دانش اتھارٹی بورڈ دا پہلا اجلاس، وزیر اعظم دی سارے ٻݨݨ آلے دانش سکولاں کوں مقررہ ویلھے تے مکمل کرݨ دی ہدایت

اسلام آباد۔29جولائی(اے پی پی)وزیراعظم محمد شہباز شریف معاشی طور تے کمزور ٻالاں کوں ہکو سویں تعلیم اتے ترقی دے مواقع ݙیوݨ اپݨی ترڄیح قرار ݙیندے سختی نال ہدایت کیتی اے جو سارے ٻݨݨ آلے دانش سکولاں کوں مقررہ ویلھے تے مکمل کیتا ونڄے۔ او اسلام آباد اچ دانش اتھارٹی بورڈ دے پہلے اجلاس دی اڳواݨی کریندے پئے ہن۔ وزیراعظم دانش اتھارٹی بورڈ دی ذمہ واری نٻھاوݨ تے ارکان دا شکریہ ادا کریندے آکھیے جو معاشی طور تے کمزور ٻالاں کوں یکساں تعلیم اتے ترقی دے مواقع ݙیوݨ حکومت دی ترجیح اے، دانش سکولز دی بنیاد ایں فلسفے تے ٹردے ہوئے رکھی اے جیندے اچ غریب اتے مستحق طلباء کوں میرٹ تے داخلہ اتے تعلیم ݙتی ویندی اے۔ انہاں ٻݨݨ آلے سارے دانش سکولاں کوں ویلھے تے مکمل کرݨ اتے نویں دانش سکولز اچ طلباء و طالبات کیتے سو فیصد بورڈنگ دی سہولت ݙیوݨ دی وی ہدایت کیتی۔ وزیراعظم آکھیا جو وزارتِ انفارمیشن ٹیکنالوجی دے تعاون نال دانش سکولز اچ آئی ٹی، مصنوعی ذہانت، روبوٹکس اتے عصری تقاضیاں نال ہم آہنگ ٹیکنالوجیز دی ٹریننگ نصاب دا لازمی جزو قرار ݙتیاں ونڄن، نصاب اچ پراجیکٹ اتے سکل بیسڈ لرننگ دے نال نال طالب علماں دی شخصیت نکھارݨ کیتے وی کورسز پاتے ونڄن۔ اجلاس اچ دانش سکولز اتھارٹی دی حالیہ پیش رفت اتے کارکردگی تے جائزہ رپورٹ پیش کیتی ڳئی۔ اجلاس اچ ݙسایا ڳیا جو ایں ویلھے پورے ملک اچ 29 دانش سکولز مجوزہ ہین جنھاں اچوں 15 منظور اتے 13 تے کم جاری اے، دانش سکول کری اسلام آباد اچ کلاسز شروع تھی چکین۔ بورڈ اجلاس کوں ݙسایا ڳیا جو آزاد کشمیر دے باغ اتے بھمبر، گلگت بلتستان دے گانچھے، سلطان آباد اتے استور اچ دانش سکولز دی تعمیر دسمبر تئیں مکمل تھی ویسی اتے کلاسز اپریل 2027ء توں شروع تھیسن۔ دانش اتھارٹی بورڈ دانش سکولاں دے اساتذہ دی تربیت کیتے بین الاقوامی معیار دا ٹیچرز ٹریننگ انسٹیٹیوٹ قائم کرݨ دی منظوری ݙتی۔ اجلاس کوں دانش اتھارٹی دے مجوزہ انتظامی ڈھانچے تے وی بریفنگ ݙتی ڳئی۔ وزیراعظم ہدایت کیتی جو اتھارٹی دے انتظامی ڈھانچے کوں مختصر رکھیا ونڄے اتے ایںدے تے گھٹ توں گھٹ وسائل خرچ کیتے ونڄن۔ بورڈ اجلاس دانش سکول اتھارٹی رولز، منیجنگ ڈائریکٹر رولز اتے ٻیاں قواعد دی اصولی منظوری ݙتی جیںدے بعد ضابطے دی ضروری کارروائی مکمل کیتی ویسی۔ اجلاس دانش سکولاں کوں الاٹ کیتی ڳئی ساری زمین دانش سکول اتھارٹی دے ناویں منتقل کرݨ دی وی منظوری ݙتی۔