وزیراعظم نال امریکی کانگریس دے ارکان تے تجارتی وفد دی ملاقات، پاک امریکہ تعلقات مزید تکڑے بݨاوݨ دے عزم دا اعادہ

اسلام آباد۔28جولائی (اے پی پی) وزیراعظم محمد شہباز شریف نال امریکی کانگریس دے نمائندے ریان زنکے، مائیکل بومگارٹنر تے تجارتی وفد اسلام آباد اچ ملاقات کیتی۔وزیراعظم ݙوہیں امریکی کانگریس ارکان کوں پاکستان آوݨ تے خوش آمدید آکھیا تے انھاں دے دورے کوں پاکستان تے امریکہ وچال تکڑے تعلقات دے قیام دے پاسے خوش آئند قدم قرار ݙتا۔ وزیراعظم امریکی آزادی دی 250 ویں سالگنڈھ تے کانگریس ارکان تے امریکی عوام کوں مبارخ ݙیندیں صدر ڈونلڈ ٹرمپ کیتے نیک خواہشات دا اظہار کیتا۔وزیراعظم صدر ڈونلڈ ٹرمپ دی اوں جرات مندانہ تے فیصلہ کن مداخلت دا وی ذکر کیتا جیں دے نتیجے اچ مئی 2025ء اچ پاکستان تے بھارت وچال کشیدگی دا خاتمہ تے جنگ بندی عمل اچ آئی جیں نال کروڑاں زندگیاں بچاوݨ اچ مدد ملی۔محمد شہباز شریف آکھیا جو پاکستان تجارت، سرمایہ کاری، زراعت، آئی ٹی، کان کنی و معدنیات تے توانائی دے شعبیں اچ امریکہ دے نال تعاون کوں مزید مستحکم کرݨ چاہندے۔ݙوہیں کانگریس ارکان دورے دے دوران پرتپاک میزبانی تے وزیراعظم دا شکریہ ادا کیتا تے علاقائی امن دیاں کوششاں اچ پاکستان دے کلیدی کردار تے وزیراعظم دی تعریف کیتی ۔ انھاں آکھیا جو صدر ڈونلڈ ٹرمپ دے پاکستانی قیادت دے نال بہترین تعلقات ہن، جیں دے ݙوطرفہ تعلقات تے وی مثبت اثرات مرتب تھیندے پئن۔فریقین پاکستان دا دورہ کرݨ آلے کانگریسی وفد تے امریکہ دا دورہ کرݨ آلے پارلیمانی وفد دے دوریں دی تعداد اچ ودھارے تے اتفاق کیتا۔وزیراعظم پاکستان دا دورہ کرݨ آلے امریکی کارپوریٹ سیکٹر دے ایگزیکٹوز دے وفد دے اعزاز اچ استقبالیہ وی ݙتا۔ وفد اچ آئی ٹی، ٹیکنالوجی، توانائی، کان کنی تے مینوفیکچرنگ سودھے مختلف شعبیں دے نمائندے شامل ہن۔وزیراعظم امریکہ دے نال پراݨی شراکت داری کوں تکڑا بݨاوݨ کیتے پاکستان دے عزم دا اعادہ کیتا۔ انھاں مزید امریکی کمپنیاں کوں دعوت ݙتی جو او مختلف شعبیں اچ سانجھے طور تے فیدہ مند منصوبیں اچ پاکستان اچ سرمایہ کاری کرن۔پُرتپاک تے انتہائی دوستانہ ڳالھ مہاڑ دے دوران وزیراعظم ایں ڳالھ تے زور ݙتا جو پاکستانی نژاد امریکی کمیونٹی پاکستان تے امریکہ وچال ہک اہم پل دا کردار ادا کریندی اے۔