وزیراعلیٰ پنجاب دا یومِ شہدائے پولیس دے موقع تے پیغام

لاہور۔ 4 اگست (اے پی پی) وزیراعلیٰ پنجاب مریم نواز یومِ شہدائے پولیس تے ملک و قوم کیتے جاناں دا نذرانہ پیش کرݨ آلے پولیس شہداء کوں خراجِ عقیدت پیش کیتا۔ انھاں پولیس شہداء دے اہلِ خانہ دے صبر تے حوصلے کوں سلام پیش کیتا۔ یومِ شہدائے پولیس دے موقع تے وزیراعلیٰ اپݨے پیغام اچ آکھیا جو دہشت گردی، انتہاپسندی تے جرائم دے خلاف جدوجہد اچ پنجاب پولیس دیاں قربانیاں ناقابلِ فراموش ہن۔ پنجاب پولیس دے ہر افسر تے جوان قیامِ امن کیتے غیر متزلزل عزم دا مظاہرہ کیتا۔ عوام دے جان و مال دے تحفظ تے قیامِ امن کیتے پولیس کلیدی کردار ادا کریندی پئی اے۔ پنجاب حکومت پولیس شہداء دے ورثاء دی فلاح و بہبود تے ݙیکھ بھال دیاں ذمہ واریاں بطریقِ احسن ادا کریندی پئی اے۔وزیراعلیٰ آکھیا جو شہداء دے ٻالاں دی صحت، معیاری تعلیم، رہائش سودھے ٻئی ساریاں سہولتاں ݙیوݨ حکومت دی ذمہ واری اے۔ سیف سٹی پراجیکٹ دے نال نال پولیس شہداء دیاں قربانیاں پاروں لاہور دنیا دے محفوظ شہراں اچ شامل تھی چکیے۔ وزیراعلیٰ آکھیا جو پنجاب پولیس دیاں کوششاں توں کرائم اینڈ سیفٹی انڈیکس اچ لاہور کئی ترقی یافتہ شہراں کوں پِچھوں چھوڑ ݙتے۔ پنجاب پولیس کوں بہترین اسلحہ، جدید ترین حفاظتی تے مواصلاتی آلات، بلٹ پروف گاݙیاں تے ٻئی ضرورتاں ݙتیاں ویندیاں پئن