ملک گیر چیمبرز آف کامرس تے ٹریڈ ایسوسی ایشنز دے انتخابات کوں شفاف، منصفانہ تے قابلِ اعتماد انداز اچ منعقد کیتا ونڄے، وفاقی وزیرِ تجارت جام کمال خان

اسلام آباد۔31جولائی (اے پی پی) وفاقی وزیرِ تجارت جام کمال خان ڈائریکٹر جنرل ٹریڈ آرگنائزیشنز کوں ہدایت کیتی اے جو آندے ملک گیر چیمبرز آف کامرس تے ٹریڈ ایسوسی ایشنز دے انتخابات کوں تکڑی نگرانی، ڈیجیٹلائزیشن تے ادارہ جاتی اصلاحات دے ذریعے شفاف، منصفانہ تے قابلِ اعتماد انداز اچ منعقد کیتا ونڄے۔ وزارت توں جاری بیان موجب ڈائریکٹر جنرل ٹریڈ آرگنائزیشنز بلال خان پاشا توں 2026–28ء دے تجارتی اداریں دے انتخابات دیاں تیاریاں تے تفصیلی بریفنگ حاصل کرݨ دے بعد اپݨے ویڈیو پیغام اچ ڳالھ کریندے وفاقی وزیر آکھیا جو حکومت تجارتی ادارہں دے انتظامی ڈھانچے کوں مضبوط بݨاوݨ تے ایں امر کوں یقینی بݨاوݨ کیتے پرعزم اے جو انتخابی عمل شفافیت، جوابدہی تے انصاف دے اعلیٰ ترین معیارات دی عکاسی کرے۔جام کمال خان آکھیا جو پارلیمنٹ دی طرفوں ٹریڈ آرگنائزیشنز ایکٹ اچ ترامیم دی منظوری دے بعد ضابطہ جاتی فریم ورک کوں موثر بݨاوݨ تے تجارتی اداریں دی کارکردگی بہتر بݨاوݨ کیتے اہم اصلاحات متعارف کروائیاں ڳئن۔ انھاں مزید آکھیا جو وزارتِ تجارت، ڈی جی ٹی او کوں ایں دے آپریشنز کوں جدید تے ڈیجیٹل بݨاوݨ کیتے مکمل ادارہ جاتی معاونت ݙیندی پئی اے تاں جو او انتخابات دے دوران تے ایں دے بعد وی چیمبرز تے ٹریڈ ایسوسی ایشنز کوں زیادہ موثر انداز اچ سہولت ݙے سڳے۔جام کمال ڈی جی ٹی او کوں ہدایت کیتی جو انتخابی انتظام دے ڈیجیٹل نظام کوں تکھی رفتارنال ودھارا ݙتا ونڄے جیں کیتے وزارت دی ویب سائٹ تے ہک مخصوص انتخابی پورٹل قائم کیتا ونڄے جیں اچ انتخابی شیڈول، متعلقہ قوانین و قواعد، نوٹیفکیشنز، ووٹرفہرستاں، انتخابی نتائج تے ٻئے متعلقہ معلومات سٹیک ہولڈرز کیتے دستیاب ہوون۔ انھاں ڈی جی ٹی او کوں اے وی ہدایت ݙتی جو ملک اچ انتخابی سرگرمیاں دی حقیقی ویلھے اچ نگرانی کیتے ہک ڈیجیٹل ڈیش بورڈ تیار کیتا ونڄے تے سارے تجارتی اداریں کوں ہدایت کیتی جو او انتخابی شیڈول، ووٹر فہرستاں تے انتخابی نتائج سافٹ کاپی دی صورت اچ جمع کراون تاں جو موثر ڈیجیٹل انتظام تے نگرانی ممکن بݨائی ونڄ سڳے۔شفافیت تے معلومات تئیں مساوی رسائی تے زور ݙیندیں وزیر ہدایت کیتی جو حتمی ووٹر فہرستاں ٹریڈ آرگنائزیشنز ایکٹ تے قواعد موجب شائع کیتیاں ونڄن تے جامع معیاری عملی طریقہ کار (ایس او پیز) جاری کیتے ونڄن تاں جو سارے تجارتی اداریں اچ انتخابی طریقہ کار تے ھکو سواں عملدرآمد یقینی بݨایا ونڄ سڳے۔جام کمال خان آکھیا جو پہلی وار ڈی جی ٹی او کوں انتخابی نگرانی کیتے اضافی افرادی قوت ݙتی ڳئی اے۔ وزارتِ تجارت، ٹریڈ ڈویلپمنٹ اتھارٹی آف پاکستان، سٹیٹ لائف انشورنس کارپوریشن تے ٻئے سرکاری اداریں دے افسران انتخابات دے دوران آزاد مبصرین تے گواہیں دے طور تے خدمات انجام ݙیسن تان جو شفافیت کوں ودھارا ݙتا ونڄ سڳے تے بعد اچ ملݨ آلیاں شکایتاں یا اپیلاں کیتے قابلِ اعتماد دستاویزی شواہد ݙتے ونڄ سڳن۔وزیرِ تجارت آکھیا جو وزارت صوبائی حکام نال رابطے اچ اے تاں جو انھاں ٻہوں وݙے پولنگ جہیں تے، جتھاں ووٹراں دی زیادہ تعداد متوقع اے، مناسب انتظامی تے سکیورٹی معاونت کوں یقینی بݨایا ونڄ سڳے تاں جو انتخابی ماحول پرامن تے منظم رہے۔ انھاں چیمبرز تے ٹریڈ ایسوسی ایشنز دی حوصلہ افزائی کیتی جو او مضبوط نگرانی دے نظام تے ڈیجیٹل ذرائع دے زیادہ استعمال دے ذریعے اپݨے اندرلے انتخابی انتظامی نظام کوں جدید بݨاون۔ انھاں آکھیا جو شفاف تے مکمل دستاویزی انتخابی عمل، انتخابات دے بعد پیدا تھیوݨ آلے جھیڑے تے اپیلاں اچ نمایاں کمی گھن آسی۔ایں توں پہلے، ڈی جی ٹی او بلال خان پاشا وزیر کوں بریفنگ ݙیندیں ݙسایا جو چیمبرز آف کامرس تے ٹریڈ ایسوسی ایشنز دے انتخابات دا عمل شروع تھی چکیے تے اے 30 ستمبر 2026ء تئیں جاری رہسی جݙاں جو فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) دے انتخابات یکم اکتوبر توں شروع تھی تے 31 دسمبر 2026ء تئیں مکمل تھیسن۔