صدر آصف علی زرداری دا عالمی یومِ ماحولیات تے پیغام

اسلام آباد۔ 5 جون (اے پی پی) صدر مملکت آصف علی زرداری آکھیے جو موسمیاتی تبدیلی صرف ہک ماحولیاتی مسئلہ کائنی اے صحتِ عامہ، غذائی تحفظ تے معاشی ترقی کیتے وی ہک وݙا چیلنج اے۔ ایوانِ صدر دے پریس ونگ موجب صدر مملکت اے ڳالھ عالمی یومِ ماحولیات تے اپݨے پیغام اچ آکھی۔ انھاں عالمی یومِ ماحولیات دے موقع تے شہریاں تے عالمی برادری توں اپیل کیتی جو او ماحول دے تحفظ تے موسمیاتی تبدیلی دے ودھدے خطرے دی سنگینی کوں سمجھن۔ صدر آکھیا جو ودھدا درجہ حرارت، شدید موسمی واقعات، پگلھدے گلیشیئرز، پاݨی دی قلت، حیاتیاتی تنوع دا ضیان تے ماحولیاتی انحطاط ہݨ مستقبل دے کائنی موجودہ ویلھے اچ ہی دنیا اچ انسانی زندگیاں تے معیشتاں کوں متاثر کریندے پئن۔ انھاں آکھیا جو ایں سال عالمی یومِ ماحولیات دا مرکزی موضوع “موسمیاتی اقدام” اے۔ اے ایں ڳالھ دی یاد دہانی اے جو اڄ کیتے ڳئے فیصلے آوݨ آلی نسلاں دے معیارِ زندگی دا تعین کریسن۔صدر مملکت آکھیا جو موسمیاتی تبدیلی صرف ہک ماحولیاتی مسئلہ کائنی اے صحتِ عامہ، غذائی تحفظ تے معاشی ترقی کیتے وی ہک وݙا چیلنج اے، پاکستان موسمیاتی تغیر دے اثرات توں ساریں توں ودھ متاثرہ ملکاں اچ شامل اے حالانکہ گرین ہاؤس گیساں دے اخراج اچ ایں دا حصہ ہک فیصد توں وی گھٹ اے۔ انھاں آکھیا جو اساݙے کسان بدلدے موسماں دا سامݨا کریندے پئن، اساݙیاں وستیاں چھل تے شدید گرمی دی زد اچ آندیاں پئن تے اساݙے قدرتی وسائل تے دٻاؤ ودھدا پئے ۔ صدر آصف علی زرداری آکھیا جو گلوبل وارمنگ دے نال نال ایل نینو جیہڑے موسمی مظاہر اِنھاں خطرات کوں ٻیا ودھا سڳدن تے کمزور طبقات و معیشت تے اضافی دٻاؤ پا سڳدن۔ انھاں آکھیا جو تریمتاں ، ٻال تے ٻئے کمزور طبقات اِنھاں چیلنجز دا ساریں توں ودھ ٻوجھ چیندن، عام شہریاں تے ماحولیاتی انحطاط دے براہِ راست اثرات ہوندن، ایں نال صاف پاݨی دی دستیابی متاثر تھی سڳدی اے، زرعی پیداوار گھٹ تھی سڳدی اے، روزگار دے ذرائع متاثر تھی سڳدن تے عوامی خدمات دے اداریں تے ٻیا دٻاؤ پئے سڳدے۔ صدر مملکت آکھیا جو شدید موسمی حالات گھراں، سکولاں، سڑکاں تے صحت دے مراکز کوں ضیان پڄا سڳدن جیں نال عوام دی روزمرہ زندگی اوکھی تھی ویندی اے۔انھاں آکھیا جو اِنھاں چیلنجز نال نبٹݨ کیتے ہر سطح تے عملی اقدامات ضروری ہن جنھاں اچ پاݨی دا دانشمندانہ استعمال، فضلہ گھٹ کرݨ، جنگلاں دا تحفظ، حیاتیاتی تنوع دی حفاظت تے صاف توانائی دے ذرائع کوں ودھارا ݙیوݨ شامل اے۔ انھاں آکھیا جو ماحولیاتی ذمہ واری دے اقدامات کوں اساݙے گھراں، سکولاں، کاروباری اداریں تے سرکاری اداریں اچ عملی طور تے اپناوݨا ہوسی۔ صدر نینگراں ، سول سوسائٹی، تعلیمی اداریں، مذہبی رہنماواں، میڈیا تے نجی شعبے دی حوصلہ افزائی کریندے آکھیا جو او آگاہی کھنڈاوݨ تے عملی حل تلاش کرݨ اچ فعال کردار ادا کرݨ۔ انھاں آکھیا جو اساݙے نوجواناں دی توانائی، جدت تے عزم ہک ماحولیاتی طور تے ذمہ دار مستقبل دی تعمیر اچ اہم کردار ادا کر سڳدن۔ صدر مملکت آکھیا جو پاکستان ماحولیاتی تے موسمیاتی امور تے بین الاقوامی تعاون کیتے پرعزم اے، اساں ماحولیاتی نظام دی بحالی، قابلِ تجدید توانائی، آفات نال نبٹݨ دی تیاری تے موسمیاتی لحاظ نال مضبوط ترقی کیتے کوششاں دی حمایت جاری رکھیسوں۔ صدر مملکت آصف علی زرداری زور ݙتا جو آؤ، اساں ماحول دا تحفظ، قدرتی وسائل دا ذمہ دارانہ استعمال کرݨ تے آوݨ آلی نسلاں کیتے ہک محفوظ پاکستان بݨاوݨ دے عزم دا اعادہ کروں