وفاقی وزیرِ اقتصادی امور احد چیمہ دی زیرِ صدارت نیشنل ایگری ٹریڈ اینڈ فوڈ سیفٹی اتھارٹی دی فعالیت دا جائزہ اجلاس

اسلام آباد۔ 3 اگست (اے پی پی) وفاقی وزیرِ اقتصادی امور احد چیمہ دی زیرِ صدارت نیشنل ایگری ٹریڈ اینڈ فوڈ سیفٹی اتھارٹی (نیفسا) دی فعالیت دا جائزہ اجلاس تھیا۔اجلاس اچ اتھارٹی کوں فعال بݨاوݨ دی پاسے تھیوݨ آلی پیش رفت تے زرعی تجارت کیتے ہک جدید ریگولیٹری فریم ورک دے قیام دے اقدامات دا جائزہ ڳھدا ڳیا۔ شرکا ٹیکنالوجی نال لیس، شفاف تے سنگل ونڈو سسٹم دے ذریعے زرعی درآمدات و برآمدات کوں سوکھا بݨاوݨ اچ نیفسا دے کردار تے ڳالھ کیتی جیں دا مقصد اتھارٹی دی کارکردگی کوں بہتر بݨاوݨ، خوراک دی حفاظت دی نگرانی کوں مضبوط کرݨ، کاروبار اچ سوکھ ݙیوݨ تے موجودہ انتظامی مرحلیں کوں سوکھا بݨاوݨ اے۔اجلاس اچ وزیراعظم دے کوآرڈینیٹر زراعت و فوڈ سیفٹی احمد عمیر، سیکرٹری نیشنل فوڈ سکیورٹی عامر علی احمد، ڈائریکٹر جنرل نیفسا تے ٻئے سینئر حکام شرکت کیتی جنھاں اتھارٹی دیاں عملی تیاریاں تے تفصیلی بریفنگ ݙتی۔بریفنگ موجب نیفسا کوں ہک جدید ترین ریگولیٹری اتھارٹی دے طور تے قائم کیتا ویندا پئے جو زرعی درآمد کنندگان تے برآمد کنندگان کیتے ہک سنگل ونڈو پلیٹ فارم دے طور تے کم کریسی، جیں نال تجارت متعلق امور دی پروسیسنگ زیادہ تیز، موثر تے شفاف تھی سڳسی۔ سٹیک ہولڈرز کوں ویلھے سر رہنمائی تے سہولت ݙیوݨ کیتے ہک مخصوص نیفسا ہیلپ لائن، مصنوعی ذہانت (AI) تے مبنی چیٹ بوٹ ویب سائٹ تے سرکاری سوشل میڈیا پلیٹ فارمز وی متعارف کروائے ویسن۔ اتھارٹی دے اڳلے کچھ مہینے اچ مکمل طور تے فعال تھیوݨ دی توقع اے۔بریفنگ اچ ایں ڳالھ تے زور ݙتا ڳیا جو نیفسا میرٹ، شفافیت تے پیشہ ورانہ صلاحیتاں تے مبنی جدید گورننس تے انسانی وسائل دا نظام متعارف کرویندی پئی اے۔ بھرتیاں دا عمل ہک آزاد ریکروٹمنٹ تے سکروٹنی کمیٹی دے ذریعے کیتا ویندا پئے جݙاں جو نجی شعبے دے ماہرین سودھے اعلیٰ تعلیم یافتہ پیشہ ورلوکاں کوں راغب کرݨ کیتے مارکیٹ موجب پرکشش تنخواہواں تے ہک مخصوص پے سٹرکچر ڈیزائن کیتا ڳئے۔ ملازمین دی تعیناتی ترائے سالہ کنٹریکٹ تے کیتی ویندی پئی اے جیں دا ہر 6 مہینے بعد کارکردگی دی بنیاد تے جائزہ ڳھدا ویسے۔ تسلی بخش کارکردگی دی صورت اچ انھاں دے معاہدے دی تجدید کیتی ونڄ سڳسی تاں جو نیفسا دے ملازمین سروس دے کہیں وی مرحلے تے مستقل یا ریگولر تصور نہ تھیسن۔اجلاس دے دوران ݙسایا ڳیا جو ادارہ جاتی خودمختاری کوں یقینی بݨاوݨ کیتے نیفسا بورڈ آف گورننس کوں بااختیار بݨایا ڳئے جݙاں جو ڈائریکٹر جنرل تے سیکرٹری بورڈ دے سامݨے جوابدہ ہوسن۔ اہم پالیسی امور بشمول نویاں آسامیاں دی تخلیق تے پے سکیلز اچ ترمیم کیتے وفاقی کابینہ دی منظوری درکار ہوسی۔ اجلاس اچ اے وی نوٹ کیتا ڳیا جو اتھارٹی دی سربراہی فی الوقت ہک قائم مقام ڈائریکٹر جنرل کریندے پئن جݙاں جو نجی شعبے توں مستقل ڈائریکٹر جنرل دی تعیناتی دا عمل مکمل تھیا۔نیفسا دے نویں بھرتی تھیوݨ آلے افسران کوں جدید ریگولیٹری تے معائنے دے طریقہ کار نال آراستہ کرݨ کیتے قومی تے بین الاقوامی ماہرین دی نگرانی اچ کسٹمز اکیڈمی کراچی اچ ٹریننگ کروائی ویندی پئی اے۔ اجلاس اچ نیفسا دے ٹیکنالوجی تے مبنی انسپکشن سسٹم دا وی جائزہ ڳھدا ڳیا جیں دے تحت انسپکٹرز درآمد کنندگان یا کلیئرنگ ایجنٹس توں براہِ راست رابطے دے بغیر زرعی سامان دی کھیپ دا معائنہ کریسن۔ انسپکشن رپورٹس دی توثیق کیتے تھرڈ پارٹی آڈٹ نال لیس ڈیجیٹل ورک فلو دا مقصد ریگولیٹری امور اچ شفافیت، جوابدہی تے دیانت داری کوں یقینی بݨاوݨ اے۔وفاقی وزیر اقتصادی امور احد چیمہ نیفسا دے قیام اچ تھیوݨ آلی پیش رفت دی تعریف کیتی ایں عزم دا اعادہ کیتا جو حکومت ہک عالمی معیار دا ادارہ بݨاوݨ کیتے مکمل طور تے پرعزم اے جیڑھا پراݨے نظام دی جاہ ہک موثر، شفاف تے بین الاقوامی معیار موجب ریگولیٹری فریم ورک قائم کریسی۔ انھاں آکھیا جو نیفسا پاکستان دے زرعی شعبے اچ ساریں توں اہم ادارہ جاتی اصلاحات اچوں ہک اے تے اے تاخیر کوں گھٹ کرتے، ریڈ ٹیپزم کوں ختم کرتے تے معیاری ریگولیٹری خدمات کوں یقینی بݨا تے ٻوٹیاں، بجاں تے ٻئے زرعی مصنوعات دی تجارت کرݨ آلے درآمد کنندگان تے برآمد کنندگان کیتے کاروباری ماحول کوں نمایاں طور تے بہتر بݨیسی۔وفاقی وزیر ہدایت کیتی جو نیفسا دے قیام دے پہلے ہی ݙینھ توں دیانت داری، پیشہ ورانہ مہارت تے قوانین و اخلاقی معاہیر دی سختی نال پابندی کوں یقینی بݨایا ونڄے۔ انھاں ایں اعتماد دا اظہار کیتا جو اے اتھارٹی پاکستان دے زرعی تجارتی نظام کوں جدید بݨاوݨ، ملک دے ریگولیٹری نظام تے بین الاقوامی اعتماد کوں ودھاوݨ تے پائیدار اقتصادی ترقی اچ اہم کردار ادا کریسی۔