پاکستان کوں لائیڈز جوائنٹ وار کمیٹی دے لسٹڈ ایریاز توں کڈھ ݙتا ڳئے، وفاقی وزیرجنید انوار چوہدری

اسلام آباد۔30جولائی (اے پی پی) وفاقی وزیربحری امور محمد جنید انوار چوہدری آکھیا جو وزیراعظم دے ویژن تے فیلڈ مارشل دی رہنمائی اچ پاکستان دے میری ٹائم سیکٹر ہک اہم تے تاریخی کامیابی حاصل کیتی اے، پاکستان تے ایں دی سمندری حدود کوں لائیڈز مارکیٹ ایسوسی ایشن دی جوائنٹ وار کمیٹی دے لسٹڈ ایریاز توں خارج کر ݙتا ڳئے۔آپݨے ھک بیان اچ وفاقی وزیر آکھیا جو 13 مارچ 2026 کوں اے معاملہ سامݨے آیا جو پاکستان تے ایں دی سمندری حدود کئی ݙہاکیں توں جوائنٹ وار کمیٹی دے لسٹڈ ایریاز اچ شامل ہن جیں پاروں ملکی شپنگ تے تجارت کوں اضافی وار رسک انشورنس پریمیم تے سرچارجز دا سامݨا ہئی۔انھاں آکھیا جو وزیراعظم ایں اہم معاملے دے حل کیتے انھاں دی سربراہی اچ خصوصی کمیٹی قائم کیتی جیں مسلسل محنت کریندیں لائیڈز لندن دے حکام دے نال تفصیلی مذاکرات کیتے، رمضان المبارک دے دوران وی افطار دے بعد کئی کئی گھنٹے طویل اجلاس منعقد تھئے جنھاں اچ پاکستان دا موقف تکنیکی شواہد تے ٹھوس حقائق دے نال پیش کیتا ڳیا۔جنید انوار چوہدری آکھیا جو مسلسل مذاکرات تے کوششاں دے نتیجے اچ پاکستان تے ایں دی سمندری حدود کوں جوائنٹ وار کمیٹی دے لسٹڈ ایریاز توں ہٹا ݙتا ڳئے جیں توں غیر ضروری وار رسک انشورنس پریمیم تے اضافی سرچارجز اچ کمی ہوسی، شپنگ اخراجات گھٹ ہوسن تے عالمی شپنگ کمپنیاں، تاجراں تے سرمایہ کاراں دا اعتماد ودھسی۔انھاں آکھیا جو ایں فیصلے توں کراچی پورٹ، پورٹ قاسم تے گوادر پورٹ عالمی شپنگ کمپنیاں تے سرمایہ کاراں کیتے مزید پرکشش تجارتی مرکز بݨسن جݙاں جو عالمی تے علاقائی تجارت، کارگو ٹرانزٹ تے ٹرانس شپمنٹ دے نویں موقع پیدا تھیسن۔ اضافی سرچارج دا ٻوجھ گھٹ تھیوݨ نال پاکستانی برآمدات کوں عالمی منڈیاں اچ مسابقتی برتری حاصل کرݨ اچ وی مدد ملسی۔انھاں کمیٹی دے سارے ارکان، متعلقہ اداریں تے شراکت داراں دا شکریہ ادا کریندیں آکھیا جو اے کامیابی پاکستان کوں خطے دا مضبوط لاجسٹکس، ٹرانزٹ تے ٹرانس شپمنٹ ہب بݨاوݨ دے پاسے اہم قدم اے۔ جنید انوار چوہدری آکھیا جو حکومتِ پاکستان میری ٹائم سیکٹر کوں مزید محفوظ، جدید، موثر تے عالمی معیار نال ہم آہنگ بݨاوݨ، بندرگاہواں دی استعداد ودھاوݨ تے سرمایہ کاری ودھاوݨ کیتے اپݨی کوششاں پوری قوت نال جاری رکھیسی۔