ڈریپ کوں آئی سی ایچ اچ مبصر دا درجہ ملݨ ہک تاریخی کامیابی اے، وفاقی وزیرِ صحت مصطفیٰ کمال

اسلام آباد۔ 5 جون (اے پی پی) ڈرگ ریگولیٹری اتھارٹی آف پاکستان (ڈریپ) کوں انٹرنیشنل کونسل فار ہارمونائزیشن (آئی سی ایچ) توں مبصر دا درجہ حاصل تھی ڳیا، اے فیصلہ برازیل دے شہر ریو ڈی جنیرو اچ منعقدہ 2 توں 3 جون کوں آئی سی ایچ اسمبلی اجلاس دے دوران کیتا ڳیا۔ ترجمان وزارتِ صحت موجب وفاقی وزیرِصحت مصطفیٰ کمال ڈریپ کوں ایں اہم سنگِ میل تے مبارخ ݙیندے آکھیے جو ڈریپ کوں آئی سی ایچ اچ مبصر دا درجہ ملݨ ہک تاریخی کامیابی اے، آئی سی ایچ ہک عالمی سطح دا فورم اے۔ مصطفیٰ کمال آکھیا جو دنیا دے وݙے ریگولیٹری ادارے تے صنعت رل تے دوائیں دے معیار، حفاظت کوں یقینی بݨاوݨ کیتے رہنما اصول تیار کریندن، اے پاکستان دے ریگولیٹری نظام کوں عالمی معیار نال ہم آہنگ کرݨ دے پاسے ہک وݙا قدم اے، اے پیشرفت پاکستان دے فارماسیوٹیکل ریگولیٹری نظام کوں عالمی معیار موجب بݨاوݨ اچ وݙا اقدام اے۔ وفاقی وزیر آکھیا جو ڈریپ دا عالمی سطح تے تسلیم کیتا ونڄݨ ہک حوصلہ افزا پیشرفت اے، ایں پیشرفت توں پاکستان دے ریگولیٹری نظام دی صلاحیت تے ڈریپ اچ شفافیت و کارکردگی بہتر ہوسی تے فارماسیوٹیکل نظام تے اعتماد اچ ودھارا تھیسی۔