شملہ پہاڑی، لاہور نادرا سنٹر اچ تبدیلی دے بعد قطاراں ختم

اسلام آباد۔ 2 اگست (اے پی پی) کݙاہیں شملہ پہاڑی نادرا رجسٹریشن سنٹر، لاہور اچ لمبیاں قطاراں اچ گھنٹیاں انتظار کیتا ویندا ہئی، لیکن ہک غیر معمولی تبدیلی نال شہریاں کوں تیز تر، زیادہ موثر تے باوقار عوامی خدمات فراہم کیتیاں ویندی پئن۔ ڈرامائی تبدیلی وفاقی وزیرِ داخلہ محسن نقوی دے شملہ پہاڑی اچ 24/7 نادرا سنٹر دے غیر اعلانیہ دورے دے دوران ݙیکھݨ اچ آئی، جہاں انھاں اپ گریڈ شدہ سہولیات تے ہموار آپریشنز دا خود مشاہدہ کرݨ دے بعد خوشگوار حیرت دا اظہار کیتا۔ پہلے لمبیاں قطاراں مرکز دی سنڄاݨ ہن، ہݨ اتھاں شہریاں کوں آرام دہ تے مکمل ایئر کنڈیشنڈ ماحول اچ منٹاں اچ خدمات حاصل کریندیں ہوئیں ݙٹھا ونڄ سڳدے۔ قومی شناختی کارڈ تے ٻئے سرکاری دستاویزات دے حصول دے حوالے نال شہریاں انتظار دے اوقات اچ نمایاں ڳھٹکی دی اطلاع ݙتی تے عملے دی پیشہ ورانہ مہارت دی وی تعریف کیتی اے۔ آپݨے دورے دے دوران وفاقی وزیرِ داخلہ شہریاں نال براہِ راست گالھ مہاڑ کیتی، رجسٹریشن دے عمل، رسمی کارروائیاں کوں مکمل کرݨ اچ لگݨ آلے وقت تے درپیش کہیں وی پریشانی بارے پچھیا۔ انھاں مختلف سروس کاؤنٹرز دا دورہ وی کیتا۔ ملازمین نال ملاقاتاں کیتیاں تے ذاتی طور تے آپریشنل کارکردگی دا جائزہ گھدا۔ شہریاں مثبت تجربات کا اشتراک کیتا۔ ہک شہری ریمارکس ݙتے جو میݙی واری آوݨ اچ صرف پنج منٹ لگے اتے کہیں قسم دی تکلیف دا سامنا نئیں کرݨا پیا۔ ہک بزرگ شہری عملے دے تعاون کوں سراہیندیں ہوئیں آکھیا جو اے سارا عمل کچھ منٹاں اچ مکمل تھی ڳیا۔ ہک ٻئی بزرگ خاتون وفاقی وزیر تے نادرا دے عملے کیتے دعاواں کیتیاں، باعزت سلوک تے بہتر سروس تے اظہارِ تشکر کیتا۔ وفاقی وزیر محسن نقوی فیملی رجسٹریشن سرٹیفکیٹ دے حصول کیتے ݙو شہریاں دے خدشات دا وی فوری طور تے جواب ݙتا، انھاں دے مسائل دے فوری حل کیتے موقع تے ہدایات جاری کیتیاں۔ انھاں نادرا ملازمین کوں ہدایت کیتی جو ایں گالھ کوں یقینی بݨایا ونڄے جو مختلف خدمات کیتے درکار دستاویزات دے سلسلے اچ شہریاں دی صحیح رہنمائی کیتی ونڄے تانجو غیر ضروری تاخیر توں بچیا ونڄ سڳے۔محسن نقوی آکھیا جو فیملی رجسٹریشن سرٹیفکیٹ ریکارڈ تئیں رسائی دے نظام کوں مزید بہتر بݨایا ویسے تانجو ایں عمل کوں عوام کیتے ٻیا سوکھا بݨایا ونڄ سڳے۔