وفاقی وزیرِداخلہ دی ایس سی او اجلاس دے موقع تے اہم ملاقاتاں، علاقائی سلامتی تے تعاون دے استحکام تے زور

بشکیک۔ 6 جون (اے پی پی) وفاقی وزیرِ داخلہ محسن نقوی روس، تاجکستان، ازبکستان، کرغزستان تے قازقستان دے وزرائے داخلہ دے نال شنگھائی تعاون تنظیم (ایس سی او) دے وزرائے داخلہ دے اجلاس دے موقع تے بشکیک اچ خطے اچ سکیورٹی تعاون، انسدادِ دہشت گردی دی کوششاں تے نقل مکانی دے بہتر انتظام دے حوالے نال اعلیٰ سطحی ملاقاتاں کیتیاں۔ ایں موقع تے شنگھائی تعاون تنظیم دے رکن ملکاں وچال دہشت گردی، منشیات دی سمگلنگ تے غیر قانونی نقل مکانی سودھے مشترکہ سکیورٹی چیلنجز نال نبٹݨ کیتے ودھدے اتفاقِ رائے کوں اجاگر کیتا ڳیا۔ ساریں توں اہم پیشرفت وفاقی وزیر محسن نقوی دی روس دے وزیرِ داخلہ ولادیمیر کولوکولتسیف دے نال ملاقات اچ سامݨے آئی۔ فریقین کئی اہم معاہدیں تے دستخط کیتے جنھاں دا مقصد ݙوہیں ملکاں وچال تعاون کوں تکڑا بݨاوݨ اے۔ معاہدیں اچ غیر قانونی امیگریشن نال نبٹݨ کیتے تعاون ودھاوݨ، کہیں وی ملک اچ غیر قانونی طور تے رہݨ آلے شہریاں دی وطن واپسی دے طریقہ کار کوں بہتر بݨاوݨ تے منشیات دی سمگلنگ و منشیات کھنڈݨ کوں روکݨ کیتے سانجھیاں کوششاں ودھاوݨ تے توجہ ݙتی ڳئی ۔ حکام اِنھاں معاہدیں کوں اسلام آباد تے ماسکو وچال تکڑے قانون نافذ کرݨ آلے تعاون دی تعمیر دی طرف ہک وݙا قدم قرار ݙتے۔تاجکستان دے وزیرِ داخلہ رمضان رحیم زادہ نال ڳالھ کریندے علاقائی سلامتی تے افغانستان دی ابھردی صورتحال تے ڳالھ مہاڑ کیتی ڳئی ۔ ݙوہیں وزراء افغانستان دے اندر دہشت گرداں دے کیمپاں دی موجودگی تے منشیات دی پیداوار تے تشویش دا اظہار کریندے انھاں کوں علاقائی استحکام کیتے سنگین خطرات قرار ݙتا۔ ݙوہیں فریقاں اتفاق کیتا جو اِنھاں چیلنجز دا مقابلہ کرݨ کیتے مربوط علاقائی کارروائی ضروری اے۔ ہک اندازے موجب 25 مختلف دہشت گرد تنظیماں ایں ویلھے افغانستان اچ سرگرم ہن، جیڑھیاں نہ صرف پڑوسی ملکاں بلکہ وسیع خطے کیتے خطرہ ہن۔ ہک انڄ  ملاقات اچ وفاقی وزیرِ داخلہ محسن نقوی ازبکستان دے وزیرِ داخلہ میجر جنرل عزیز تاشپولاتوف نال ملاقات کیتی۔ ایں دوران قانون نافذ کرݨ آلے اداریں وچال تعاون کوں تکڑا بݨاوݨ، مشترکہ تربیتی پروگراماں کوں وسعت ݙیوݨ تے ادارہ جاتی تعاون کوں ودھاوݨ تے توجہ مرکوز کیتی ڳئی۔ محسن نقوی کرغزستان دے وزیرِ داخلہ نیاز بیک اولان اوموکانووچ نال وی ملاقات کیتی، ݙوہیں رہنماواں سانجھی دلچسپی دے شعبیں اچ تعاون ودھاوݨ تے اتفاق کیتا۔ ملاقات دے دوران محسن نقوی کرغزستان کوں اقوامِ متحدہ دی سلامتی کونسل دا غیر مستقل رکن منتخب تھیوݨ تے مبارخ ݙتی تے شنگھائی تعاون تنظیم دے وزرائے داخلہ دے اجلاس دے کامیاب انتظامات تے میزبان ملک دی تعریف کیتی۔ انھاں علاقائی فورم دی میزبانی اچ مہمان نوازی تے تنظیمی کوششاں تے کرغیز حکومت دا شکریہ وی ادا کیتا۔ قازقستان دے وزیرِ داخلہ یرژان سادینوف دے نال اپݨی ملاقات اچ محسن نقوی غیر قانونی امیگریشن دے خلاف تعاون کوں تکڑا بݨاوݨ تے ݙوہیں ملکاں دے قانون نافذ کرݨ آلے اداریں وچال ہم آہنگی بہتر بݨاوݨ دے اقدامات تے ڳالھ کیتی ۔ ݙوہیں وزراء پائیدار تعاون ودھاوݨ تے ابھردے سکیورٹی چیلنجز نال نبٹݨ کیتے اپݨی متعلقہ وزارتاں وچال ہک ورکنگ گروپ قائم کرݨ تے اتفاق کیتا۔ݙوطرفہ ملاقاتوں دا سلسلہ وسطی تے جنوبی ایشیا اچ سکیورٹی پارٹنرشپ کوں تکڑا بݨاوݨ کیتے وسیع تر علاقائی کوششاں کوں ظاہر کریندے دہشت گردی، منشیات دی اسمگلنگ تے غیر قانونی نقل مکانی متعلق خدشات دے نال علاقائی سلامتی دے منظر نامے دی تشکیل جاری اے، ایس سی او دے رکن ملکاں استحکام دے تحفظ تے سرحد پار قانون دے نفاذ کوں ودھاوݨ کیتے مربوط کارروائی تے ادارہ جاتی تعاون دے پاسے تکھےݙیکھدے پئن۔ بشکیک اچ وفاقی وزیرِ داخلہ محسن نقوی دی مصروفیات مشترکہ سلامتی تے سانجھی تشویش دے امور تے علاقائی مذاکرات تے عملی تعاون کوں اڳوں ودھاوݨ اچ پاکستان دے کردار کوں تقویت ݙتی اے۔