اسلام آباد۔ 4 جون (اے پی پی) چیف جسٹس سپریم کورٹ آف پاکستان جسٹس یحییٰ آفریدی نال سنگاپور انٹرنیشنل میڈی ایشن سینٹر (ایس آئی ایم سی) دے چیف ایگزیکٹو افسر چوان وی مینگ دی سربراہی اچ ہک وفد ملاقات کیتی۔ اے وفد پاکستان اچ وفاقی جوڈیشل اکیڈمی اسلام آباد دے زیرِ اہتمام ججاں کیتے منعقدہ ایکریڈیٹڈ میڈی ایشن سکلز ورکشاپ تے اسیسمنٹ پروگرام اچ شرکت دے سلسلے اچ پاکستان دے …
چیف جسٹس یحییٰ آفریدی نال سنگاپور انٹرنیشنل میڈی ایشن سینٹر دے وفد دی ملاقات
مزید خبراں
اسلام آباد۔ 4 جون (اے پی پی) چیف جسٹس سپریم کورٹ آف پاکستان جسٹس یحییٰ آفریدی نال سنگاپور انٹرنیشنل میڈی ایشن سینٹر (ایس آئی ایم سی) دے چیف ایگزیکٹو افسر چوان وی مینگ دی سربراہی اچ ہک وفد ملاقات کیتی۔ اے وفد پاکستان اچ وفاقی جوڈیشل اکیڈمی اسلام آباد دے زیرِ اہتمام ججاں کیتے منعقدہ ایکریڈیٹڈ میڈی ایشن سکلز ورکشاپ تے اسیسمنٹ پروگرام اچ شرکت دے سلسلے اچ پاکستان دے دورے تے اے۔ سپریم کورٹ دی طرفوں جاری پریس ریلیزموجب ملاقات اچ سپریم کورٹ دے جج تے وفاقی جوڈیشل اکیڈمی دے بورڈ آف گورنرز دے مشیر جسٹس میاں گل حسن اورنگزیب وی موجود ہن۔ملاقات دے دوران پاکستان اچ متبادل تنازعاتی حل (اے ڈی آر) دے نظام دے فروغ تے استحکام متعلق امور تے تفصیلی ڳالھ مہاڑ کیتی ڳئی ۔ چیف جسٹس جھیڑیں دے حل کیتے ثالثی (میڈی ایشن) کوں مؤثر، وقتی تے گھٹ لاڳت طریقہ قرار ݙیندے عدالتی نظام اچ اے ڈی آر دے ودھارے کیتے جاری اصلاحاتی اقدامات تے روشنی پاتی۔ چیف جسٹس ادارہ جاتی استعداد ودھاوݨ، پیشہ ورانہ مہارتاں دے ودھارے تے معاشرے اچ ثالثی دی ثقافت کوں ودھارا ݙیوݨ دی لوڑھ تے زور ݙتا تاں جو عوام کوں مؤثر تے سوکھا انصاف ݙیوݨ یقینی بݨایا ونڄ سڳے۔ ایں موقع تے عدالتی تربیت تے بین الاقوامی تعاون دے ذریعے ثالثی دے نظام کوں مزید مستحکم بݨاوݨ تے مقدمیں دے ٻوجھ اچ کمی دے امکانات تے وی ڳالھ کیتی ڳئی ۔سنگاپور انٹرنیشنل میڈی ایشن سینٹر دے چیف ایگزیکٹو افسر چوان وی مینگ ثالثی دے ودھارے تے متبادل تنازعاتی حل دے ادارہ جاتی نظام دے قیام اچ اپݨے ادارے دے تجربیں دا ݙسایا ۔ انھاں پاکستان اچ ثالثی دے تکڑے فریم ورک دی تشکیل کیتے استعداد کار اچ ودھارے تے بین الاقوامی بہترین طریقیں دے تبادلے اچ تعاون جاری رکھݨ دے عزم دا اظہار کیتا۔ ملاقات اچ ثالثی دی تربیت، ایکریڈیٹیشن، پیشہ ورانہ ترقی تے ادارہ جاتی استحکام دے شعبیں اچ سانجھے تعاون دے امکانات دا وی جائزہ ڳھدا گیا۔ فریقین ایں امید دا اظہار کیتا جو مشترکہ کاوشاں پاکستان اچ ثالثی تے متبادل تنازعاتی حل دے نظام کوں مزید مؤثر بݨاوݨ اچ اہم کردار ادا کریسن۔ ملاقات دے اختتام تے ݙوہیں پاسوں ثالثی کوں جھیڑیں دے حل دے ہک مؤثر، قابلِ رسائی تے عالمی سطح تے تسلیم شدہ طریقہ کار دے طور تے فروغ ݙیوݨ تے پاکستان و سنگاپور دے متعلقہ اداریں وچال تعاون مزید مستحکم کرݨ دے عزم دا اعادہ کیتا ڳیا۔
