عوام کوں ایندھن دی بلاتعطل فراہمی تے منصفانہ قیمتاں کوں یقینی بݨاوݨ حکومت دی اولین ترجیح اے، وزیراعظم شہباز شریف دا اوگرا اچ اصلاحات بارے اجلاس نال خطاب

اسلام آباد۔31جولائی (اے پی پی) وزیراعظم محمد شہباز شریف حکومت دے اصلاحاتی ایجنڈے دا تمام اداروں اچ یکساں طور تے نفاذ یقینی بݨاوݨ تے ایف بی آر دے جدید ٹریکنگ نظام کوں ماڈل بݨا تے ملک اچ ایندھن دی آمدورفت دی کڑی نگرانی دا نظام وضع کرݨ دی ہدایت کریندیں ہوئیں آکھیا جو عوام کوں ایندھن دی بلاتعطل فراہمی تے منصفانہ قیمتاں کوں یقینی بݨاوݨ حکومت دی اولین ترجیح اے۔ وزیراعظم محمد شہباز شریف دی صدارت جمعہ کوں آئل اینڈ گیس ریگولیٹری اتھارٹی (اوگرا) اچ اصلاحات تے ادارہ جاتی استعداد اچ بہتری دے حوالے نال اعلیٰ سطحی اجلاس تھیا۔ وزیراعظم آفس دے میڈیا ونگ دی طرفوں جاری بیان دے مطابق اجلاس نال خطاب کریندیں ہوئیں وزیراعظم ہدایت کیتی جو حکومت دے اصلاحاتی ایجنڈے دا تمام اداریاں اچ یکساں طور تے نفاذ یقینی بݨایا ونڄے، ایف بی آر دے جدید ٹریکنگ نظام کوں ماڈل بݨا تے ملک اچ ایندھن دی آمدورفت دی کڑی نگرانی دا نظام وضع کیتا ونڄے۔ انھاں جدید ٹیکنالوجی تے سافٹ ویئر دے استعمال دے ذریعے بندرگاہواں تے ریفائنریز توں پٹرول پمپاں تک سپلائی چین دی ڈیجیٹل نگرانی تے اوگرا دی استعداد ودھاوݨ کیتے نجی شعبے توں چنڳی شہرت دے ماہرین تعینات کرݨ دی وی ہدایت کیتی۔ وزیراعظم آکھیا جو اوگرا دی تنظیمِ نو کر تے ہر شعبے تے منصب کیتے ماہرین دی میرٹ تے شفاف طریقہ کار نال تعیناتی کیتی ونڄے، اوگرا اچ اصلاحات تے تنظیمِ نو کیتے حکومت ہر قسم دی پیشہ ورانہ مہارت فراہم کریسی۔ وزیراعظم آکھیا جو حکومت عوام دی ہک ہک پائی دا تحفظ کریسی، کہیں کوں عوام دے استحصال تے سسٹم اچ مداخلت دی اجازت نہ ݙیسوں۔ انھاں تمام ریگولیٹری اداریاں کوں اپنی متعلقہ وزارتاں نال باضابطہ رابطہ قائم کرݨ کیتے ضروری اقدامات کرݨ دی ہدایت کریندیں ہوئیں آکھیا جو منظور شدہ پالیسی دے تحت ملک اچ قائم آئل ریفائنریز دی اپ گریڈیشن تے کم تیز کیتا ونڄے۔ اجلاس اچ چیئرمین اوگرا ادارے دی موجودہ کارکردگی، درپیش چیلنجز تے جامع اصلاحاتی پروگرام تے تفصیلی بریفنگ ݙتی۔ اجلاس کوں ݙسایا ڳیا جو اوگرا تیل دی سپلائی چین کوں بندرگاہ توں پٹرول پمپ تک ڈیجیٹل نظام دے ذریعے مانیٹر کرݨ کیتے اہم پیش رفت کیتی اے، قومی مانیٹرنگ ڈیش بورڈ، ٹینکر ٹریک اینڈ ٹریس سسٹم، ڈپو – ٹینک ٹیلی میٹری، راہگزر موبائل ایپ، پٹرول پمپاں تے ڈیجیٹل سیلز انٹری سسٹم تے مرکزی مانیٹرنگ سیل جہیں متعدد ڈیجیٹل نظام فعال کیتے ڳئن جنھاں دے ذریعے پٹرولیم مصنوعات دی نقل و حرکت، ذخائر تے فروخت دی موثر نگرانی ممکن بݨائی ویندی پئی اے۔ وزیراعظم کوں آگاہ کیتا ڳیا جو جولائی 2026ء دے دوران ڈیٹا تے مبنی خصوصی مہم دے نتیجے اچ ذخیرہ اندوزی، سپلائی اچ غیر ضروری رکاوٹاں تے ٻیاں خلاف ورزیاں دے متعدد واقعات دی نشاندہی کیتی ڳئی جنھاں تے شوکاز نوٹسز، وضاحت طلبی تے ٻیاں قانونی کارروائیاں عمل اچ آندیاں ڳئیاں۔ اجلاس اچ اوگرا دے جامع اصلاحاتی پروگرام تے وی بریفنگ ݙتی ڳئی جئیں اچ ادارے دی ڈیجیٹلائزیشن، انفورسمنٹ نظام دی ازسرِ نو تشکیل، کمپلائنس ونگ دے قیام، لائسنسنگ نظام اچ اصلاحات، قانونی امور دے موثر انتظام، مالی وسائل دی مضبوطی تے ادارہ جاتی ڈھانچے دی تنظیمِ نو شامل اے۔ وزیر اعظم اوگرا ولوں پیش کیتے ڳئے اصلاحاتی پروگرام کوں سراہیندیں ہوئیں ہدایت کیتی جو تیل تے گیس دے شعبے اچ مکمل شفافیت، موثر نگرانی، ذخیرہ اندوزی تے ناجائز منافع خوری دے خاتمے کیتے جدید ڈیجیٹل نظام کوں جلد از جلد مکمل طور تے فعال بݨایا ونڄے۔ انھاں آکھیا جو عوام کوں ایندھن دی بلاتعطل فراہمی تے منصفانہ قیمتاں دی یقینی فراہمی حکومت دی اولین ترجیح اے اتے ایں مقصد کیتے کہیں قسم دی غفلت یا بدعنوانی برداشت نہ کیتی ویسی۔ وزیراعظم متعلقہ وزارتاں تے اداریاں کوں ہدایت کیتی جو اوگرا دی اصلاحات تے ادارہ جاتی استعداد اچ اضافے کیتے درکار قانونی، انتظامی تے پالیسی اقدامات تے ترجیحی بنیاداں تے پیش رفت یقینی بݨائی ونڄے تانجو ریگولیٹری نظام کوں مزید موثر، شفاف تے جدید تقاضیاں نال ہم آہنگ بݨایا ونڄ سڳے۔ اجلاس اچ نائب وزیراعظم تے وزیرِ خارجہ سینیٹر محمد اسحاق ڈار، وفاقی وزرا اعظم نذیر تارڑ، ڈاکٹر مصدق ملک، احد خان چیمہ، عطاء اللہ تارڑ، شزہ فاطمہ خواجہ، علی پرویز ملک، معاونِ خصوصی طارق باجوہ تے متعلقہ اعلیٰ حکام شرکت کیتی۔