وزیرِاعظم شہباز شریف دا عالمی یومِ تحفظِ غذا تے پیغام

اسلام آباد۔ 7 جون (اے پی پی) وزیرِاعظم محمد شہباز شریف محفوظ، غذائیت نال بھرپور، پائیدار تے خود کفیل غذائی مستقبل کیتے خوراک تے قدرتی وسائل دی قدر تے تحفظ دے عہد دی تجدید تے زور ݙیندے آکھیے جو پاکستان اچ زراعت کوں جامع تحقیق دی کمی، موسمیاتی تبدیلی، پاݨی دی قلت، آبادی اچ ودھارے، خوراک دے بدلدے رجحانات جیھے چیلنجز دا سامݨا اے۔اڄ منائے ونڄݨ آلے تحفظِ خوراک دے عالمی ݙینھ تے اپݨے پیغام اچ وزیرِاعظم آکھیا جو تحفظِ خوراک دے عالمی ݙینھ تے پاکستان عالمی برادری دے نال رل تے بیماریاں تے آلودگی دے خطرات توں محفوظ تے غذائیت نال بھرپور خوراک ݙیوݨ دے مشترکہ تے بامقصد ہدف کیتے اپݨے عزم دا اعادہ کریندے۔ وزیرِ اعظم دفتر دے میڈیا ونگ توں جاری بیان موجب وزیرِاعظم آکھیا جو زراعت تے غذائی نظام و ترسیل نال جڑئے ہرفرد بشمول کاشتکار، مویشی پال، ماہی گیر، محققین، تحفظِ خوراک کوں یقینی بݨاوݨ اچ اہم کردار ادا کریندن۔ اڄ اساں انھاں دی بے مثال خدمات تے کردار کوں وی خراجِ تحسین پیش کریندوں۔انھاں آکھیا جو عالمی یومِ تحفظِ خوراک اقوامِ متحدہ دی سرپرستی تے عالمی ادارۂ صحت تے خوراک و زراعت دی تنظیم دی سانجھی قیادت اچ منایا ویندے۔ اے ݙینھ خوراک دے ذریعے ممکنہ بیماریاں تے خطرات روکݨ ، انھاں دی وقتی نشاندہی تے مؤثر انتظام دی اہمیت کوں اجاگر کریندے۔ انھاں آکھیا جو اڄوکے سال دا موضوع ’’ٻوجھ توں حل تئیں، ہرجاہ محفوظ خوراک‘‘ اے۔ ایں سال خصوصی طور تے عالمی ادارۂ صحت دی طرفوں خوراک توں پیدا تھیوݨ آلی بیماریاں، اموات تے صحتِ عامہ تے انھاں دے اثرات دی عالمی، علاقائی تے قومی تخمینے دی جامع رپورٹ وی شائع کیتی ڳئی اے۔ رپورٹ دے ہوش رُبا انکشافات موجب دنیا اچ سالانہ 866 ملین لوک آلودہ خوراک پاروں بیمار تے ہر سال تقریباً 15 لکھ لوک جان دی بازی ہر ویندن۔ دنیا بھر دی پیداواری صلاحیت اچ کمی، طبی خرچے، معاشی نقصانات، سماجی مسئلے، سیاحت و تجارت دی تنزلی ایں دے علاوہ ہن۔انھاں آکھیا جو خوراک نال وابستہ خطرات دے عالمی اعداد و شمار دا ایہو جیھا مستند و جامع تجزیہ، ملکاں کوں عوامی صحت دے تحفظ کیتے پالیسی سازی، وسائل تے ضروری مداخلتی اقدامات دی ترجیحات دا تعین کرݨ اچ مدد ݙیندے۔ غیرمحفوظ خوراک توں پیدا کیتی ڳئی بیماری تے غذائی قلت دا سدِ باب اساݙی مشترکہ ذمہ واری اے۔ وزیرِاعظم آکھیا جو پاکستان زرخیز زمین، محنتی کسان تے زرعی صلاحیتاں و وسائل نال مالا مال ملک اے۔ تاں جو ملکی زراعت کوں جامع تحقیق دی کمی، موسمیاتی تبدیلی، پاݨی دی قلت، آبادی اچ ودھارا، خوراک دے بدلدے رجحانات جیھے چیلنجز دا سامݨا اے۔ انھاں مسائل دے حل کیتے مربوط تے متقاضی حکمتِ عملی تے کم جاری اے۔انھاں آکھیا جو وفاقی وزارتِ قومی غذائی تحفظ و تحقیق، مضبوط غذائی تحفظ، زرعی پیداوار ودھاوݨ تے موسمیاتی اثرات دی کمی کیتے زرعی تحقیق تے ٹیکنالوجی تے مبنی جامع اقدامات کریندی پئی اے۔ انھاں اقدامات اچ معیاری بِڄ ݙیوݨ ، زرعی خام اجزاء دی بہتر دستیابی، زرعی مشینری دا استعمال، ویلیو چینز دی مضبوطی، ذخیرہ کاری تے منڈیاں دے نظام اچ بہتری شامل اے۔ خوراک توں پیدا تھیوݨ آلی بیماریاں روکݨ کیتے حاصل شدہ علم تے تجربیں توں حکومتی سطح تے فیدہ چاوݨ تے صارفین دی سطح تے خوراک دی صفائی، معیاری انتظام تے پکاوݨ دے بنیادی اصولاں نال غذائی خدشات نال مؤثر انداز اچ نبڑیا ونڄ سڳدے۔وزیرِاعظم وفاقی و صوبائی حکومتاں، کساناں، جامعات، تحقیقی اداریں، نجی شعبے، سول سوسائٹی، ذرائع ابلاغ، ترقیاتی شراکت داراں تے سارے شہریاں توں اپیل کیتی جو او محفوظ، مضبوط تے صحت افروز غذائی نظام دی تشکیل کیتے اپݨا کردار ادا کرن۔ انھاں آکھیا جو آؤ اڄ خوراک تے قدرتی وسائل دی قدر تے تحفظ دا تجدیدِ عہد کروں تاں جو پاکستان کوں ہک محفوظ، غذائیت نال بھرپور، پائیدار تے خود کفیل غذائی مستقبل میسرتھی سڳے