آزاد جموں و کشمیر اچ انتخابات مقررہ شیڈول موجب تھیسن، ڈاکٹر طارق فضل چوہدری

اسلام آباد۔ 7 جون (اے پی پی) وفاقی وزیر پارلیمانی امور ڈاکٹر طارق فضل چوہدری آکھیے جو آزاد جموں و کشمیر اچ 27 جولائی کوں انتخابات مقررہ شیڈول موجب تھیسن، کجھ عناصر امن و امان دی صورتحال تے انتخابات کوں سبوتاژ کرݨ دی کوشش کریندے پئن، جوائنٹ ایکشن کمیٹی دے نال تھیوݨ آلے معاہدے دی زیادہ ترشقاں تے عملدرآمد تھی چکیے تے باقی معاملات وی مذاکرات دے ذریعے حل کیتے ویندے پئن، حکومت کہیں وی مسئلے دے حل کیتے ڳالھ مہاڑ کوں ہی واحد مؤثر رستہ سمجھدی اے۔ سیاسی رہنماواں دے رلے پریس کانفرنس توں خطاب کریندے وفاقی وزیر آکھیا جو آزاد جموں و کشمیر قانون ساز اسمبلی اپݨی مدت پوری کر چکی اے، نویں انتخابات دا اعلان تھی چکیے ، انتخابی شیڈول جاری کرݙتا ڳئے تے 27 جولائی کوں انتخابات تھیسن تاں جو کجھ عناصر دی طرفوں ایہو جیھی صورتحال پیدا کرݨ دی کوشش کیتی ویندی پئی اے جیں نال امن و امان متاثر تھیوے تے ماضی وانڳوں پرتشدد مظاہریں ہوا ملے۔انھاں آکھیا جو جوائنٹ ایکشن کمیٹی ستمبر 2023ء اچ وجود اچ آئی ہئی تے ایں دے تِرائے بنیادی مطالبات اٹے تے سبسڈی، بجلی دے نرخاں اچ کمی تے اشرافیہ دی مراعات اچ کمی ہن، جنھاں کوں حکومت تسلیم کیتا، ایں ویلھے آزاد کشمیر اچ بجلی دی قیمت تِرائے روپے فی یونٹ اے جݙاں جو اٹے سودھے ساریاں ضروری چیزاں تے سبسڈی ݙیندے پیوں۔ انھاں آکھیا جو ستمبر 2025ء اچ ول لانگ مارچ، شٹر ڈاؤن تے پرتشدد مظاہریں دی کال ݙتی ڳئی تے 38 نکات تے مشتمل چارٹر آف ڈیمانڈ پیش کیتا ڳیا۔ ایں معاملے تے وفاقی وزرا تے پاکستان پیپلز پارٹی دے رہنماواں تے مشتمل کمیٹی بݨائی ڳئی جیں 3 تے 4 اکتوبر 2025ء کوں مظفرآباد اچ جوائنٹ ایکشن کمیٹی نال مذاکرات دے بعد معاہدہ کیتا۔طارق فضل چوہدری آکھیا جو وزیرِاعظم محمد شہباز شریف معاہدے تے مکمل عملدرآمد دی ہدایت ݙتی، مطلوبہ فنڈز ݙیوݨ دا حکم ݙتا تے عملدرآمد دی نگرانی کیتے کمیٹی قائم کیتی۔ انھاں ݙسایا جو ہر مہینے جوائنٹ ایکشن کمیٹی دے نمائندیں دے نال اجلاس منعقد تھیندے رہیے تے معاہدے دی شقاں تے پیشرفت دا جائزہ ڳھدا ویندا رہیا۔ انھاں آکھیا جو 30 مئی کوں ول مذاکرات دے دوران جوائنٹ ایکشن کمیٹی دا بنیادی مطالبہ مہاجرین مقیم پاکستان کیتے مختص 12 نشستاں دا خاتمہ ہئی۔ حکومت دی طرفوں ایں مسئلے دے حل کیتے آل پارٹیز کانفرنس، قانون ساز اسمبلی اچ بحث، سپریم کورٹ آزاد کشمیر نال رجوع کرݨ تے 9 جون دی کال کوں کجھ  ݙینھ کیتے مؤخر کرݨ سودھے چار تجویزاں پیش کیتیاں ڳیاں تاں جوجوائنٹ ایکشن کمیٹی انھاں کوں قبول نی کیتا۔انھاں آکھیا جو حکومتِ پاکستان تے حکومتِ آزاد جموں و کشمیر ڳالھ مہاڑ دے ذریعے مسئلے دا حل چاہندی اے لیکن جوائنٹ ایکشن کمیٹی 9 جون کوں مارچ دے انعقاد تے اصرار کیتا۔ انھاں آکھیا جو تشدد تے انسانی جاناں دے ضیان توں کہیں مسئلے دا حل نی نکلدا۔ وفاقی وزیرآکھیا جو اے تاثر غلط اے جو 3 اکتوبر 2025ء دے معاہدے تے عملدرآمد نی تھیا یا صرف تِرائے شقاں تے عمل کیتا ڳئے۔ انھاں موجب 38 اچوں 35 شقاں تے عملدرآمد تھی چکے باقی چند شقاں اچ قانونی تے عدالتی پیچیدگیاں ہن۔انھاں آکھیا جو ٻہوں ساریاں شقاں تے ایگزیکٹو آرڈرز دے ذریعے عملدرآمد کیتا ڳیا، جنھاں اچ ایف آئی آرز دا خاتمہ، کابینہ دے حجم اچ کمی، متاثرین کوں معاوضیں دی ادائیگی، نوکریاں ݙیوݨ تے ٻئے اقدامات شامل ہن۔ انھاں آکھیا جو مظاہریں دے دوران جاں بحق تے زخمی تھیوݨ آلے سارے متاثرین کوں مکمل معاوضہ ادا کیتا ڳئے۔ڈاکٹر طارق فضل چوہدری آکھیا جو سڑکاں، سرنگاں، ہوائی اڈیں، بجلی دے نظام تے صحت دی سہولتاں متعلق ترقیاتی منصوبیں کیتے ارباں روپے مختص کیتے ڳئن، تاں جو ایہو جیھے وݙے منصوبے کجھ مہینے اچ مکمل نی تھیندے  انہاں کوں پورا تھیوݨ اچ سال لڳدن۔ انہاں آکھیا کجھ مہینے بعد لانگ مارچ، شٹر ڈاؤن تے پرتشدد احتجاج دے ذریعے ترقیاتی منصوبیں دی تکمیل دا مطالبہ کرݨ مناسب طرزِ عمل کائنی۔انھاں سوال چاتا جو کیا آزاد جموں و کشمیر اچ امن و امان دی صورتحال خراب کرݨ دی کوششاں دا مقصد آزاد کشمیر تے پاکستان کوں انڄ اکائیاں ظاہر کرݨا، ݙوہیں دے تکڑے تعلقات کوں کمزور کرݨا، آزاد کشمیر دے عوام کوں مقبوضہ کشمیر دے مہاجرین توں پرے کرݨ یا کشمیر کاز کوں ضیان پڄاوݨ تاں نی؟ انھاں آکھیا جو پاکستان ہمیشہ کشمیر کاز دے نال کھڑا رہیے تے اڳوں وی کشمیریاں دے حقِ خودارادیت دی حمایت جاری رکھیسی۔ انھاں آکھیا جو آزاد جموں و کشمیر اچ انتشار کھنڈاوݨ دی ہر کوشش توں پاکستان دا دشمن فیدہ چا سڳدے۔ انھاں آکھیا جو جوائنٹ ایکشن کمیٹی دے مطالبات کوں نہ پہلے نظرانداز کیتا گیا ہئی تے نہ ہݨ کیتا ویندا پئے تاں جو مسئلیں دے حل سانڳے مذاکرات ہی واحد رستہ ہن۔ انھاں آکھیا جو نشوم انسانی جاناں دے ضیان تے تشدد دی کہیں صورت اجازت نہیں ݙتی ونڄ سڳدی۔