اے آئی دی مہارت رکھݨ آلے لوک مستقبل دی افرادی قوت دی قیادت کریسن، وفاقی وزیر انفارمیشن ٹیکنالوجی شزہ فاطمہ

اسلام آباد۔30جولائی(اے پی پی) وفاقی وزیرانفارمیشن ٹیکنالوجی و ٹیلی کمیونیکیشن شزہ فاطمہ خواجہ آکھیا جو ٹیکنالوجی انساناں دیاں نوکریاں دی جاہ نہ گھنسی بلکہ او لوک جیڑھے مصنوعی ذہانت تے ابھردی ہوئی ٹیکنالوجیز کوں موثر انداز اچ استعمال کرݨ جاݨدن، مستقبل دی افرادی قوت دی قیادت کریسن۔ یو این ویمن دے زیرِ اہتمام ’’جینڈر رسپانسیو اے آئی سکول: شمولیتی تے ذمہ دار مصنوعی ذہانت دا ودھارا ‘‘ دے عنوان نال منعقدہ تقریب نال خطاب کریندیں انھاں اے ڳالھ کیتی۔ ایں تقریب دا انعقاد وزارتِ انفارمیشن ٹیکنالوجی و ٹیلی کمیونیکیشن یو این ویمن دے اشتراک نال کیتا۔شزہ فاطمہ آکھیا جو پاکستان کوں مصنوعی ذہانت تے مبنی دور کیتے اپݨی افرادی قوت کوں تیار کرݨا ہوسی جیں کیتے ملک اچ مصنوعی ذہانت دی تعلیم تے ٹیکنالوجی دی تربیت کوں ودھارا ݙیوݨ ناگزیر اے۔ انھاں آکھیا جو اے آئی دی تعلیم ہݨ صرف کمپیوٹر سائنس دے طلبہ تئیں محدود نی رہݨی چاہیدی بلکہ اے ہر شعبے نال تعلق رکھݨ آلے طلبہ تے پیشہ ور لوکاں کیتے ہک بنیادی مہارت بݨ چکی اے۔وفاقی وزیر آکھیا جو حکومت ایں ڳالھ کوں یقینی بݨاوݨ کیتے کم کریندی پئی اے جو اے آئی متعلق علم تے جدید ٹیکنالوجی دے وسائل صرف ٹیکنالوجی دے شعبے تئیں محدود نہ رہن بلکہ غیر تکنیکی شعبیں نال تعلق رکھݨ آلے لوک وی انھاں توں فیدہ چا سڳن۔ انھاں آکھیا جو ڈاکٹراں، وکلاء، انتخابی عملے سودھے ہر شعبے دے پیشہ ور لوکاں کوں ٹیکنالوجی دی تبدیلی موجب اپݨے آپ کوں ڈھالݨا ہوسی۔وفاقی وزیر آکھیا جو پاکستان موبائل انٹرنیٹ دے استعمال اچ صنفی فرق گھٹ کرݨ اچ نمایاں کامیابی حاصل کیتی اے۔ انھاں موجب اے فرق 2024 اچ تقریباً 38 فیصد ہئی، جیڑھا 2025 اچ 25 فیصد تے 2026 دی جی ایس ایم اے رپورٹ موجب مزید گھٹ تھی تے صرف 8 فیصد رہ ڳئے۔ انھاں ایں کوں دنیا اچ ڈیجیٹل صنفی فرق اچ تھیوݨ آلی تکھی ترین کمی اچوں ہک قرار ݙتا تاں جوانھاں آکھیا جو ایں پیشرفت دے باوجود ایس ٹی ای ایم (STEM) تعلیم اچ چھوہریں دی شرکت ہݨ وی محدود اے، جئیں پاروں اے آئی ٹیکنالوجیز دی تیاری تے ترقی اچ انھاں دی نمائندگی گھٹ اے۔تریمتاں دی ڈیجیٹل شمولیت کیتے حکومتی اقدامات دا ذکر کریندیں وفاقی وزیر آکھیا جو گزریل ݙو سالاں دے دوران پاکستان ٻہوں سارے اہم اقدامات کیتن۔ انھاں آکھیا جو وزیراعظم شہباز شریف دے فیصلے دے تحت رمضان سبسڈی دی روایتی تقسیم کوں یوٹیلٹی سٹورز دی بجائے ڈیجیٹل ادائیگیاں دے ذریعے ممکن بݨایا ڳیا جیں توں مالی شمولیت کوں نمایاں ودھارا ملیا۔ اے منصوبہ وزارتِ آئی ٹی، پاکستان ٹیلی کمیونیکیشن اتھارٹی، نادرا، بینظیر انکم سپورٹ پروگرام تے نجی شعبے دے سانجھے تعاون نال وزیراعظم دی قیادت اچ کامیابی نال نافذ کیتا ڳئے۔شزہ فاطمہ آکھیا جو پروگرام دے آغاز دے صرف ہک مہینے دے اندر 8 لکھ توں ودھ تریمتاں ڈیجیٹل والٹس کھولئے۔ انھاں آکھیا جو جتھاں ماضی دے رمضان پیکیج دے تحت 16 ارب روپے ونڈئے ڳئن ،اُتھاہیں اڄوکے پروگرام دے ذریعے تریمت مستحقین کوں 38 ارب روپے ڈیجیٹل والٹس دے ذریعے ݙتے ڳئن۔