اسلام آباد۔ 8 جون (اے پی پی) وفاقی وزیرِ اطلاعات تے نشریات عطاء اللہ تارڑ پاکستان تے ازبکستان دی سانجھی تاریخ تے ثقافتی ورثے کوں اڳو گھن آوݨ دی ضرورت تے زور ݙتے۔ او سنوار کوں اتھاں ملاقات کیتے آئے ازبکستان دے سفیر علی شیر تختیوف نال ڳالھ مہاڑ کریندے پئے ہن۔ ایں ملاقات دے دوران ݙونھیں ملکاں دے درمیان فلم سازی دے شعبے اچ تعاون ودھاوݨ سمیت میڈیا، فلم …
وفاقی وزیرِ اطلاعات عطاء اللہ تارڑ نال ازبکستان دے سفیر علی شیر تختیوف دی ملاقات، سانجھی تاریخ تے ثقافتی ورثے کوں اڳو گھن آوݨ کیتے ݙونھیں ملکاں دی سوشل میڈیا ٹیمز وچال رابطیاں دے ودھارے تے اتفاق
مزید خبراں
اسلام آباد۔ 8 جون (اے پی پی) وفاقی وزیرِ اطلاعات تے نشریات عطاء اللہ تارڑ پاکستان تے ازبکستان دی سانجھی تاریخ تے ثقافتی ورثے کوں اڳو گھن آوݨ دی ضرورت تے زور ݙتے۔ او سنوار کوں اتھاں ملاقات کیتے آئے ازبکستان دے سفیر علی شیر تختیوف نال ڳالھ مہاڑ کریندے پئے ہن۔ ایں ملاقات دے دوران ݙونھیں ملکاں دے درمیان فلم سازی دے شعبے اچ تعاون ودھاوݨ سمیت میڈیا، فلم تے ثقافتی تعاون دے فروغ تے تفصیلی ڳالھ مہاڑ تھئی۔ ازبکستان دے سفیر خطے اچ امن دے قیام تے اسلام آباد امن مذاکرات اچ پاکستان دے کردار تے کوششاں دی تعریف کیتی۔ ایں موقع تے ڳالھ مہاڑ کریندیں ہوئیں وفاقی وزیرِ اطلاعات آکھیے جو پاکستان ازبکستان دے نال آپݨے تعلقات کوں قدر دی نگاہ نال ݙیکھدے۔ انھاں آکھیے جو ازبکستان دے نال رل تے مختصر فلم، دستاویزی فلم یا ڈرامہ سیریز دے آپشنز تے غور کیتا ویندا پئے، ایں طرح دے منصوبیاں کیتے تجربہ کار پروڈکشن اداریاں دی شمولیت ضروری اے۔ عطاء اللہ تارڑ آکھیے جو سانجھی فنڈنگ دے ذریعے وݙے پیمانے تے فلمی منصوبیاں کوں اڳو ودھایا ونڄ سڳدے۔ وفاقی وزیرِ اطلاعات پاکستان تے ازبکستان دی سانجھی تاریخ تے ثقافتی ورثے کوں اڳو گھن آوݨ تے زور ݙتے، ایں مقصد کیتے ݙونھیں طرفوں سوشل میڈیا ٹیمز وچال رابطیاں دے ودھارے، سانجھے ڈیجیٹل مواد دی تیاری تے ہک مربوط آن لائن تشہیری حکمتِ عملی بݨاوݨ تے اتفاق کیتا ڳیا۔ وفاقی وزیر آکھیے جو پاکستان تے ازبکستان دے میڈیا اداریاں دے مابین تعاون کوں مزید وسعت ݙتی ویسی، ایں سلسلے اچ ݙونھیں پاسوں صحافیاں دے مطالعاتی دورے وی اہم پیشرفت ثابت تھیسن۔ انھاں ݙونھیں ملکاں دے درمیان ثقافتی تے میڈیا تعلقات کوں نویں راہ ݙیوݨ دے عزم کوں دہرایا۔
