چیئرمین سینیٹ سید یوسف رضا گیلانی نال چینی کمپنی دے وفد دی ملاقات

اسلام آباد۔29جولائی (اے پی پی) چیئرمین سینیٹ سید یوسف رضا گیلانی نال پارلیمنٹ ہاؤس اچ تابانی گروپ تے عوامی جمہوریہ چین دے وݙے سرکاری انفراسٹرکچر تے سرمایہ کاری اداریں اچ شامل شینڈونگ ہائی سپیڈ گروپ کمپنی لمیٹڈ (ایس ڈی ایچ ایس) دے اعلیٰ سطحی وفد ملاقات کیتی۔ملاقات اچ پاکستان تے چین وچال اقتصادی تعاون کوں مزید ودھارا ݙیوݨ، انفراسٹرکچر، ٹرانسپورٹ، توانائی، لاجسٹکس، صنعتی ترقی تے ٻئے تزویراتی شعبیں اچ سرمایہ کاری دے نویں موقع تے تفصیلی ڳالھ مہاڑ کیتی ڳئی۔سینیٹ سیکرٹریٹ موجب شینڈونگ ہائی سپیڈ گروپ دے وفد دی قیادت ادارے دے چیئرمین شو ژیانگ کیتی جݙاں جو وفد اچ کنٹری ڈائریکٹر وانگ ژین رونگ تے تابانی گروپ دے چیئرمین حمزہ تابانی وی شامل ہن۔ وفد دا خیرمقدم کریندیں چیئرمین سینیٹ سید یوسف رضا گیلانی آکھیا جو پاکستان تے چین دی دوستی سانجھے اعتماد، احترام تے غیر متزلزل تعاون تے مبنی ہک لازوال تے آزمودہ رشتہ اے۔ انھاں آکھیا جو چین ہر اوکھے ویلھے پاکستان دا بھرپور ساتھ ݙتے تے پاکستانی عوام ایں مخلصانہ دوستی کوں بے حد قدر دی نگاہ نال ݙیہدن۔چیئرمین سینیٹ پاکستان دی اقتصادی ترقی اچ چینی کمپنیاں تے سرمایہ کاراں دے نمایاں کردار دی تعریف کریندے آکھیا جو انھاں دی سرمایہ کاری توں ملک اچ خوشحالی کوں ودھارا ملدا پئے، روزگار دے نویں موقع پیدا تھیندے پئن تے ݙوہیں ملکاں دے عوام کیتے پائیدار اقتصادی ترقی دا رستہ ہموار تھیندا پئے۔ انھاں چین-پاکستان اقتصادی راہداری (سی پیک) کوں ݙوہیں ملکاں وچال تزویراتی شراکت داری دا ہک تاریخی منصوبہ تے روشن مثال قرار ݙیندیں آکھیا جو سی پیک علاقائی رابطے، اقتصادی انضمام تے طویل المدتی ترقی کیتے مضبوط بنیاد ݙتی اے۔سید یوسف رضا گیلانی ایں اعتماد دا اظہار کیتا جو پاکستان تے چین وچال تجارت، سرمایہ کاری تے اقتصادی تعاون آندے سالاں اچ مزید وسعت اختیار کریسی جیں توں ݙوہیں ملکاں وچال تعلقات مزید مستحکم تھیسن تے مشترکہ خوشحالی کوں ودھارا ملسی۔ انھاں ایں عزم دا اعادہ کیتا جو پاکستان غیر ملکی سرمایہ کاری کیتے سازگار ماحول ݙیوݨ کیتے پرعزم اے تے چینی اداریں دی طرفوں پاکستان دی ترقی اچ دلچسپی دا خیرمقدم کریندے۔چیئرمین سینیٹ آکھیا جو خصوصی سرمایہ کاری سہولت کونسل (ایس آئی ایف سی) ہک اہم قومی اقدام اے جیں دا مقصد سرمایہ کاری دا ودھارا اقتصادی استحکام دا حصول تے عوام کیتے روزگار دے موقع پیدا کرݨا اے۔ انھاں آکھیا جو سینیٹ ایجھی پالیسیاں تے قانون سازی دی بھرپور حمایت جاری رکھیسی جو شفاف، سرمایہ کار دوست ماحول، پائیدار اقتصادی ترقی تے قومی خوشحالی کوں یقینی بݨاون۔وفد چیئرمین سینیٹ کوں شیڈونگ ہائی سپیڈ گروپ دی عالمی سرگرمیاں دا ݙسایا جو ادارہ ٹرانسپورٹ انفراسٹرکچر، تکھی رفتار ریل، ایکسپریس ویز، توانائی، لاجسٹکس تے صنعتی ترقی دے شعبیں اچ وسیع تجربہ رکھیندے۔ وفد پاکستان اچ اپݨی سرمایہ کاری کوں مزید وسعت ݙیوݨ دے وژن دا وی ݙسائے تے ملک دی اقتصادی ترقی اچ طویل المدتی شراکت داری دے ذریعے اپݨا کردار جاری رکھݨ دے عزم دا اظہار کیتا۔