دہشت گردی تے جرائم دے خلاف پولیس فورس دی بہادری، پیشہ ورانہ صلاحیت تے قربانیاں پوری قوم کیتے باعثِ فخر ہن، چیئرمین سینیٹ یوسف رضا گیلانی

اسلام آباد۔ 4 اگست (اے پی پی) چیئرمین سینیٹ سید یوسف رضا گیلانی وطن کیتے جاناں دا نذرانہ پیش کرݨ آلے پولیس شہداء کوں زبردست خراجِ عقیدت پیش کریندیں آکھیا جو دہشت گردی تے جرائم دے خلاف پولیس فورس دی بہادری، پیشہ ورانہ صلاحیت تے قربانیاں پوری قوم کیتے باعثِ فخر ہن۔سینیٹ سیکرٹریٹ موجب یومِ شہدائے پولیس دے موقع تے اپݨے پیغام اچ چیئرمین سینیٹ آکھیا جو خیبر پختونخوا، بلوچستان تے ملک دے پولیس افسران تے اہلکاراں دیاں لازوال قربانیاں کوں قوم ہمیشہ یاد رکھیسی، شہدائے پولیس دے اہلِ خانہ دی استقامت تے قربانیاں قومی سرمایہ ہن، قوم انھاں دے نال مکمل یکجہتی دا اظہار کریندی اے۔چیئرمین سینیٹ آکھیا جو مضبوط، جدید تے باصلاحیت پولیس فورس ہی امن، انصاف تے قانون دی مؤثر عملداری دی ضمانت اے، یومِ شہدائے پولیس اساں کوں وطن دے محافظاں دیاں عظیم قربانیاں کوں یاد رکھݨ تے انھاں دیاں خدمات کوں خراجِ تحسین پیش کرݨ دا درس ݙیندے۔ انھاں آکھیا جو قوم اپݨے شہداء دیاں قربانیاں کوں کݙاہیں وی نہ بُھلیسی تے انھاں دے مشن دی تکمیل کیتے ھک مُٹھ رہسی۔