صدرِ مملکت آصف علی زرداری دی سوئس کنفیڈریشن دے صدر، فیڈرل کونسل تے سوئس عوام کوں قومی ݙینہہ تے مبارکباد

اسلام آباد۔1اگست (اے پی پی) صدرِ مملکت آصف علی زرداری سوئس کنفیڈریشن دے صدر گائی پارملین، فیڈرل کونسل تے سوئس عوام کوں قومی ݙینہہ تے مبارکباد ݙتی اے۔ ایوانِ صدر دے پریس ونگ دے مطابق ہفتہ کوں آپݨے تہنیتی سنیھے اچ صدرِ مملکت پاکستان تے سوئٹزرلینڈ وچال تعلقات کوں آپسی اعتماد، مشترکہ اقدار تے تعمیری تعاون تے مبنی قرار ݙتا۔ انھاں آکھیا جو پاکستان انھاں کثیر الجہتی تعلقات کوں خصوصاً تجارت، سرمایہ کاری، ٹیکنالوجی، زراعت، ادویات، سیاحت، موسمیاتی تبدیلی تے ٹیکسٹائل دے شعبیاں اچ انتہائی قدر دی نگاہ نال ݙیکھدے۔صدر آصف علی زرداری آکھیا جو ݙوہائیں اقوام بین الاقوامی امن کیتے پختہ عزم رکھیندن اتے انھاں مختلف کثیر الجہتی فورمز تے روابط کوں برقرار رکھیے۔ انھاں آکھیا جو پاکستان عالمی امن دے فروغ اچ سوئٹزرلینڈ دے کردار کوں سراہیندے، صدرِ مملکت اقوامِ متحدہ سمیت کئی اہم عالمی اداروں دی میزبانی دے حوالے نال سوئٹزرلینڈ دے کردار دا وی ذکر کیتا جتھاں پاکستان کئی دہائیاں توں جنیوا اچ آپݨا مستقل مشن قائم رکھیا ہوئ۔ صدرِ مملکت ایں اعتماد دا اظہار کیتا جو ݙوہائیں ملکاں وچال دوستی تے تعاون آوݨ آلے سالاں اچ ݙوہائیں اقوام دے عوام دے مفاد اچ ٻئے ودھسن۔