پنجاب اسمبلی ملک دی پہلی مکمل ڈیجیٹل تے پیپرلیس صوبائی اسمبلی بݨ ڳئی

لاہور۔ 7 جون (اے پی پی) پنجاب اسمبلی پاکستان دی پہلی مکمل ڈیجیٹل تے پیپر لیس صوبائی اسمبلی بݨ ڳئی اے، ارکان کوں ہݨ ایجنڈا تے ٻئی دستاویزات دی پرنٹ شدہ کاپیاں نہ ݙتیاں ویسن بلکہ اسمبلی ہال اچ نصب جدید ٹیبلیٹس دے ذریعے سارے پارلیمانی امور انجام ݙتے ویسن۔ اسپیکر پنجاب اسمبلی ملک محمد احمد خان اسمبلی ہال اچ نصب جدید ٹیبلیٹس دا تفصیلی جائزہ ڳھدا تے ڈیجیٹلائزیشن دے ایں اقدام کوں پارلیمانی نظام اچ ہک اہم سنگِ میل قرار ݙتا۔یورپی یونین دے آئی پی فائیو (IP-5) پروگرام دے تحت پنجاب اسمبلی کوں 380 جدید ٹیبلیٹس ݙتے ڳئن جنھاں دے ذریعے آندے اسمبلی اجلاس مکمل طور تے پیپر لیس ماحول اچ منعقد تھیسن۔ اسپیکر پنجاب اسمبلی آکھیا جو ارکانِ اسمبلی کوں قانون سازی، ایجنڈا، ٻلز، قرارداداں تے ٻئی ساری پارلیمانی دستاویزات ڈیجیٹل انداز ݙتیاں ویسن۔ ایں اقدام توں اسمبلی کارروائی مزید مؤثر، شفاف تے تکھی رفتار ہوسی جݙاں جو ویلھا، وسائل تے سرکاری خرچیں اچ وی نمایاں کمی آسی۔انھاں آکھیا جو پیپر لیس اسمبلی دے قیام توں سالانہ کروڑاں روپے دی بچت ممکن ہوسی جݙاں جو کاغذ دے استعمال اچ نمایاں کمی پاروں ماحولیاتی تحفظ تے گرین پارلیمنٹ دے وژن کوں وی عملی تقویت ملسی۔ انھاں دا آکھݨ ہئی جو جدید ٹیکنالوجی دے استعمال توں ارکانِ اسمبلی دی معلومات تئیں رسائی، سہولت تے قانون سازی دے عمل اچ ٻئی بہتری آسی۔ ملک محمد احمد خان آکھیا جو دنیا تکھے ڈیجیٹل دور اچ داخل تھی چکی اے تے پارلیمانی اداریں کوں وی جدید تقاضیں موجب تھیوݨا پوسی۔انھاں آکھیا جو جیویں پرنٹنگ پریس اپݨے دور اچ علم و معلومات دی دنیا اچ انقلاب برپا کیتا ہئی، ایویں ہی ڈیجیٹل ٹیکنالوجی نویں عہد دی ہک وݙی انقلابی تبدیلی اے جیڑھی حکومتی اموراچ شفافیت، کارکردگی تے مؤثر طرزِ حکمرانی کوں ودھارا ݙیسی۔ اسپیکر پنجاب اسمبلی ایں عزم دا اظہار کیتا جو پنجاب اسمبلی جدید، ماحول دوست تے ٹیکنالوجی توں آراستہ پارلیمان دے طور تے ٻئے سرکاری اداریں کیتے وی ہک مثالی ماڈل ثابت تھیسی۔