جمہوری نظام اچ سیاسی پوائنٹ سکورنگ معمول دی ڳالھ اے، آزاد کشمیر انتخابات دے نتائج کوں کھلے دل نال منݨا چاہیدے، عطاء اللہ تارڑ

اسلام آباد۔ 3 اگست(اے پی پی)وفاقی وزیرِ اطلاعات و نشریات عطاء اللہ تارڑ آکھیے جو جمہوری نظام اچ سیاسی پوائنٹ سکورنگ معمول دی ڳالھ اے، آزاد کشمیر انتخابات دے نتائج کوں کھلے دل نال منݨا چاہیدے، آزاد جموں و کشمیر دے عوام تعمیر و ترقی، عوامی خدمت اتے سیاسی جماعتاں دی کارکردگی ݙیہدے ہوئے اپݨا فیصلہ ݙتے۔ میڈیا نال الیندے وفاقی وزیر آکھیا جو آزاد جموں و کشمیر قانون ساز اسمبلی دے انتخابات دے ݙوجھے مرحلے اچ وی پاکستان مسلم لیگ (ن) کوں برتری حاصل تھئی، مسلم لیگ (ن) سادہ اکثریت حاصل کرݨ اچ کامیاب تھی چکی اے، اللہ تعالیٰ آزاد جموں و کشمیر اچ مسلم لیگ (ن) کوں جیڑھی کامیابی ݙتی اے، اے ساݙے سیاسی مخالفاں کوں ہضم نئیں تھیندی پئی۔ انھاں آکھیا جو انتخابی عمل اچ عوام بھرپور انداز اچ حصہ ڳھدے، سیاسی جماعتاں نہ صرف جلسے جلوس کیتن ٻھل آزاد جموں و کشمیر اتے مہاجرین دیاں نشستاں تے وی بھرپور سیاسی سرگرمیاں ݙکھا تے بہترین اتے فعال کردار ادا کریندے ہوئے انتخابی عمل کوں کامیاب ٻݨائے۔ وفاقی وزیر آکھیا جو وزیراعظم شہباز شریف گلگت بلتستان دے انتخابات اچ پاکستان پیپلز پارٹی دی کامیابی تے سب توں پہلے مبارکباد ݙے تے ہک مثبت جمہوری روایت رکھی اے، انھاں کوں وی جمہوری اقدار سانڳے برداشت، تحمل اتے رواداری ݙکھاوݨی چاہیدی اے، لوکاں ایں بنیاد تے فیصلہ کرݨا ہائی جو کیہڑی جماعت کشمیر اتے ایںدے عوام کوں اپݨیاں ترجیحات اچ رکھیے، کیہڑی جماعت دا عوامی خدمت دا ٹریک ریکارڈ اے۔ انھاں آکھیا جو وزیرِ اطلاعات سندھ و سینئر وزیر شرجیل انعام میمن بے بنیاد الزامات لائن، جتھاں انھاں دی حکومت اے اتھاں وی کئی معاملے توجہ منڳدن، 2024ء دے انتخابات تے سوالات چاتے ڳئن ٻھل اے سوال سندھ دے حوالے نال وی چاتے ونڄ سڳدن، ڄیکر کہیں انتخابی عمل تے اعتراضات اتے الزامات لڳدن تاں ضروری اے جو انھاں دے نال ناقابلِ تردید شواہد اتے ثبوت وی ݙتے ونڄن۔ انھاں آکھیا جو گلگت بلتستان دے انتخابات اچ لوکاں پیپلزپارٹی کوں چݨیے، ایویں ہی آزاد جموں و کشمیر دے انتخابات اچ مسلم لیگ (ن) دی بھرپور مہم چلائی پاروں لوکاں مسلم لیگ (ن) دے حق اچ ووٹ ݙتے۔ انھاں آکھیا جو جمہوری نظام اچ سیاسی پوائنٹ سکورنگ معمول دا حصہ اتے سیاست دا ہک لازمی پہلو اے ٻھل خالی الزام تراشی نئیں کرݨی چاہیدی، ڄیکر کتھائیں کوئی اعتراض اے تاں ایندا ثبوت وی ہووݨا چاہیدے، ڄیویں مسلم لیگ ن اعلیٰ ظرفی نال گلگت بلتستان اچ کامیابی تے پیپلزپارٹی کوں مبارک ݙتی ہائی، ایویں ہی پیپلز پارٹی کوں وی مسلم لیگ (ن) دا مینڈیٹ من تے مبارک ݙیوݨی چاہیدی اے۔  وفاقی وزیر آکھیا جو آزاد جموں و کشمیر دیاں نشستاں دے حوالے نال سروے وی تھئن اتے سیاسی ماہرین وی اݨی رائے ݙتی، ہݨ ڄیکر بے بنیاد اتے بغیر ثبوت دے الزامات لائے ڳئے تاں ایندا چنڳاں نتیجہ نا نکلسی۔ انہاں آکھیا جو مسلم لیگ (ن) دی قیادت آزاد جموں و کشمیر اچ ترقی دا نعرہ گھن تے ڳئی ہائی ٻھل تہاݙے منشور اچ کڄھ ہا نا تساں کوئی کارکردگی ݙکھائی اے، لوکاں عوامی خدمت، فلاح و بہبود تے تعمیر و ترقی دے وژن پاروں مسلم لیگ ن کوں ووٹ ݙتے۔ انہاں آکھیا جو کشمیر اچ انتخابات تے الزامات لاوݨ والی جماعت دی کشمیر اچ آپݨی حکومت اتے انتظامیہ موجود ہائی، ایں حکومت اتے انتظامیہ دے تحت ہی انتخابی عمل مکمل تھئے، ڄیکر ایندے تے وی کوئی سوال چیندے تان ول اساں کیا آکھ سڳدے ہیں، جمہوری عمل کوں ٹورݨ کیتے ایہو مناسب ہوسی جو انتخابات دے نتائج کوں منیا ونڄے، ہݨ اقو تے ودھ تے سیاسی عمل کوں کشمیر اچ مضبوط ٻݨاوݨ اچ اپݨا کردار ادا کرݨا چاہیدے۔