امام بارگاہ جی سکس ٹو، اسلام آباد اچ عزاداران کیتے مفت ہیپاٹائٹس سی سکریننگ کیمپ جاری

اسلام آباد۔ 3 اگست (اے پی پی) وفاقی وزیرِ صحت مصطفیٰ کمال دی ہدایت تے امام بارگاہ جی سکس ٹو، اسلام آباد اچ عزاداران کیتے مفت ہیپاٹائٹس سی سکریننگ کیمپ جاری اے۔ وزارتِ صحت ولوں جاری بیان دے مطابق کیمپ اچ عزاداران کوں مفت ہیپاٹائٹس سی سکریننگ، طبی مشاورت تے بیماری توں بچاؤ دے حوالے نال آگاہی فراہم کیتی ویندی پئی اے۔ سکریننگ دے دوران جنھاں افراد دا ٹیسٹ مثبت آسی انھاں کوں حکومت دے قومی ہیپاٹائٹس سی پروگرام دے تحت متعلقہ مراکزی نال منسلک کیتا ویسے جتھ انھاں کوں مفت علاج دی سہولت فراہم کیتی ویسے۔ قومی ہیپاٹائٹس سی پروگرام دے پراجیکٹ ڈائریکٹر ڈاکٹر ضیاء داوڑ سکریننگ کیمپ دی نگرانی کریندے پئن تانجو شہریاں کوں معیاری تے بروقت خدمات فراہم کیتیاں ونڄ سڳن۔ وفاقی وزیرِ صحت مصطفیٰ کمال عوام توں اپیل کیتی اے جو پاکستان کوں ہیپاٹائٹس سی توں پاک بݨاوݨ دے قومی مشن اچ آپݨا کردار ادا کریندیں ہوئیں آپݨی سکریننگ ضرور کرواون۔ انھاں آکھیا جو بروقت تشخیص تے موثر علاج ہیپاٹائٹس سی دے مکمل خاتمے دی کنجی اے۔ انھاں آکھیا جو حکومت “مفت سکریننگ، مفت ٹیسٹ، مفت علاج” دی پالیسی دے تحت عوام کوں سہولیات فراہم کریندی پئی اے۔ انھاں آکھیا جو “ہک قوم، ہک مشن، ہیپاٹائٹس توں پاک پاکستان” اساݙا عزم اے تے ہیپاٹائٹس سی فری پاکستان اساݙا قومی مشن اے۔ وفاقی وزیرِ صحت ایں عزم دا اعادہ کیتا۔ ایں قومی مہم دی کامیابی کیتے عوام، سول سوسائٹی، میڈیا تے ہر شہری کوں اپنا فعال کردار ادا کرݨا ہوسی۔