حیدرآباد۔29جولائی (اے پی پی) گورنر پنجاب سردار سلیم حیدر خان آکھیا جو حضرت شاہ عبداللطیف بھٹائیؒ سندھ دے عظیم صوفی بزرگ تے شاعر ہن، جنھاں دا پیغام پوری انسانیت کیتے محبت، اخوت، امن تے رواداری دا پیغام اے۔انھاں آکھیا جو بِھٹ شاہ دی عظیم صوفی سرزمین تے عرس دی تقریبات اچ شرکت انھاں کیتے اعزاز دی ڳالھ اے۔ اے ڳالھ انھاں بھٹ شاہ اچ حضرت شاہ عبداللطیف بھٹائیؒ دے 283ویں …
حضرت شاہ عبداللطیف بھٹائیؒ دا پیغام محبت، امن تے اخوت دا عالمی پیغام اے، گورنر پنجاب سردار سلیم حیدرخان
مزید خبراں
حیدرآباد۔29جولائی (اے پی پی) گورنر پنجاب سردار سلیم حیدر خان آکھیا جو حضرت شاہ عبداللطیف بھٹائیؒ سندھ دے عظیم صوفی بزرگ تے شاعر ہن، جنھاں دا پیغام پوری انسانیت کیتے محبت، اخوت، امن تے رواداری دا پیغام اے۔انھاں آکھیا جو بِھٹ شاہ دی عظیم صوفی سرزمین تے عرس دی تقریبات اچ شرکت انھاں کیتے اعزاز دی ڳالھ اے۔ اے ڳالھ انھاں بھٹ شاہ اچ حضرت شاہ عبداللطیف بھٹائیؒ دے 283ویں سالانہ عُرس دی تقریبات دے موقع تے میڈیا کُوں آکھی۔ ایں موقع تے انھاں مزار تے چادر چڑھا تے فاتحہ پڑھی تے شاہ دا راڳ وی سݨیا۔
انھاں آکھیا جو پاکستان پیپلز پارٹی دی چیئرپرسن شہید محترمہ بے نظیر بھٹو، سابق وزیراعظم ذوالفقار علی بھٹو تے چیئرمین بلاول بھٹو زرداری مختلف ویلھے اچ حضرت شاہ عبداللطیف بھٹائیؒ دے عرس اچ شرکت کریندے ریہن۔گورنر پنجاب انتخابی معاملات تے ڳالھ کریندے آکھیے گلگت بلتستان تے آزاد کشمیر دے انتخابی عمل اچ کجھ حلقیں دے نتیجے اچ تاخیر باعثِ تشویش اے۔
انھاں آکھیا جو شفاف تے وقتی انتخابی عمل جمہوریت دی تکڑی بنیاد اے تے انتخابات عوام دے اعتماد موجب تھیوݨے چاہیدن۔ انھاں آکھیا جو پاکستان پیپلز پارٹی ہمیشہ غریب تے محروم طبقے دے حقوق کیتے آواز چیندی رہی اے تے عوامی مسئلیں دے حل کیتے اپݨا کردار ادا کریندی پئی اے۔ انھاں آکھیا جو میڈیا کوں عوامی مسئلیں کوں اجاگر کرݨ اچ اپݨا مثبت کردار ادا کرݨا چاہیدے۔انھاں سندھ دے انفراسٹرکچر متعلق تنقید کوں مسترد کریندیں آکھیا جو او نواب شاہ توں بھٹ شاہ تئیں بہترین سڑکاں تے سفر کرتے آئن، ایں کیتے سندھ کوں کھنڈر قرار ݙیوݨ حقائق دے منافی اے۔ انھاں مہانگ، بجلی دے نرخاں تے عوامی اوکھ تے وی تشویش دا اظہار کیتا۔ایں موقع تے صوبائی وزیرِ ثقافت و سیاحت سندھ ذوالفقار علی شاہ آکھیا جو حضرت شاہ عبداللطیف بھٹائیؒ دی تعلیمات محبت، امن، بھرپی تے انسانیت دا درس ݙیندن، جنھاں دی اڄ پورے ملک بالخصوص بلوچستان، خیبر پختونخوا تے ٻئے علاقیں اچ پہلے توں زیادہ لوڑھ اے۔صوبائی وزیرآکھیا جو صوفیائے کرام دی تعلیمات اساݙی روحانی تے تہذیبی روایت دا قیمتی سرمایہ ہن۔ انھاں آکھیا جو عرس دی تقریبات دے دوران کلچرل ویلیج، سڳھڑاں دی کچاری تے ٻئے ثقافتی پروگراماں اچ وی شرکت کیتی ویسی۔ذوالفقارعلی شاہ گورنر پنجاب سردار سلیم حیدر دی عرس اچ شرکت کوں بین الصوبائی ہم آہنگی تے صوفی ثقافت نال محبت دا اظہار قرار ݙیندیں انھاں دا شکریہ ادا کیتا۔
