عالمی یومِ تحفظِ غذا تے صدرِ مملکت آصف علی زرداری دا پیغام

اسلام آباد۔ 7 جون (اے پی پی) صدرِ مملکت آصف علی زرداری غذائی تحفظ دے معیار دے مؤثر نفاذ کیتے سارے متعلقہ اداریں وچال مسلسل تعاون کوں ناگزیر قرار ݙیندے غذائی تحفظ دے معیارات تے عملدرآمد کوں تکڑا بݨاوݨ دی لوڑھ تے زور ݙتے۔ عالمی یومِ تحفظِ غذا تے اپݨے پیغام اچ صدرِ مملکت آصف علی زرداری آکھیا جو عالمی یومِ تحفظِ غذا تے، او عالمی برادری دے نال رل تے عوامی صحت، غذائی تحفظ تے عمومی ترقی کیتے، محفوظ غذا دی اہمیت کوں اجاگر کریندن۔انھاں آکھیا جو اے عالمی ݙینھ ، اقوامِ متحدہ دی طرفوں 2018ء اچ ایں دے آغاز دے بعد توں، خوراک تے زراعت دی تنظیم (ایف اے او) تے عالمی ادارۂ صحت (ڈبلیو ایچ او) دے اشتراک نال منایا ویندے تاںجو دنیا اچ غذائی تحفظ دے حوالے نال آگاہی تے عملی اقدامات کوں ودھارا ݙتا ونڄ سڳے۔ صدرِ مملکت آکھیا جو ایں سال دا موضوع ’’دٻاؤ توں حل دی طرف۔۔۔ ہر جاہ محفوظ غذا‘‘ اے، جیڑھا غذائی آلودگی توں پیدا تھیوݨ آلی بیماریاں اچ کمی تے غذائی تحفظ دے بہتر نتائج دے حصول کیتے سائنس، اعداد و شمار تے شواہد تے مبنی اقدامات دی اہمیت دی طرف توجہ ݙویندے جوعوام کوں صحت دے خطرات توں محفوظ رکھݨ کیتے فیصلے تے عملی حل ناگزیر ہن۔انھاں آکھیا جو غذائی تحفظ لکھاں لوکاں دی روزمرہ زندگی تے اثر انداز تھیندے۔ ہرخاندان اے توقع رکھیندے جو بازار توں ڳھدی ڳئی، ریستوراناں اچ پیش کیتی ونڄݨ آلی، تعلیمی اداریں اچ تیار تھیوݨ آلی یا گھراں اچ استعمال کیتی ونڄݨ آلی خوراک محفوظ تے صحت بخش ہوسی۔ جݙاں غذائی تحفظ دے معیارات تے عمل نی کیتا ویندا تاں ایں دے نتیجے اچ بیماریاں دا کھنڈݨ ، آمدݨ اچ گھٹکی، علاج معالجے دے اضافی اخراجات تے تعلیم و روزگار اچ رکاوٹاں پیدا تھی سڳدن۔ ایں کیتے صارفین کوں انھاں خطرات توں محفوظ رکھݨ نہ صرف عوامی صحت دی ذمہ واری بلکہ عوامی اعتماد دا تقاضا وی اے۔انھاں آکھیا جو محفوظ غذا ݙیوݨ حکومتاں،ریگولیٹری اداریں،پیداوارکنندگان،پروسیسرز، ٹرانسپورٹرز، خوراک نال وابستہ کارکناں تے صارفین دی سانجھیاں کوششاں نال ہی ممکن اے۔ محفوظ غذا صحت دے تحفظ، صارفین دے اعتماد اچ ودھارے، روزگار دے استحکام تے معاشی ترقی اچ معاون ثابت تھیندی اے۔ اے بالخصوص ٻالاں، حاملہ تے کھیر پلاوݨ آلی عورتاں تے وݙے بزرگ لوکاں اچ غذائی آلودگی توں پیدا تھیوݨ آلی بیماریاں کوں گھٹ کرݨ اچ اہم کردار ادا کریندی اے۔صدرِ مملکت آکھیا جو اڄ دے ہک مربوط غذائی نظام اچ، مؤثر غذائی تحفظ دے اقدامات سائنس، شفافیت تے بین الاقوامی طور تے تسلیم شدہ معیارات دی بنیاد تے استوار ہووݨے چاہیدن۔ معائنہ جاتی نظام، تجربہ گاہواں دی استعداد، خوراک دی نگرانی دے مؤثر طریقہ کار تے حفظانِ صحت دے اصولاں کوں تکڑا بݨاوݨ عوامی صحت دے تحفظ کیتے ٻہوں ضروری اے۔ غذائی تحفظ دے معیار دے مؤثر نفاذ کیتے سارے متعلقہ اداریں وچال مسلسل تعاون ناگزیر اے۔ انھاں آکھیا جو عالمی یومِ تحفظِ غذا ترقی، عوامی صحت تے تجارت اچ غذائی تحفظ دے اہم کردار کوں وی اجاگر کریندے۔ غذائی تحفظ دے بنیادی ڈھانچے، آگاہی پروگراماں تے جدید ریگولیٹری نظام اچ سرمایہ کاری ہک مضبوط غذائی نظام دی تشکیل دے نال نال صارفین دے تحفظ کوں وی بہتر بݨا سڳدی اے۔انھاں سارے متعلقہ فریقین تے زور ݙتا جو او خوراک ݙیوݨ اچ محفوظ غذائی طریقیں کوں ودھارا ݙیون تے غذائی تحفظ دے معیارات تے عملدرآمد کوں تکڑا بݨاون۔ مشترکہ ذمہ واری، باخبر اقدامات تے مستقل عزم دے ذریعے اساں ایں گالھ کوں یقینی بݨا سڳدوں جو ہر فرد کوں محفوظ، غذائیت نال بھرپور تے معیاری خوراک میسر ہووے