مولانا جلال الدین رومیؒ دی تعلیمات اڄ وی انسانیت کوں محبت، رواداری، خدمتِ خلق تے باطنی اصلاح دا پیغام ݙیندئن، وفاقی وزیر سید عمران احمد شاہ دا ترک فیسٹیول دے موقع تے مباحثے نال خطاب

شکاگو۔ 4 اگست (اے پی پی) وفاقی وزیر تخفیفِ غربت و سماجی تحفظ سید عمران احمد شاہ آکھیا جو حضرت مولانا جلال الدین رومیؒ دی تعلیمات اڄ وی انسانیت کوں محبت، رواداری، خدمتِ خلق تے باطنی اصلاح دا ایجھا پیغام ݙیندیان جو عصرِ حاضر دے اخلاقی تے سماجی چیلنجز نال نبڑݨ اچ موثر رہنمائی ݙیندے۔وزارت دی ترجمان موجب وفاقی وزیر اے ڳالھ شکاگو اچ منعقد تھیوݨ آلے ترک فیسٹیول تے منعقدہ پینل مباحثے ”مولانا رومیؒ: تصوف تے پاکستان دا روحانی ورثہ“ نال بطورِ کلیدی مقرر خطاب کریندیں آکھی۔ مولانا رومیؒ دی فکر تے مسلم دنیا تے انھاں دے اثرات دے حوالے نال منعقدہ ایں نشست اچ ممتاز علماء، دانشوراں، مذہبی راہنماواں تے پاکستانی و ترک برادری دے لوکاں شرکت کیتی۔ٻئے ممتاز اہل علم دے رلے خطاب کریندیں وفاقی وزیر آکھیا جو مولانا رومیؒ دا پیغام زمان و مکان دیاں حداں توں ماوراء اے تے انسان کوں محبت، عاجزی، برداشت تے خود احتسابی دے ذریعے ہک پرامن تے باوقار معاشرے دی تشکیل دی دعوت ݙیندے۔ انھاں آکھیا جو پاکستان دا روحانی تشخص وی ایں صوفی روایت نال ڳنڈھیا ہویا اے جیں کوں حضرت داتا گنج بخش علی ہجویریؒ، حضرت بابا فرید الدین گنج شکرؒ، حضرت شاہ عبداللطیف بھٹائیؒ، حضرت لعل شہباز قلندرؒ، حضرت سلطان باہوؒ تے ٻئے اولیائے کرام ودھارا ݙتا۔ انھاں بزرگاں دی تعلیمات وی مولانا رومیؒ وانڳوں محبت، خدمتِ انسانیت، رواداری تے اللہ تعالیٰ دی یاد تے مبنی ہن۔وفاقی وزیر آکھیا جوعلامہ محمد اقبالؒ مولانا رومیؒ کوں اپݨا روحانی مرشد منیندے ہن جݙاں جو مولانا رومیؒ دی تعلیمات اڄ وی پاکستان تے ترکیہ وچال روحانی، فکری تے ثقافتی تعلقات کوں تکڑا بݨاوݨ اچ اہم کردار ادا کریندیاں پئن۔ انھاں آکھیا جو خدمتِ خلق ہی حقیقی روحانیت دا عملی اظہاراے۔ معاشرے دے کمزور تے محروم طبقےدی مدد، تریمتاں کوں بااختیار بݨاوݨ، ٻالاں دی تعلیم، معذور لوکاں دی معاونت تے ضرورت منداں دی دستگیری اسلامی تعلیمات دا بنیادی تقاضا اے۔ انھاں ایں ڳالھ تے زور ݙتا جو معاشی ترقی تے جدید ٹیکنالوجی دے ودھارے دے نال نال اخلاقی اقدار، انسانی ہمدردی تے سماجی انصاف کوں وی ھکو سویں اہمیت ݙتی ونڄݨی چاہیدی اے۔وفاقی وزیر نوجواناں تے زور ݙتا جو او مولانا رومیؒ دی تعلیمات توں رہنمائی حاصل کریندیں علم دے نال عاجزی، کامیابی دے نال کردار تے ذاتی ترقی دے نال خدمتِ خلق کوں اپݨی زندگی دا حصہ بݨاون۔ ترک فیسٹیول دے موقع تے وفاقی وزیر سید عمران احمد شاہ مختلف علماء، دانشوراں، کمیونٹی راہنماواں تے پاکستانی و ترک برادری دے نمائندیں نال وی ملاقاتاں کیتیاں جئیں اچ پاکستان تے ترکیہ وچال سانجھے روحانی و ثقافتی ورثے، بین الثقافتی رابطے دے ودھارے تے سانجھے تعاون دے مختلف پہلواں تے ڳالھ مہاڑ کیتی