفد دے تبادلیں، کاروباری اداریں وچال ملاقاتاں (بی 2 بی) تے آن لائن تجارتی رابطے دے ودھارے تے اتفاق کیتا۔ فریقین ٹیرف، ضوابط تے تجارتی موقع متعلق معلومات دے تبادلے دے نال نال آندے ترائے سالاں اچ ݙوطرفہ تجارت دا حجم 20 کروڑ امریکی ڈالر تئیں ودھاوݨ کیتے مشترکہ روڈ میپ تیار کرݨ تے وی اتفاق کیتا۔ݙوہیں ملکاں تاجکستان دی ایکسپورٹ ایجنسی تے ٹریڈ ڈویلپمنٹ اتھارٹی آف پاکستان وچال مفاہمتی یادداشت (ایم او یو) کوں حتمی شکل ݙتے ونڄݨ دا خیرمقدم کیتا۔ ترجیحی تجارتی معاہدے (پی ٹی اے) تے پیشرفت دا جائزہ گھندے ہوئیں ایں دی جلد تکمیل کیتے مذاکرات جاری رکھݨ تے اتفاق کیتا ڳیا۔ ایندے علاوہ حکومتی سطح تے خریداری دے ودھارے کیتے تاجکستان دی ایجنسی برائے سٹیٹ میٹریل ریزروز تے ٹریڈنگ کارپوریشن آف پاکستان دے وچال تعاون تے وی اتفاق تھیا۔ فریقین کاسا-1000 منصوبے دے تحت تھیوݨ آلی پیشرفت دی تعریف کریندے منصوبے دی وقتی تکمیل دی اہمیت تے زور ݙتا۔ پاکستان تے تاجکستان جون 2026ء اچ استنبول اچ تھیوݨ آلے کاسا-1000 جوائنٹ ورکنگ گروپ اجلاس اچ شرکت تے باقی ماندہ تجارتی و عملی امور کوں حتمی شکل ݙیوݨ دے عزم دا اعادہ کیتا۔تاجک وزارتِ توانائی و آبی وسائل پاکستان پٹرولیم لمیٹڈ (پی پی ایل) تے آئل اینڈ گیس ڈویلپمنٹ کمپنی لمیٹڈ (او جی ڈی سی ایل) کیتے تاجکستان دے تیل و گیس شعبے اچ سرمایہ کاری دے موقع تلاش کرݨ اچ دلچسپی ظاہر کیتی۔ تاجک ماہرین کوں پاکستان دے آئل اینڈ گیس ٹریننگ انسٹی ٹیوٹ دے ذریعے تربیتی مواقع ݙیوݨ تے وی اتفاق کیتا ڳیا۔ زرعی شعبے اچ ݙوہیں ملکاں زرعی تجارت ودھاوݨ، موسمی تے زیادہ پیداواری صلاحیت رکھݨ آلی اجناس بارے معلومات دے تبادلے تے کپاہ، کݨک، آلوں تے سبزیاں دی اعلیٰ پیداوار ݙیوݨ آلی قسماں دی آزمائش و منتقلی اچ تعاون تے زور ݙتا۔ زراعت اچ تعاون دے ودھارے کیتے مشترکہ روڈ میپ تیار کرݨ تے نباتاتی و ویٹرنری صحت دے شعبیں اچ تعاون ودھاوݨ تے وی اتفاق کیتا ڳیا۔تعلیم، سائنس تے ٹیکنالوجی دے شعبیں اچ ݙوہیں ملکاں دی جامعات تے تحقیقی اداریں وچال رابطے دے ودھارے تے ڳالھ تھئی۔تاجکستان نے تاجکستان یونیورسٹی آف ٹیکنالوجی تے نیشنل یونیورسٹی آف سائنسز اینڈ ٹیکنالوجی (نسٹ) اسلام آباد وچال انجینئرنگ، آئی ٹی تے آرکیٹیکچر دے شعبیں اچ تعاون دی تجویز پیش کیتی۔ آبی وسائل، پن بجلی، ماحولیات تے زراعت اچ مشترکہ تحقیقی منصوبیں تے سائنسی معلومات و جدید ٹیکنالوجی دے تبادلے تے وی اتفاق کیتا ڳیا۔ ثقافت، سیاحت، نوجواناں دے امور تے کھیڈاں دے شعبیں اچ تعاون دی تجاویز دا خیرمقدم کریندے ݙوہیں وزراء پائیدار سیاحت دے ودھارے تے زور ݙتا۔ اجلاس اچ وفاقی وزیر سردار اویس احمد خان لغاری نے تاجکستان دی مہمان نوازی، تعمیری تعاون تے دوستانہ جذبے دی تعریف کیتی۔ تاجکستان دی طرفوں وی پاکستانی وفد دی مؤثر ہم آہنگی تے ݙوطرفہ تعلقات دے ودھارے کیتے عزم کوں خراجِ تحسین پیش کیتا ڳیا۔دورے دے دوران وفاقی وزیر توانائی سردار اویس احمد خان لغاری تاجکستان دے وزیراعظم قاہر رسول زادہ نال ملاقات کیتی تے پاکستانی قیادت دی نیک تمناواں پڄائیاں۔ وزیراعظم تاجکستان مشترکہ کمیشن دے کامیاب انعقاد تے اطمینان دا اظہار کریندے آکھیا جو ݙوہیں ملکاں دی قیادت دے وژن سانجھے تعلقات کوں اسٹریٹجک شراکت داری دی سطح تئیں پڄا ݙتے۔ وفاقی وزیر کاسا-1000 منصوبے دی بروقت تکمیل کیتے پاکستان دے عزم دا اعادہ کیتا۔ ݙوہیں فریقین پائیدار تجارتی تے رابطہ کاری دے رستیں دی ترقی دی اہمیت تے زور ݙتا۔ وزیراعظم تاجکستان گزریل مہینے دوشنبے اچ منعقدہ اعلیٰ سطحی واٹر فورم اچ پاکستان دی شرکت دی تعریف کیتی ۔ ملاقات اچ ݙوہیں ملکاں وچال براہِ راست پروازاں دے آغاز تے ویزا سہولتاں کوں بہتر بݨاوݨ دی لوڑھ تے وی زور ݙتا ڳیا۔ ایں موقع تے تجویز ݙتی ڳئی جو ݙوطرفہ تعلقات دی ودھدی اہمیت دے پیشِ نظر مشترکہ کمیشن دے اجلاس سال اچ ہک توں ودھ واری منعقد کیتے ونڄن۔ ݙوہیں ملکاں تجارت، زراعت، توانائی، سیاحت تے علاقائی رابطے سودھے مختلف شعبیں اچ تعاون کوں ٻیا وسعت ݙیوݨ تے مشترکہ کمیشن دے ذریعے جاری پیش رفت کوں برقرار رکھݨ دے عزم دا اعادہ کیتا