ملک دے ودھ سارے علاقیں اچ موسم تَتا تے حَٻس آلا رہسی، اُتلے پنجاب، خیبرپختونخوا تے کشمیراچ زور دی ہوا گُھلݨ نال مینھ وسݨ دا امکان اے، محکمہِ موسمیات

اسلام آباد۔28جولائی (اے پی پی) محکمہِ موسمیات آندے 24 گھنٹے اچ ملک دے ودھ سارے علاقیں اچ موسم تَتا تے حَٻس آلا رہݨ دی پیش گوئی کریندے آکھیے جو اُتلے پنجاب، خیبرپختونخوا تے کشمیراچ زور دی ہوا گُھلݨ دے نال کھمݨ گاجاں رَلے مینھ وسݨ دا امکان اے۔محکمہِ موسمیات موجب گزریل 24 گھنٹے اچ ملک دے ودھ سارے علاقیں اچ موسم تَتا تے حٻس آلا ریہا۔ کشمیر، گلگت بلتستان، اُتلے پنجاب تے خیبرپختونخوا اچ کجھ جہیں تے کھمݨ گاجاں نال مینھ وُٹھا، ساریں توں ودھ مینھ کشمیر مظفرآباد سٹی 68، خیبرپختونخوا: بالاکوٹ 29، پٹن 02، کالام 01، پنجاب: لاہور ایئرپورٹ 15، گجرات 06، قصور 01، گلگت بلتستان: سکردو 05، بابوسراچ 02 ملی میٹر مینھ وُٹھا ۔منگل دے ݙینھ ریکارڈ کیتے ڳئے ودھ توں ودھ درجہِ حرارت: دالبندین 46، سبی، نوکنڈی، دادو 45، تربت، بھکراچ 44 ڈگری سینٹی گریڈ ریکارڈ کیتا ڳئے۔محکمہِ موسمیات آکھیے جو موجودہ صورتحال پاروں ملک دے اُتلےعلاقیں تے کمزور مغربی ہوائیں دا سلسلہ موجود اے۔ بحیرہِ عرب توں کمزور مرطوب ہوائیں ملک دے شمال مشرقی علاقیں اچ داخل تھیندیاں پئن۔