وزیراعظم محمد شہباز شریف دی کاروباری برادری خصوصاً چھوٹے تے درمیانے درجے دے کاروبار کرݨ آلیں دی قرضیں تئیں رسائی تکھی کرݨ دی ہدایت

اسلام آباد۔28جولائی (اے پی پی) وزیراعظم محمد شہباز شریف کاروباری برادری خصوصاً چھوٹے تے درمیانے درجے دے کاروبار کرݨ آلیں دی قرضیں تئیں رسائی تکھی کرݨ دی ہدایت کریندیں آکھیا جو کاروباری شعبے کوں قرضیں تئیں سوکھی رسائی پائیدار معاشی ترقی دی بنیاد اے۔وزیراعظم محمد شہباز شریف دی زیرِ صدارت ملک اچ کاروباری شعبے بالخصوص چھوٹے تے درمیانے درجے دے کاروباری اداریں (ایس ایم ایز) دی قرضیں تئیں رسائی ودھاوݨ دے حوالے نال اعلیٰ سطح جائزہ اجلاس اتھاں منعقد تھیا۔اجلاس اچ وفاقی وزراء احد خان چیمہ، محمد اورنگزیب، وزیرِ مملکت بلال اظہر کیانی، وزیراعظم دے معاونِ خصوصی ہارون اختر، گورنر سٹیٹ بینک آف پاکستان جمیل احمد، چیئرمین پاکستان بینکرز ایسوسی ایشن ظفر مسعود تے متعلقہ اعلیٰ سرکاری حکام شرکت کیتی۔وزیراعظم دفتر دے میڈیا ونگ توں جاری بیان موجب وزیراعظم اجلاس نال خطاب کریندیں آکھیا جو کاروباری شعبے کوں قرضیں تئیں سوکھی رسائی پائیدار معاشی ترقی دی بنیاد اے جیں نال نہ صرف سرمایہ کاری تے پیداوار اچ ودھارا تھیسی بلکہ روزگار دے موقع پیدا تھیسن تے برآمدات اچ وی ودھارا ممکن ہوسی۔وزیراعظم ہدایت کیتی جو کاروباری برادری خصوصاً چھوٹے تے درمیانے درجے دے کاروبار کرݨ آلیں کیتے قرضیں تئیں رسائی تکھی کیتی ونڄے، جیڑھا بینک کاروباری شعبے خصوصاً ایس ایم ایز کوں ساریں توں ودھ قرضے ݙیسی، ایں کوں ہر سال خصوصی ایوارڈ ݙتا ویسی۔وزیراعظم مالیات تئیں رسائی دے ودھارے کیتے ترائے سطحی گورننس ڈھانچے دی منظوری وی ݙتی۔ مالیاتی سہولتاں ݙیوݨ اعلیٰ سطحی کمیٹی دی سربراہی وزیراعظم خود کریسن۔ ایویں اے ٹو ایف ودھاوݨ کیتے سٹیئرنگ کمیٹی دی سربراہی وزیرِ خزانہ کریسن تے گورنر سٹیٹ بینک ایں دے شریک چیئرمین ہوسن۔ ایس ایم ای، زرعی، آئی ٹی، نویں توانائی تے ہاؤسنگ فنانس کیتے وکھریاں شعبہ جاتی ذیلی کمیٹیاں بݨائیاں ویسن۔وزیراعظم کوں بریفنگ اچ ݙسایا ڳیا جو جون 2026ء اچ بینکاں دی طرفوں ایس ایم ای فنانسنگ دا حجم 1.15 ٹریلین روپے توں ودھا تے جون 2028ء تئیں 2 ٹریلین روپے تئیں گھن ونڄݨ دا ہدف مقرر کیتا ڳئے، جون 2028ء تئیں ایس ایم ای قرض گھنݨ آلیں دی موجودہ تعداد کوں 3 لکھ 24 ہزار توں ودھا تے 7 لکھ 75 ہزار کیتا ویسی، بینکاری قرضیں اچ ایس ایم ای فنانسنگ دا حصہ موجودہ 9.9 فیصد توں ودھا تے جون 2028ء تئیں 13 فیصد کیتا ویسی۔بریفنگ موجب بینکاں دی کارکردگی پرکھݨ تے اہداف دے حصول دی موثر نگرانی تے حوصلہ افزائی کیتے سکورنگ سسٹم متعارف کروایا ویسی۔