ہیلتھ کیئر دا مقصد صرف ہسپتال بݨاوݨ نئیں، انسان کوں بیمار تھیوݨ توں بچاوݨ اے، وفاقی وزیرِ صحت

ملتان۔31 جولائی (اے پی پی) وفاقی وزیرِ صحت سید مصطفیٰ کمال آکھیا جو ملتان یونیورسٹی آف سائنس اینڈ ٹیکنالوجی اچ عالمی معیار دیاں سہولیات، جدید ٹیکنالوجی تے تحقیق تے مبنی ماحول قابلِ تحسین اے، ایہوجہے ادارے مایوسی دے ماحول کوں مکاوݨ تے جواناں اچ امید پیدا کرݨ دا ذریعہ بݨدن۔ ملتان یونیورسٹی آف سائنس اینڈ ٹیکنالوجی اچ سکول آف نرسنگ اینڈ الائیڈ ہیلتھ سائنسز دی افتتاحی تقریب نال خطاب کریندیں ہوئیں انھاں یونیورسٹی انتظامیہ کوں مبارکباد پیش کیتی اتے آکھیا جو انھاں کوں آپݨے منصب دی وجہ توں ملک بھر توں مختلف نوعیت دیاں معلومات ملدی رہندن۔ جݙاں کݙاہیں ماحول اچ مایوسی محسوس تھیوے تاں ملتان یونیورسٹی آف سائنس اینڈ ٹیکنالوجی جہیں اداریاں کوں ݙیکھݨاں چاہیدے جتھاں مثبت سوچ، محنت تے مستقبل دی امید نظر آندی اے۔ انھاں آکھیا جو یونیورسٹی دا ماحول انھاں کوں ٻہوں پسند آیا، اتھاں عالمی معیار دی کئی سہولیات تے جدید ٹیکنالوجی موجود اے۔ اللہ تعالیٰ ایں ویلھے ایہوجہے کماں اچ کامیابی عطا کریندے جݙاں نیت صاف تے جذبہ مضبوط ہووے۔ انھاں آکھیا جو ایہوجہے ادارے قائم کرݨ کیتے غیر معمولی محنت تے جنون درکار ہوندے جو انھاں کوں اتھاں واضح طور تے محسوس تھیا۔ وفاقی وزیر آکھیا جو دنیا اچ کہیں وی شعبے اچ ہک ایہوجہا معیار قائم کرݨ ضروری اے جئیں کوں ٻئے لوگ فالو کرن۔ اگر مستقبل اچ ٻیاں یونیورسٹیاں وی ملتان یونیورسٹی آف سائنس اینڈ ٹیکنالوجی دے ماڈل کوں اپنیندن ہن تاں ایں دا کریڈٹ ایں ادارے دی انتظامیہ کوں وی ملسی۔مصطفیٰ کمال آکھیا جو پاکستان اچ ہر سال تقریباً 6.7 ملین ٻالاں دی پیدائش تھیندی اے جبکہ دورانِ حمل، زچگی تے ایں نال متعلقہ پیچیدگیاں دے باعث سالانہ تقریباً 11 ہزار عورتاں جان دی بازی ہار ویندن۔ انھاں آکھیا جو پنج سال توں گھٹ عمر ٻالاں دیاں اموات وی ہک ٻہوں وݙا چیلنج اے۔مصطفیٰ کمال آکھیا جو او بئے لوکاں تے متعلقہ حکام کوں ملتان یونیورسٹی آف سائنس اینڈ ٹیکنالوجی دا دورہ کرݨ دی ترغیب ݙیسن تانجو آو اتھاں موجود سہولیات تے جدید نظام کوں ݙیکھن تے انھاں توں سکھن۔