سکیورٹی فورسز دی صوبہ خیبر پختونخوا اچ ݙو انڄ انڄ کارروائیاں، بھارتی حمایت یافتہ فتنہ الخوارج نال تعلق رکھݨ آلے چار خوارج ہلاک

راولپنڈی۔ 4 جون (اے پی پی) سکیورٹی فورسز صوبہ خیبر پختونخوا اچ ݙو انڄ انڄ کارروائیاں اچ بھارتی حمایت یافتہ فتنہ الخوارج نال تعلق رکھݨ آلے چار خوارج کوں ہلاک کر ݙتے۔ پاک فوج دے شعبہ تعلقاتِ عامہ (آئی ایس پی آر) توں جاری بیان دے مطابق 3/4 جون دی رات صوبہ خیبر پختونخوا اچ ݙو انڄ انڄ کارروائیاں اچ بھارتی حمایت یافتہ فتنہ الخوارج نال تعلق رکھݨ آلے چار خوارج مارئے گن۔ خوارج دی موجودگی دی اطلاع تے سکیورٹی فورسز دی طرفوں ضلع ڈیرہ اسماعیل خان اچ انٹیلی جنس تے مبنی آپریشن کیتا ڳیا۔ آپریشن دے دوران سکیورٹی فورسز خوارج دے ٹھکاݨیاں کوں مؤثر طریقے نال نشانہ بݨایا تے شدید فائرنگ دے تبادلے دے بعد ݙو خوارج کوں جہنم واصل کر ݙتا گیا جنھاں دا تعلق بھارتی حمایت یافتہ فتنہ الخوارج نال ہا۔سکیورٹی فورسز دی طرفوں ضلع مہمند اچ انٹیلی جنس تے مبنی ہک ٻیا آپریشن کیتا ڳیا۔ مہارت نال بھرپور کارروائی دے نتیجے اچ ݙو مزید خوارج کوں مؤثر طریقے نال بے اثر کیتا ڳیا۔ ہلاک تھیوݨ آلے بھارتی حمایت یافتہ خوارج دے قبضے توں اسلحہ تے گولہ بارود وی برآمد تھئے جیڑھے علاقے اچ متعدد دہشت گردانہ کارروائیاں اچ سرگرم رہیے۔ آئی ایس پی آر آکھیا جو سکیورٹی فورسز تے قانون نافذ کرݨ آلے اداریں دی طرفوں وژن “عزمِ استحکام” دے تحت انسدادِ دہشت گردی دی مہم دے طور تے علاقے اچ پاتے ونڄݨ آلے کہیں بھی ٻئے خارجی کوں ختم کرݨ کیتے سینیٹیشن دی کارروائیاں جاری ہن تے کہیں وی غیر ملکی حمایت یافتہ دہشت گرداں دے خاتمے کیتے اے کارروائیاں پوری رفتار نال جاری رہسن۔