وزیرِ اعظم دی زیرِ صدارت نجی سرمایہ کاری دے ودھارے تے پائیدار معاشی ترقی متعلق اجلاس، پرائیویٹ ایکویٹی فنڈ دے قیام دے حوالے نال لائحہ عمل وقتی پیش کرݨ دی ہدایت

اسلام آباد۔ 3 اگست (اے پی پی) وزیراعظم محمد شہباز شریف ملک اچ سرمایہ کاری، چھوٹے تے درمیانے درجے دے کاروبار دے ودھارے کیتے پرائیویٹ ایکویٹی فنڈ دے قیام دے حوالے نال لائحہ عمل وقتی پیش کرݨ دی ہدایت کریندیں آکھیا جو پرائیویٹ ایکویٹی فنڈ معیشت اچ سرمایہ کاری، کاروباری وسعت تے روزگار دے موقع پیدا کرݨ کیتے ہک موثر محرک دا کردار ادا کرسڳدن۔وزیراعظم محمد شہباز شریف دی زیرِ صدارت نجی سرمایہ کاری دے ودھارے تے پائیدار معاشی ترقی متعلق اجلاس اتھاں منعقد تھیا۔وزیراعظم دفتر دے میڈیا ونگ توں جاری بیان موجب وزیراعظم ملک اچ سرمایہ کاری، چھوٹے تے درمیانے درجے دے کاروبار دے ودھارے کیتے پرائیویٹ ایکویٹی فنڈ دے قیام دے حوالے نال لائحہ عمل وقتی پیش کرݨ دی ہدایت کریندے آکھیا جو ملک اچ پبلک ایکویٹی مارکیٹ تے پرائیویٹ ایکویٹی فنڈ دے ودھارے کیتے جامع روڈ میپ تیار کرتے وقتی پیش کیتا ونڄے تاں جو ملک اچ سرمایہ کاری کیتے فنڈز دستیاب ہوون تے غیر ملکی سرمایہ کاری کیتے رستہ ہموار تھیوے۔انھاں آکھیا جو ملک دی معاشی ترقی کیتے نجی سرمایہ کاری دا ودھارا ناگزیر اے، پرائیویٹ ایکویٹی فنڈ معیشت اچ سرمایہ کاری، کاروباری وسعت تے روزگار دے موقع پیدا کرݨ کیتے ہک موثر محرک دا کردار ادا کر سڳدن۔وزیراعظم آکھیا جو معدنیات، زراعت، لائیو سٹاک، توانائی، انفارمیشن ٹیکنالوجی (آئی ٹی) تے ٻئے شعبے پاکستان دی معیشت دی ترقی دے بنیادی محرک بݨݨ دی صلاحیت رکھیندن، انھاں شعبیں اچ سرمایہ کاری کیتے پبلک ایکویٹی مارکیٹ ہک اہم ذریعہ بݨ سڳدی اے، بینکاری شعبے دی طرفوں سرمایہ کاری دا حجم حالی وی محدود اے جیں پاروں متبادل سرمایہ کاری ذرائع کوں ودھارا ݙیوݨ ویلھے دی اہم لوڑھ اے ۔وزیراعظم آکھیا جو حکومت ایہوجیھے اقدامات کوں ترجیح ݙیندی پئی اے جیڑھے نجی شعبے دی قیادت اچ سرمایہ کاری، صنعت تے برآمدات دے ودھارے دے ذریعے پاکستان دی معیشت کوں تکڑا تے پائیدار بنیاداں تے استوار کرن۔اجلاس اچ نائب وزیراعظم تے وزیرِ خارجہ سینیٹر محمد اسحاق ڈار، وزیرِ مملکت خزانہ بلال اظہر کیانی، معاونِ خصوصی ہارون اختر تے متعلقہ اداریں دے اعلیٰ افسراں شرکت کیتی۔