معیشت کوں تکڑی بنیاداں تے ٹورݨ کیتے جامع اصلاحات دا عمل جاری اے، وزیر خزانہ محمد اورنگزیب

اسلام آباد۔ 5 جون (اے پی پی) وفاقی وزیرِ خزانہ و محصولات سینیٹر محمد اورنگزیب ٹیکس نیٹ اچ توسیع، چھوٹے دکانداراں کیتے فکس ٹیکس سکیم تے ٹیکس نظام اچ شفافیت گھن آوݨ دے حکومتی اقدامات تے روشنی سٹیندے آکھیا جو معیشت کوں تکڑی بنیاداں تے ٹورݨ کیتے جامع اصلاحات دا عمل جاری اے، پاکستان معاشی استحکام توں معاشی ترقی دے پاسے ٹردا پئےتے قومی آمدݨ کوں تکڑا بݨاوݨ ویلھے دی اہم لوڑھ اے، تاجراں تے انجمنِ تاجران دے نال مشاورت دے بعد ہک نویں سکیم متعارف کرائی ویندی پئی اے۔ وزیرمملکت خزانہ بلال اظہر کیانی رلے پریس کانفرنس نال خطاب کریندے وزیرِخزانہ و محصولات سینیٹر محمد اورنگزیب آکھیے جو ملک ایں ویلھے معاشی استحکام توں معاشی ترقی آلے پاسے ودھدا پئے تے ایں سفر اچ قومی آمدݨ کوں تکڑا بݨاوݨ ٻہوں ضروری اے۔ وزیرِ خزانہ آکھیا جو ٹیکس نظام کوں منصفانہ، متوازن تے پائیدار بنیاداں تے اڳوں ودھایا ویندا پئے، وزیراعظم ایں اصلاحاتی عمل دی قیادت کریندے پئن، چھوٹے دکانداراں دے تقریباً 30 توں 40 لکھ لوکاں تے مشتمل طبقے کوں وی ایں نظام اچ سہولت تے مشاورت دے نال شامل کیتا ویندا پئے۔پریس کانفرنس نال خطاب کریندے وزیرِمملکت خزانہ بلال اظہر کیانی آکھیا جو چھوٹے دکانداراں کیتے فکس ٹیکس سکیم مکمل مشاورت دے بعد متعارف کرائی ویندی پئی اے جیندے اچ تاجراں دی تنظیماں تے انجمنِ تاجران دی تجویزاں کوں شامل کیتا ڳئے۔ انھاں ݙسایا جو اے سکیم اِنھاں دکانداراں کیتے ہوسی جنھاں دا سالانہ ٹرن اوور 20 کروڑ روپے یا ایں توں گھٹ اے۔ سکیم دے تحت دکاندار اپݨی فروخت ظاہر کریسن تے ایں تے ہک فیصد فکسڈ ٹیکس لڳسی۔ اے سہولت موجودہ فائلرز کیتے وی دستیاب ہوسی بشرطیکہ انھاں دا سالانہ ٹرن اوور گزریل ترائے سال اچ کہیں بھی ہک سال اچ 20 کروڑ روپے توں ودھ نہ ہووے ۔ جیڑھے دکاندار نہ ایں سکیم اچ شامل ہوسن تے نہ ہی ٹیکس فائل کریسن انھاں تے پہلے مہینے 10 ہزار روپے، ݙوجھے مہینے 25 ہزارروپے تے تریجھے مہینے 50 ہزار روپے ماہانہ جرمانہ لاتا ویسی۔