ایں سال سکیورٹی فورسز دے پورے ملک اچ 40 ہزار 348 توں ودھ انٹیلی جنس بیسڈ آپریشن، 2 ہزار 84 دہشتگرد ماریے ڳئن، ڈی جی آئی ایس پی آر لیفٹیننٹ جنرل احمد شریف چوہدری دی پریس کانفرنس

راولپنڈی۔31جولائی (اے پی پی) پاک فوج دے شعبہ تعلقاتِ عامہ (آئی ایس پی آر) دے ڈائریکٹر جنرل لیفٹیننٹ جنرل احمد شریف چوہدری آکھیے جو 2026ء اچ سکیورٹی فورسز ملک بھر اچ 40,348 توں ودھ انٹیلی جنس بیسڈ آپریشن کیتن جنھاں اچ 2084 دہشت گرد ہلاک تھئن، ایں دوران بلوچستان اچ 31,080 توں ودھ آپریشن کیتے ڳئن، خیبرپختونخوا اچ 7,177 اتے ملک دے باقی حصیاں اچ 2,091 آپریشن تھئن۔ ملک بھر اچ دہشت گردی دے کل 3,145 واقعات تھئن جنھاں اچوں 1,971 خیبر پختونخوا، 1,148 بلوچستان اتے 26 ملک دے ٻئے حصیاں توں رپورٹ تھئن، ایں دوران 2,084 دہشتگرد مارے ڳئن، اے تناسب اوسطاً روزانہ 10 دہشت گرداں دے مارے ونڄݨ دا ہے جیڑھا ہݨ تئیں دا سب توں ودھ تناسب اے۔ اپݨی پریس کانفرنس اچ ڈائریکٹر جنرل آئی ایس پی آر لیفٹیننٹ جنرل احمد شریف چوہدری آکھیے جو سکیورٹی فورسز روزانہ تقریباً 200 انٹیلی جنس تے مبنی آپریشن کریندیاں پئن جیندی روزانہ اوسط 194 ٻݨدی اے، ایں سال دہشت گردی دے حملیاں اچ 819 پاکستانی شہید تھئن، انھاں اچ 303 آرمی اہلکار، 194 دا تعلق قانون نافذ کرݨ والے اداریاں نال ہئی جنھاں اچ پولیس اتے سول آرمڈ فورسز شامل ہن ڄݙاں جو 322 عام شہری وی شہید تھئن۔ ڈی جی آئی ایس پی آر ݙسایا جو ایں سال کل 28 خودکش دھماکے تھئن، خودکش بمباراں دی اکثریت افغان شہری ہن، ٹانک دے حالیہ واقعے اتے کراچی دے واقعے اچ وی افغان شامل ہن۔ پچھلے سال دا ݙسیندے انہاں آکھیا جو 2025ء اچ 2,597 دہشتگرد مارے ڳئن، ایں سال ہݨ تک 2,084 دہشت گرد مارے ڳئن اتے ایں سال حالی وی 5 مہینے باقی ہین۔ انھاں آکھیا جو دہشت گردی دا مقابلہ کرݨ دا حرکیاتی پہلو پہلے توں تکڑا تھیندا پئے، جیکر 2023ء کوں ݙٹھا ونڄے تاں ساݙے شہدا اتے مارے ونڄݨ والے دہشت گرداں دا تناسب ناموافق ہئی، کیوں جو ساݙے اہلکاراں دیاں قربانیاں دے مقابلے اچ ٻہوں گھٹ دہشت گرداں کوں ختم کیتا ڳیا، انہاں دہشت گرداں اتے انھاں دے سرپرستاں کوں ہݨ احساس تھی ڳئے جو خوشامد یا مذاکرات دی کوئی گنجائش کائنی۔ ہک واری ڄݙاں او اے سمجھ گھنن جو ریاست واضح کر ݙیوے تاں انھاں کوں یا تاں آئین اتے قانون دے سامݨے ہتھیار سٹݨے چاہیدن یا ول نتائج دا سامنا کرݨا پوسی، انھاں دی مایوسی واضح تھی ویندی اے۔ انہاں آکھیا جو سکیورٹی آپریشنز دی فعال نوعیت انسدادِ دہشت گردی دے بہتر نتائج اچ وی کردار ادا کیتے۔ انھاں آکھیا جو ڄاݨ بڄھ تے ہک بیانیے کوں ودھایا ویندا پئے جو بلوچستان اچ سکیورٹی دی صورتحال ݙاݙھی خراب اے، میں ایں مسئلے کوں ترائے سوالاں اتے ترائے پہلواں توں پرکھیساں، اے نہ صرف بلوچستان کیتے مخصوص مسئلہ اے ٻھل ایندا تعلق پاکستان دی مجموعی سکیورٹی صورتحال نال وی اے۔ ڈی جی آئی ایس پی آر ہک ہارڈ سٹیٹ دے تصور دا ولدا ݙیندے آکھیے جو ہارڈ سٹیٹ دا مطلب ہک اینڄھی ریاست اے جتھاں آئین اتے قانون سبھ تے ہکو سواں لاگو ہووے، جتھاں سارے معاملات آئین دے مطابق سختی نال چلائے ونڄن اتے جتھاں کوئی اشرافیہ نہ ہووے، اے ہک اینڄھی ریاست اے جتھاں قانون دا اطلاق سارے شہریاں تے ہکو سواں تھیندے، سارے ریاستی امور آئین اتے قانون دے مطابق، بلا تفریق چلائے ونڄن، جتھاں اشرافیہ اتے عام شہریاں نال ہکو ڄھیاں سلوک ہووے تاں اے ہک سخت ریاست ٻݨدی اے، اینڄھی ریاست سلامتی، استحکام اتے شکایتاں دا حل وی یقینی ٻݨیندی اے۔ ڈی جی آئی ایس پی آر آکھیا جو لوک اکثر شکایت کریندن اتے اپݨے حقوق منڳدن جیندے اچوں ٻہوں سارے حقیقی تھی سڳدن ٻھل یاد رکھو جو بنیادی حقوق توں پہلے بنیادی ذمہ داریاں وی ہوندن۔ آئین دے آرٹیکل 5 دا حوالہ ݙیندے انھاں آکھیا جو اے بنیادی حقوق دفعات توں پہلے ہین جو ریاست نال وفاداری ہر شہری دا بنیادی فریضہ اے، اے آئین اتے قانون دی اطاعت کوں ہر شہری دا ناقابلِ تنسیخ فرض وی ٻݨیندے، چاہے او کتھائیں وی ہووے۔ انھاں آکھیا جو آئین واضح طور تے ݙسیندے جو ہر شہری دی بنیادی ذمہ داری ریاست دا وفادار راہوݨ اتے آئین و قانون دی پاسداری اے، انھاں ذمہ داریاں کوں پورا کرݨ دے بعد ہی حقوق تے بحث تھی سڳدی اے۔ ڈی جی آئی ایس پی آر آکھیا جو اشرافیہ دے کڄھ ارکان اتے کڄھ قبائلی سردار جمود کوں برقرار رکھݨ چاہندن، میں انھاں سبھ دے بارے نئیں الیندا پیا، ٻھل انہان اچ کڄھ نئیں چاہندے جو ہک عام شہری پڑھے، ترقی کرے، انجینئر ٻݨے، ڈاکٹر ٻݨے، آرمی اچ بھرتی ہووے، ماہرِ معاشیات ٻݨے، زرعی ماہر ٻݨے، یا کاروبار اچ کامیاب ہووے۔ ڈی جی آئی ایس پی آر دے مطابق اے افراد دہشت گردی دے اصل محرک ہن کیوں جو انھاں کوں سماجی اتے معاشی تبدیلی دا خدشہ ہئی۔ انھاں آکھیا جو او خوفزدہ ہین جو ویلھا بدلدا پئے، جتنا او ݙردے ویسن، اتنے ہی ودھ پریشان تھیندے ویسن اتے اتنا ہی ودھ تشدد دی راہ اپنیندن، کم کرݨ دا پراݨا طریقہ ختم تھی چکیے، اساں انھاں نال مزید مذاکرات نئیں کرݨ چاہندے، اساں اصل سٹیک ہولڈرز بلوچستان دے لوکاں نال ہی الیسوں، او حقیقی سٹیک ہولڈر نئیں، او اپݨے مفادات اتے اپݨے خاندان دی دولت دے سٹیک ہولڈر ہین، بلوچستان دے لوکاں دے مفاد اچ نئیں۔ ڈی جی آئی ایس پی آر آکھی اجو اینڄھے عناصر تجارت دی اݙ اچ سمگلنگ اچ ملوث ہن، او کاروبار اتے نام نہاد تجارت دے ناں تے سمگلنگ دے ھیلکے ہین، او منشیات اتے ڈیزل گھن آندن اتے انھاں دی اصل قیمت تے کئی ڳنا ودھ تے ویچیندن، ڄݙاں اے غیر قانونی سرگرمیاں بند تھی ویندن تاں او دہشت گردی دا سہارا گھندن اتے ول دعویٰ کریندن جو حالات قابو توں ٻاہرو تھی چکین اتے بلوچستان ہتھو نکلدا پئے۔ ڈی جی آئی ایس پی آر آکھیا جو کڄھ اشرافیہ مراعات اتے عوامی وسائل تے کنٹرول منڳدن، اتے آہدن جو ساݙے نال گالھ کرو، اساݙے اجازت نامے بحال کرو، اپݨے کاروبار ول کھولو اتے 1000 ارب روپے توں ودھ دے ایں بجٹ دا حصہ ساکوں ݙیو، پر ہݨ مزید نئیں، تساں سٹیک ہولڈر نئیں ہو، رقم بلوچستان دے لوکاں کوں ویسی۔ انھاں آکھیا جو بلوچستان دی سٹریٹجک اہمیت اتے ودھ وسائل ایکوں دشمن مفادات دا ہدف ٻݨا ݙتے۔ انھاں آکھیا جو او ڄاݨدن جو بلوچستان ہک تزویراتی جغرافیائی محلِ وقوع رکھیندے، ایکوں نہ صرف باصلاحیت اتے ترقی پسند انسانی وسائل نال نوازا ڳئے ٻھل وسیع قدرتی وسائل نال وی مالا مال اے، ڄیکر بلوچستان خوشحال تھیندے تاں پورا پاکستان ترقی کریندے اتے ایویں ہی خطہ وی ترقی کریسی، تہوں او ایندی ترقی دی مخالفت کریندن، او دہشتگرد گروپاں دے ذریعے براہِ راست ملوث تھی ویندن۔ ڈی جی آئی ایس پی آر آکھیا جو ریاست ولوں جنھاں گروپاں کوں ’’فتنہ الہندوستان‘‘ اتے ’’فتنہ الخوارج‘‘ آکھیا ویندے، انھاں اچ اشرافیہ اتے قبائلی سرداراں دے کڄھ ارکان وچال رضامندی نال شراکت داری پائی ویندی اے، جنھاں کوں ویلھا بدلݨ دا چنتا اے۔ انھاں آکھیا جو او پراݨا سرداری نظام برقرار رکھݨ چاہندن، او اوہے نوکر، اوہے ذاتی جیلاں اتے اوہو کنٹرول دا نظام چاہندن۔ علاقائی سلامتی دے حوالے نال انھاں آکھیا جو بھارت اتے افغانستان دہشتگردی دی حمایت نال جڑیے ہوئن، ہندوستان اتے افغانستان اچ کیا مشترک اے؟ انھاں اچ صرف ہک شے مشترک اے اتے او دہشتگردی اے، انھاں دی سفارت کاری وی دہشت گردی آلی اے، ڄیکر اے ݙوہائیں عسکریت پسند گروپ نظریاتی طور تے مختلف ہین ٻھل انھاں دا مشترکہ مقصد ہئی، جیڑھا ہک سیکولر اے، ہک قوم پرست اے اتے ݙوجھا ہک انتہا پسند مذہبی گروہ اے، ٻھل پروپیگنڈہ انھاں کوں متحد کریندے۔ گوادر اچ ترقیاتی منصوبیاں تے الیندے انھاں آکھیا جو 3 لکھ 5 ہزار آبادی دے شہر اچ ترائے یونیورسٹیاں، چار ایجوکیشن کالج، 318 سکول، پاک چائنا فرینڈ شپ ہسپتال، ہک ڈسٹرکٹ ہیڈ کوارٹر ہسپتال، ہک دیہی مرکزِ صحت، پنج چائلڈ ڈسپنسریاں اتے 19 بنیادی صحت دے یونٹ ہین، گوادر اچ ہک بین الاقوامی ہوائی اݙا، ہک ڳہری سمندری بندرگاہ، ایسٹ بے ایکسپریس وے، صنعتی اتے ٹیکس فری زونز، ہک کرکٹ سٹیڈیم اتے کئی ٻئے ترقیاتی منصوبے وی ہین۔ انہاں آکھیا جو تربت اچ ݙو یونیورسٹیاں، چھی تعلیمی کالج، کیڈٹ کالج، ہک گرلز کیڈٹ کالج، کئی سکول، 9 سرکاری طبی سہولیات، ہک ٹیچنگ ہسپتال، 27 پرائیویٹ ہسپتال، ہک بین الاقوامی ہوائی اݙا اتے وسیع سڑک اتے کاروباری رابطے ہین۔ انھاں آکھیا جو میکوں اتنی ہی آبادی والا کوئی ݙوجھا شہر ݙکھاؤ جیںدے اچ ایں سطح دا بنیادی ڈھانچہ اتے سہولیات ہوون۔ ڈی جی آئی ایس پی آر آکھیا جو 1947ء اچ بلوچستان اچ صرف 114 سکول ہن ڄݙاں جو اڄ اتھاں 15 ہزار 300 سکول، 12 یونیورسٹیاں، پنج میڈیکل کالج، 145 کالج، 13 کیڈٹ کالج اتے 321 ٹیکنیکل انسٹی ٹیوٹ ہن، صوبے اچ آزادی دے ویلھے صرف چھی ڈسپنسریاں ہن ٻھل ہݨ 13 وݙے ہسپتال، 18 ٹیچنگ ہسپتال، 36 ڈسٹرکٹ ہیڈ کوارٹر ہسپتال، 56 دیہی مراکزم صحت، 650 ڈسپنسریاں، پنج کارڈیک سنٹرز، اٹھ تپِ دق دے مراکزم اتے 24 ڈائیلاسز دے مراکزم ہین، 1947ء اچ بلوچستان اچ صرف 375 کلومیٹر سڑکاں ہن اتے اڄ 24400 کلومیٹر توں ودھ سڑکاں ہین جیںدے اچ 4400 کلومیٹر توں ودھ ہائی ویز وی شامل ہین۔ محرومیاں دے بیانیے تے انہاں آکھیا جو بلوچستان دا فی کس ترقیاتی بجٹ 75,000 روپے توں ودھ اے جیڑھا سارے صوبیاں اچ سب توں ودھ اے ڄݙاں جو اے پنجاب اچ 45,000 روپے توں وی گھٹ اے، تاں ول کیہڑی بنیاد تے ایں محرومی دی داستان کوں پروان چڑھایا ویندا پئے؟ ڈی جی آئی ایس پی آر آکھیا جو دہشت گرد گروپاں مزدوراں کوں نشانہ ٻݨا تے، انفراسٹرکچر تے حملہ کر تے ول اے دعویٰ کیتا ویندے جو صوبے اچ کوئی ترقی نئیں تھیندی پئی۔ لاپتہ افراد بارے انھاں آکھیا جو حکومت سپریم کورٹ دے ریٹائرڈ جج دی سربراہی اچ جبری گمشدگیاں تے انکوائری دا ہک مستقل کمیشن ٻݨائے، 2010ء توں ڳھن تے ہݨ تئیں کمیشن کوں 10,901 شکایتاں ملین جیندے مطابق تفصیلی تحقیقات توں پتہ لڳیے جو ٻہوں ساریاں شکایتاں اچ جبری گمشدگی ہے وی کائنا ٻھل غلط رپورٹ کیتی ڳئی ہئی۔ انھاں آکھیا جو کمیشن باضابطہ طور تے 2,933 مقدمات درج کیتن، انھاں اچوں 2,767 کوں حل یا ٹریس کیتا ڳئے ڄݙاں جو 166 کیسز زیرِ تفتیش ہین، سندھ، خیبرپختونخوا تے پنجاب اچ وی غیر حل شدہ کیسز موجود ہین۔