وزیراعظم شہباز شریف دا عالمی یومِ ماحولیات تے پیغام

اسلام آباد۔ 5 جون (اے پی پی) وزیراعظم محمد شہباز شریف عالمی برادری دے نال ہم آواز تھی تے کرہ ارض دے تحفظ کیتے اپݨے بھرپور عزم دا اعادہ کریندے آکھیے جو پاکستان اِنھاں ملکاں اچ سرِفہرست اے جیڑھے عالمی سطح تے ماحولیاتی مضر اثرات اچ نہایت گھٹ حصہ ہووݨ دے باوجود موسمیاتی تبدیلی توں ساریں توں زیادہ متاثر ہن، پاکستان ماحولیاتی تنزلی دی انسانی تے معاشی قیمت ادا کریندا پئے، انفرادی، حکومتی تے عالمی سطح تے اجتماعی عزم تے تعاون اِنھاں چیلنجز نال نبݨݨ دا واحد حل اے۔ وزیراعظم دفتردے میڈیا ونگ توں عالمی یومِ ماحولیات تے جاری پیغام اچ وزیراعظم آکھیا جو اقوامِ عالم دی مشترکہ کوششاں تے مؤثر سانجھے تعاون نال ہی ماحول دوست مستقبل کوں یقینی بݨایا ونڄ سڳدے، ایں سال دا موضوع “موسمیاتی اقدامات” ایں حقیقت دی مؤثر یاددہانی اے جو ماحولیاتی تحفظ کیتے بین الاقوامی عملی تعاون ناگزیر اے۔ موسمیاتی تبدیلی دی صورت اچ کرہ ارض تے ودھدے ہوئے ماحولیاتی خطرات مسائل دی واضح نشاندہی کریندے پئن، اے عالمی سطح دے اقدامات تے مبنی جامع حکمتِ عملی دے متقاضی ہن۔انھاں آکھیا جو تباہ کن چھل، طویل خشک سالی، زور دی گرمی دی لہر، گلیشیئرز دا پگھلݨ، پاݨی دی قلت تے فضائی آلودگی ایں امر دا ثبوت ہن جو موسمیاتی تبدیلی محض خدشات کائنی ہک تلخ حقیقت اے جیڑھی دنیا اچ لکھاں افراد دی زندگیاں کوں متاثر کریندی پئی اے۔ انھاں آکھیا جو پاکستان اِنھاں ملکاں اچ سرِفہرست اے جیڑھے عالمی سطح تے ماحولیاتی مضر اثرات اچ نہایت گھٹ حصہ ہووݨ دے باوجود موسمیاتی تبدیلی توں ساریں توں زیادہ متاثر ہن، پاکستان ماحولیاتی تنزلی دی انسانی تے معاشی قیمت ادا کریندا پئے۔ انفرادی، حکومتی تے عالمی سطح تے اجتماعی عزم تے تعاون اِنھاں چیلنجز نال نبݨݨ دا واحد حل اے، حکومت قابلِ تجدید توانائی دے ودھارے ،جنگلاں دی بحالی، حیاتیاتی تنوع دے تحفظ، آبی وسائل دے مؤثر انتظام، آلودگی اچ کمی، موسمیاتی موافق زراعت تے ساوی صنعتاں دے ودھارے کیتے پرعزم اے۔ حکومت قدرتی ماحولیاتی نظام دی بحالی کوں ودھارا ݙیوݨ آلی پالیسیز تے کم کریندی پئی اے۔انھاں آکھیا جو اساݙی نوجوان نسل دی صلاحیتاں، توانائی تے اختراعی سوچ ہک ساوا، محفوظ تے موسمیاتی طور تے مضبوط پاکستان دی تشکیل اچ کلیدی کردار ادا کریسی، نوجوان نسل دی علم، ٹیکنالوجی تے موقع دے ذریعے مؤثر ماحولیاتی آگاہی ہی پائیدار و تعمیری معاشرے دی ضمانت اے۔ انھاں آکھیا جو اڄ میں ہر شہری، ادارے، کاروباری شعبے، کسان تے زراعت نال وابستہ لوکاں توں اپیل کرینداں جو او موسمیاتی استحکام تے ماحولیاتی تحفظ دی ذمہ واری کوں قومی فریضہ سمجھن۔ انھاں آکھیا جو عالمی یومِ ماحولیات تے تجدیدِ عہد کروں جو اجتماعی سطح تے ماحول دوست طرزِ زندگی اپنیسوں۔ بالخصوص پاݨی تے توانائی دے وسائل دا تحفظ، شجرکاری، جنگلی حیات دا تحفظ اساݙی قومی ترجیحات ہن۔ وزیراعظم آکھیا جو آؤ مشترکہ عزم دے نال متحد تھی تے ساوا، صحت افزاء، صاف ستھرا، ماحول دوست تے موسمیاتی لحاظ نال مستحکم پاکستان دی تعمیر کروں تاں جو اساݙی آوݨ آلی نسلاں ہک بہتر تے پائیدار مستقبل توں مستفید تھی سڳن