کرہء ارض دے تحفظ تے موسمیاتی بحران دے مقابلے کیتے اجتماعی کوششاں کوں تکڑا بݨاوݨ ویلھے دی لوڑھ اے، سینیٹر محمد اسحاق ڈار

اسلام آباد۔ 5 جون (اے پی پی) نائب وزیراعظم تے وزیرِ خارجہ سینیٹر محمد اسحاق ڈار موسمیاتی بحران دے مقابلے کیتے اجتماعی کوششاں کوں مزید تکڑا بݨاوݨ دی لوڑھ تے زور ݙیندے آکھیے جو پاکستان عالمی برادری دے نال رل تے کرہء ارض دے تحفظ تے موسمیاتی بحران دے مؤثر مقابلے کیتے اجتماعی اقدامات کوں تکڑا بݨاوݨ کیتے پرعزم اے۔ دفترِ خارجہ موجب اِے ڳالھ انہاں عالمی یومِ ماحولیات دے موقع تے اپݨے پیغام اچ آکھی۔ نائب وزیراعظم آکھیا جو پاکستان موسمیاتی تبدیلیاں توں ساریں توں ودھ متاثر تھیوݨ آلے ملکاں اچ شامل اے ایں دے باوجود مسلسل آوݨ آلی چھل ، گلیشیئرز دا تکھے پگھلݨ، خشک سالی، شدید گرمی تے پاݨی دے ودھدے دٻاؤ جیھے چیلنجز دے مقابلے اچ ثابت قدمی تے عزم دا مظاہرہ کریندا پئے۔ انھاں آکھیا جو کرہء ارض دے تحفظ تے موسمیاتی بحران دے مقابلے کیتے اجتماعی کوششاں کوں تکڑا بݨاوݨ ویلھے دی اہم لوڑھ اے۔سینیٹر محمد اسحاق ڈار آکھیا جو موسمیاتی تبدیلی، حیاتیاتی تنوع اچ کمی تے ماحولیاتی تنزلی نال جڑئے ہوئے عالمی مسائل نال نبٹݨ کیتے بین الاقوامی تعاون کوں ٻیا وسعت ݙیوݨ ناگزیر اے، ایں ضمن اچ “مشترکہ مگر مختلف ذمہ واریاں تے متعلقہ صلاحیتاں” دے اصول کوں پیشِ نظر رکھیا ونڄݨا چاہیدے۔ انھاں آکھیا جو قومی سطح تے حکومتِ پاکستان ماحولیاتی تحفظ کوں اپݨی پالیسی ترجیحات دا مرکزی جزو بݨاوݨ کیتے پرعزم اے، ایں ضمن اچ ہک اہم سنگِ میل صاف، صحت مند تے پائیدار ماحول دے حق کوں ہر شہری دا بنیادی آئینی حق تسلیم کرݨا اے۔ نائب وزیراعظم آکھیا جو پاکستان موسمیاتی تبدیلیاں نال ہم آہنگ رہائشی منصوبیں، صاف توانائی دے پاسے تکھے منتقلی تے ماحول دوست و پائیدار تعمیراتی طریقیں دے ودھارے کیتے وی عملی اقدامات کریندا پئے، تاں جو موسمیاتی بحران دی سنگینی ایں امر دی متقاضی اے جو عالمی برادری مشترکہ تے مؤثر اقدامات کوں یقینی بݨاوے۔ انھاں ایں موقع تے آذربائیجان دی حکومت دا عالمی یومِ ماحولیات 2026ء دی میزبانی تے شکریہ ادا کریندے آکھیا جو پاکستان عالمی ماحولیاتی چیلنجز نال نبٹݨ کیتے بین الاقوامی تعاون تے تعمیری مکالمے دے ودھارے اچ آذربائیجان دی قائدانہ کوششاں دی تعریف کریندے۔