حکومت نرسنگ دے شعبے کوں جدید تقاضیاں نال ہم آہنگ بݨاوݨ تے عالمی معیار دی تربیت فراہم کرݨ کیتے پرعزم اے، وفاقی وزیرِ صحت مصطفیٰ کمال

اسلام آباد۔ 8 جون (اے پی پی) وفاقی وزیرِ صحت مصطفیٰ کمال آکھیے جو نرسنگ دا شعبہ صحت دے نظام اچ بنیادی حیثیت رکھیندے، پاکستان اچ ایں شعبے دی بہتری کیتے جامع اصلاحات متعارف کرائیاں ویندی پئن، حکومت نرسنگ دے شعبے کوں جدید تقاضیاں نال ہم آہنگ بݨاوݨ، افرادی قوت اچ اضافہ کرݨ تے عالمی معیار دی تربیت فراہم کرݨ کیتے پرعزم اے۔ پاکستان نرسنگ اینڈ مڈوائفری کونسل (پی این اینڈ ایم سی) اچ پریس کانفرنس کریندیں ہوئیں انھاں آکھیے جو پاکستان کوں تقریباً 9 لاکھ نرسز دی ضرورت اے جڈانجو دنیا بھر اچ 25 لاکھ نرسز دی کمی دا سامݨا اے۔ انھاں آکھیے جو پاکستان اچ نرسز دی تعداد صرف چھی ہزار دے نیڑے اے جڈانجو پڑوسی ملک اچ اے تعداد چھی لکھ اے۔ انھاں آکھیے جو جے نرسنگ دے شعبے کوں درست انداز اچ منظم کیتا ونڄے تاں پاکستان نہ صرف آپݨی ضرورتاں پوریاں کر سڳدے بلکہ عالمی سطح تے وی افرادی قوت فراہم کر سڳدے۔ وزیرِ صحت آکھیے جو نرسنگ کونسل اچ گزشتہ کئی سالیں توں انتظامی تے قانونی مسائل موجود ہن۔ انھاں دعویٰ کیتے جو کونسل دے متعدد عہدیداراں تے ارکان وچال مقدمات زیرِ سماعت ہن جئیں دے باعث ادارے دی کارکردگی شدید متاثر تھئی، عدالت دے احکامات دے باوجود بعض انتظامی معاملات اچ رکاوٹاں پیدا کیتی ڳئن۔ مصطفیٰ کمال آکھیے جو نرسنگ کونسل اچ اصلاحات کیتے آرڈیننس جاری کیتا ڳیا جئیں دے تحت ادارے دے انتظامی ڈھانچے اچ تبدیلیاں کیتیاں ڳئیاں۔ انھاں ݙسائے جو نویں نظام دے تحت کونسل دے صدر کیتے گریڈ 22 دے افسر دی شرط رکھی ڳئی اے تانجو احتساب تے شفافیت کوں یقینی بݨایا ونڄ سڳے۔ انھاں آکھیے جو 19 ارکان تے مشتمل نویں کونسل بݨا ݙتی ڳئی اے جیندے اچ صوبیاں تے گلگت بلتستان دی نمائندگی شامل ہوسی۔ انھاں آکھیے جو آرڈیننس کوں مستقل قانون دی شکل ݙیوݨ کیتے معاملہ وزیراعظم دے کول بھجوایا ڳئے۔