شاہ عبداللطیف بھٹائی دا پیغام محبت، امن تے انسانیت کیتے مشعلِ راہ اے، گورنر سندھ نہال ہاشمی

حیدرآباد۔29جولائی (اے پی پی)گورنر سندھ نہال ہاشمی آکھیے حضرت شاہ عبداللطیف بھٹائیؒ صرف سندھ دے عظیم شاعر ہی نہ ہن بلکہ پوری انسانیت دے عظیم رہنما ہن، جنھاں اپݨی شاعری تے تعلیمات دے ذریعے محبت، امن، اخوت تے رواداری دا ایجھا سنیھا ݙتا جیڑھا اڄ وی دنیا کیتے مشعلِ راہ اے۔شاہ عبداللطیف بھٹائیؒ دے 283ویں سالانہ عرس دے موقع تے مزار تے حاضری، چادر چڑھاوݨ تے فاتحہ پڑھݨ دے بعد میڈیا نال ڳالھ کریندے گورنر سندھ آکھیا جو تقریباً ساڈھے چار سوسال پہلے جݙاں نہ پرنٹنگ پریس ہئی، نہ کیمرہ تے نہ جدید ذرائعِ آونڄ ، اوں دور اچ شاہ لطیفؒ پورے سندھ دا پیدل سفر کیتا، لوکاں نال براہِ راست ملاقاتاں کیتیاں تے انسانیت، محبت تے بھرپی دا درس عام کیتا۔انھاں آکھیا جو شاہ عبداللطیف بھٹائیؒ دا سنھیا صرف سندھ یا پاکستان تئیں محدود نی بلکہ پوری دنیا کیتے ہے۔ انھاں دی تعلیمات انساناں دے نال نال زناوراں، وݨ تے فطرت نال محبت دا درس ݙیندن۔ انھاں آکھیا جو سندھ صوفیاں دی سرزمین اے تے اتھاں دے لوک محبت، امن تے رواداری تے یقین رکھیندن۔گورنر سندھ آکھیا جو شاہ عبداللطیفؒ دے رسالے دا ودھ توں ودھ مطالعہ کیتا ونڄݨا چاہیدے تاں جو نویں نسل انھاں دی تعلیمات توں روشناس تھی سڳے۔ انھاں آکھیا جو دنیا کوں پتہ ہووݨ چاہیدے جو سندھ محبت کرݨ آلیں تے امن پسند لوکاں دی دھرتی اے۔ انھاں آکھیا جو تقریب اچ مختلف مذہب، مسلک تے زباناں نال تعلق رکھݨ آلی شخصیات دی موجودگی ایں ڳالھ دا ثبوت اے جو شاہ عبداللطیف بھٹائیؒ دی تعلیمات مذہبی ہم آہنگی تے رواداری دی بہترین مثال ہن

۔سیاسی امور تے ڳالھ کریندے گورنر سندھ آکھیا جو جمہوریت اچ سیاسی اختلافات معمول دی ڳالھ ہن، تاں جو قومی مفادات تے ساری سیاسی قوتاں کوں یکجہتی دا مظاہرہ کرݨا چاہیدے۔ انھاں مٹیاری موٹروے منصوبے دی وقتی بحالی دی امید ظاہر کریندیں آکھیا جو ایں منصوبے تے ول کم شروع تھیسی ۔بھارت دی طرفوں سندھ طاس معاہدے دی خلاف ورزی بابت سوال تے انھاں آکھیا جو “شاہ بھٹائی دی دھرتی دا پاݨی کوئی نی کھس سڳدا، سندھو اساݙی ماء اے تے ہمیشہ وہندا رہسی۔” انھاں آکھیا جو پاکستان اپݨی قومی سلامتی دے تحفظ دی بھرپور صلاحیت رکھیندے تے کہیں کوں وی ملک دے مفادات دے خلاف سازش دی اجازت نہ ݙتی ویسی۔ انھاں آکھیا جو پاکستان اچ فیلڈ مارشل سید عاصم منیر جیھے سپہ سالار موجود ہن جیں دے ہوندیں پاکستان کوں کہیں وی شئے دی پرواہ کائنی۔ایں موقع تے وزیر مملکت مذہبی امور کھیئل داس کوہستانی، وزیراعظم یوتھ پروگرام سندھ دے کوآرڈینیٹر فہد شفیق، سورٹھ تھیبو، ضلعی انتظامیہ دے افسر تے ٻئی معزز شخصیات وی موجود ہن۔