وکلاء آئین دی بالادستی تے جمہوری اقدار دے ودھارے اچ ہمیشہ کلیدی کردار ادا کیتے، سپیکر قومی اسمبلی ایاز صادق

اسلام آباد۔28جولائی (اے پی پی) سپیکر قومی اسمبلی سردار ایاز صادق آکھیا جو وکلاء برادری ہمیشہ آئین دی بالادستی کوں یقینی بݨاوݨ تے جمہوری اقدار تے اصولاں دی مضبوطی کیتے فعال تے تعمیری کردار ادا کیتے، قومی اسمبلی اچ لیجسلیٹو ڈرافٹنگ کونسل قائم کیتی ڳئی اے جیں اچ تجربہ کار لوکاں کوں میرٹ دی بنیاد تے بھرتی کیتا ڳئے تاں جو قانون سازی دے مسودے دے معیار کوں مزید تکڑاتے بہتر بݨایا ونڄ سڳے۔اے ڳالھ انہاں پارلیمنٹ ہائوس اچ حیدرآباد ہائی کورٹ بار ایسوسی ایشن، ڈسٹرکٹ بار ایسوسی ایشن دادو تے ڈسٹرکٹ بار ایسوسی ایشن ٹنڈو الہ یار دے وکلاء دے وفد نال ملاقات اچ آکھی ۔ ایں موقع تے سپیکر صوبائی اسمبلی بلوچستان کیپٹن (ر) عبدالخالق خان اچکزئی وی موجود ہن۔ملاقات دے دوران وفد سپیکر قومی اسمبلی کوں قانونی برادری دے ارکان کوں اپݨی پیشہ ورانہ ذمہ واریاں دی ادائیگی اچ پیش مسئلیں تے چیلنجز دا ݙسایا۔ ایں موقع تے پیشہ ورانہ ترقی، فلاح و بہبود تے قانونی برادری دے مجموعی مفادات متعلق امور تے وی ڳالھ مہاڑ کیتی ڳئی۔سپیکر سردار ایاز صادق آکھیا جو وکلاء جمہوری اداریں دی مضبوطی تے قانون دی حکمرانی کوں برقرار رکھݨ اچ اہم کردار ادا کیتے۔ انھاں پارلیمنٹ تے قانونی برادری وچال نیڑے تعاون دی لوڑھ تے زور ݙتا۔سپیکر سردار ایاز صادق ایں ڳالھ دا اعادہ کیتا۔ جو قومی اسمبلی دی لیجسلیٹو ڈرافٹنگ کونسل قانون سازی دے عمل کوں تکڑا بݨاوݨ اچ موثر کردار ادا کیتے۔ وفد ملک دے پارلیمانی اداریں کوں مضبوط بݨاوݨ تے قانونی برادری دے نال ودھ توں ودھ رابطے ودھاوݨ تے سپیکر سردار ایاز صادق دیاں کوششاں دی تعریف کیتی ۔سپیکر سردار ایاز صادق وفد کوں یقین ݙیوایا جو ملاقات اچ چاتے ڳئے مسئلیں تے غور کیتا ویسی تے مناسب طریقے نال حل کیتا ویسی۔وفد اچ ہائی کورٹ بار ایسوسی ایشن حیدرآباد دے جنرل سیکرٹری سید شہزاد شاہ سودھے آصف علی ابڑو جوائنٹ سیکرٹری ہائی کورٹ بار ایسوسی ایشن حیدرآباد، ایاز حسین رند جنرل سیکرٹری ڈسٹرکٹ بار ایسوسی ایشن دادو تے ضمیر حسین خاصخیلی لائبریری سیکرٹری ڈسٹرکٹ بار ایسوسی ایشن ٹنڈو الہ یار شامل ہن۔