وزیر اعظم شہباز شریف دی کویت دے وزیرِ خارجہ شیخ جراح جابر الاحمد الصباح نال ملاقات، کویت اتے ٻئے خلیجی ملکاں تے حملیاں دی مذمت

اسلام آباد۔29جولائی(اے پی پی)وزیراعظم محمد شہباز شریف کویت اتے ٻئے خلیجی ملکاں تے تھیوݨ والے حملیاں دی مذمت کریندے آکھیے جو پاکستان خطے اچ امن سانڳے ہک دیانتدار اتے مخلص ثالث تے سہولت کار دا کردار نٻھیندا پئے۔ انہاں اے ڳالھ اسلام آباد اچ ملݨ آئے کویت دے وزیرِ خارجہ شیخ جراح جابر الاحمد الصباح نال الیندے آکھی۔ ملاقات اچ نائب وزیراعظم و وزیرِ خارجہ سینیٹر محمد اسحاق ڈار، وفاقی وزراء دفاع، تجارت، قومی غذائی تحفظ و تحقیق، مواصلات، بحری امور اتے پٹرولیم، وزیراعظم دے مشیر اتے حکومت دے سینئر حکام وی موجود ہن۔ وزیراعظم کویتی وزیرِ خارجہ دا خیرمقدم کریندے امیرِ کویت شیخ مشعل الاحمد الجابر الصباح اتے ولی عہد شیخ صباح الخالد الحمد المبارک الصباح کیتے نیک تمناواں پچائن۔ انہاں پاکستان اتے کویت دے مشترکہ اقدار اتے باہمی اعتماد آلے دیرینہ  تعلقات تے الیندے آکھیا جو ݙوہائیں ملکاں ہر اوکھ اتے ݙکھ سکھ اچ ہمیشہ ہک ݙوڄھے دا ہتھ ونݙائے۔ وزیراعظم علاقائی صورتحال تے کویت دی قیادت اتے عوام نال یکجہتی ݙکھیندے جاری تنازعے ویلھے کویت اتے ٻئے خلیجی ملکاں تے تھیوݨ والے حملیاں دی مذمت کیتی۔ انھاں آکھیا جو پاکستان خطے اچ امن سانڳے ہک دیانتدار اتے مخلص ثالث تے سہولت کار دے طور تے اپݨا کردار ادا کریندا پئے۔ وزیراعظم ݙوہائیں ملکاں وچال تعلقات دی مثبت پیشرفت تے اطمینان کریندے تجارت، سرمایہ کاری، توانائی، زراعت، انفارمیشن ٹیکنالوجی، بحری امور اتے افرادی قوت دی ترقی سودھا مختلف شعبیاں اچ کویت نال تعاون دا عزم دوہرائے۔ انھاں پاکستانیاں دی ودھ میزبانی تے کویتی حکومت دی تعریف کریندے کویت دی سماجی اتے معاشی ترقی اچ پاکستانی کمیونٹی دے قیمتی کردار کوں وی خراجِ تحسین پیش کیتے۔

وزیرِ خارجہ شیخ جراح جابر الاحمد الصباح وزیراعظم کوں کویتی ولوں نیک خواہشات دا سنیہا ݙتے اتے باہمی مفاد دے سارے شعبیاں اچ ݙوطرفہ تعاون ٻیا تکرا کرݨ سانڳے کویت دی سک ݙسائی۔ انھاں خطے اچ جاری بحران دے حل اتے خطے اچ امن دی بحالی کیتے مذاکرات اتے سفارتکاری ودھاوݨ کیتے پاکستان دے کردار دی تعریف کیتی اتے کویت نال یکجہٹی ݙکھاوݨ تے پاکستان دی قیادت اتے عوام دا وی شکریہ ادا کیتے۔ ݙوہائیں رہنماواں باہمی دلچسپی دے امور خصوصاً ݙوطرفہ تعلقات سانڳے مسلسل مشاورت اتے قریبی رابطیاں دی اہمیت تے زور ݙتا اتے اتفاق کیتے جو انہاں معاملیاں تے پیشرفت کیتے مستقبل قریب اچ اعلیٰ سطح وفود دا تبادلہ کیتا ویسی۔