یورپ کیتے انسانی سمگلنگ اچ 47 فیصد ڳھٹکی آئی اے: وفاقی وزیرِ داخلہ محسن نقوی

اسلام آباد۔30جولائی (اے پی پی) وفاقی وزیرِ داخلہ محسن نقوی آکھیا جو وفاقی حکومت دی موثر حکمتِ عملی تے یورپی ملکاں دے نال اشتراکِ عمل دے نتیجے اچ ہک سال دے دوران یورپ کیتے انسانی سمگلنگ دی شرح اچ 47 فیصد دی نمایاں ڳھٹکی ریکارڈ کیتی ڳئی اے، جئیں تے یورپی یونین وی وزارتِ داخلہ دے اقدامات کوں سراہیا اے۔ حکومت انسانی سمگلنگ تے غیر قانونی نقل و حمل دی روک تھام کیتے زیرو ٹالرنس پالیسی تے سختی نال عمل پیرا اے اتے تمام ادارے ایں نیٹ ورک دے خاتمے کیتے مربوط انداز اچ کم کریندے پئن۔ انسانی سمگلنگ تے غیر قانونی نقل و حمل دی روک تھام دے عالمی ݙینہہ دے موقع تے آپݨے خصوصی سنیھے اچ وفاقی وزیرِ داخلہ محسن نقوی آکھیا جو انسانی سمگلنگ ہک سنگین بین الاقوامی جرم اتے انسانیت دے خلاف ظلم اے اتے معصوم جاناں دے استحصال اچ ملوث عناصر کہیں رعایت دے مستحق نئی۔ انھاں آکھیا جو بین الاقوامی تعاون تے جدید ٹیکنالوجی دے استعمال نال سرحدی نگرانی تے امیگریشن نظام کوں مزید موثر بݨایا ڳئے جئیں دے مثبت تے حوصلہ افزاء نتائج سامنے آندے پئن۔ محسن نقوی ایں ڳالھ تے زور ݙتا جو پاکستان انسانی سمگلنگ دے خاتمے کیتے عالمی کوششاں دا بھرپور حصہ اے اتے ایں سلسلے اچ عوامی آگاہی وقت دی اہم ضرورت اے۔ آپݨے سنیھے دے اختتام تے انھاں عزم دا اعادہ کیتا جو اساں اج انسانی سمگلنگ دے خلاف متحد تھی تے ہک محفوظ تے باوقار معاشرے دی تشکیل اچ آپݨا بھرپور کردار ادا کریسوں۔