سرکاری تے نجی بینک اپݨا گھر سکیم کیتے ودھ توں ودھ فنانسنگ کرن، وزیراعظم محمد شہباز شریف دی ’’وزیراعظم اپݨا گھر سکیم‘‘ دے جائزہ اجلاس اچ ہدایت

اسلام آباد۔28جولائی(اے پی پی) وزیراعظم محمد شہباز شریف اپݨا گھر سکیم دے حوالے نال کم دی رفتار کوں تکھا کرݨ دی ہدایت کریندیں آکھیا جو سرکاری تے نجی بینک اپݨا گھر سکیم کیتے ودھ توں ودھ فنانسنگ کرن۔وزیراعظم اپݨا گھر سکیم تے پیشرفت دا جائزہ گھنݨ کیتے جائزہ اجلاس وزیراعظم محمد شہباز شریف دی زیرِ صدارت تھیا۔ وزیر اعظم دفتر دے میڈیا ونگ توں جاری بیان موجب اجلاس نال خطاب کریندیں وزیراعظم آکھیا جو عام آدمی کوں چھت ݙیوݨ حکومت دی اولین ترجیح اے، ملک دے غریب تے متوسط طبقے کوں اپݨی چھت دے حصول کیتے ’’وزیراعظم اپݨا گھر سکیم‘‘ دا اجراء کیتا ڳئے۔انھاں اپݨا گھر سکیم دے حوالے نال کم دی رفتار کوں تکھا کرݨ دی ہدایت کریندیں آکھیا جو سرکاری تے نجی بینک اپݨا گھر سکیم کوں کامیاب کرݨ دے حوالے نال ودھ توں ودھ فنانسنگ کرن۔ وزیراعظم اپݨا گھر سکیم کیتے عمودی تے افقی ماڈل ہائوسنگ منصوبیں کیتے حکمتِ عملی ترتیب ݙیوݨ دی ہدایت کیتی۔اجلاس اچ وزیراعظم اپݨا گھر سکیم دی فنانسنگ اچ پیشرفت دے حوالے نال بریفنگ اچ ݙسایا ڳیا جو اپݨا گھر سکیم دی فنانسنگ کیتے بینک ہݨ تئیں 204 ارب روپے منظور کر چکئن جݙاں جو 27 ارب روپے دی فنانسنگ کیتی ونڄ چکی اے۔ وزارتِ ہائوسنگ تے سٹیٹ بینک آف پاکستان اپݨا گھر سکیم تے پیشرفت دا ہر ہفتے جائزہ گھندے پئن۔اجلاس اچ وفاقی وزیرِ اقتصادی امور احد خان چیمہ، وفاقی وزیرِ خزانہ و محصولات محمد اورنگزیب، وفاقی وزیرِ ہائوسنگ اینڈ ورکس میاں ریاض حسین پیرزادہ، وزیرِ مملکت خزانہ و ریلوے بلال اظہر کیانی تے متعلقہ اعلیٰ سرکاری افسراں شرکت کیتی۔