جنوبی ایشیا اچ پائیدار تے منصفانہ امن دا قیام جھیڑا جموں و کشمیر دے پرامن حل نال جڑیا ہویا اے، صدرِ مملکت آصف علی زرداری دا یومِ استحصالِ کشمیر تے پیغام

اسلام آباد۔ 4 اگست (اے پی پی) صدرِ مملکت آصف علی زرداری آکھیا جو جنوبی ایشیا اچ پائیدار تے منصفانہ امن دا قیام جھیڑا جموں و کشمیر دے پرامن حل نال جڑیا ہویا اے ، اڄ اساں یومِ استحصالِ کشمیر تے بھارتی غیر قانونی مقبوضہ جموں و کشمیر دے عوام دے نال اپݨی غیر متزلزل یکجہتی دا اعادہ کریندوں، اساں انھاں دی بہادری، ثابت قدمی تے ناقابلِ تنسیخ حقِ خود ارادیت حاصل کرݨ کیتے انھاں دی منصفانہ جدوجہد کوں خراجِ تحسین پیش کریندوں۔ایوانِ صدر دے پریس ونگ موجب صدرِمملکت اے ڳالھ یومِ استحصالِ کشمیر تے اپݨے پیغام اچ آکھی۔ انھاں آکھیا جو اڄ بھارت دے 5 اگست 2019ء دے انھاں غیر قانونی تے یکطرفہ اقدامات کوں سَت سال مکمل تھی چکئن جیں دے ذریعے ایں بین الاقوامی قانون تے اقوامِ متحدہ دی سلامتی کونسل دیاں متعلقہ قرارداداں دی خلاف ورزی کریندیں جموں و کشمیر دی بین الاقوامی طور تے منی ڳئی متنازعہ حیثیت کوں تبدیل کرݨ دی کوشش کیتی۔ صدرِ مملکت آکھیا جو اے اقدامات نہ تاں ایں جھیڑے دی قانونی حیثیت کوں تبدیل کرسڳدن تے نہ ہی کشمیری عوام دے عزم کوں متزلزل کر سڳدن۔ انھاں آکھیا جو گزریل سَت سالاں توں لکھاں کشمیری زور دیاں پابندیاں دے نال زندگی گزریندے پئن جیں انھاں دی روزمرہ زندگی دے ہر پہلو کوں متاثر کیتے۔صدرِ مملکت آکھیا جو خاندان غیر یقینی صورتحال دا شکار ہن، نوجواناں کیتے موقع محدود ہن تے معاشرے کوں ہک لمبے جھیڑے تے عدم استحکام دا سامݨا اے، انھاں ساری اوکھ دے باوجود جموں و کشمیر دے عوام انصاف حاصل کرݨ تے اپݨے مستقبل دا فیصلہ خود کرݨ دے جائز حق کیتے ثابت قدم ہن۔ انھاں آکھیا جو پاکستان بھارتی غیر قانونی مقبوضہ جموں و کشمیر دے عوام دی اخلاقی، سیاسی تے سفارتی حمایت جاری رکھیسی، اساں ہر بین الاقوامی فورم تے اپݨی آواز چیندے رہسوں جݙݨ تئیں جموں و کشمیر دا جھیڑا اقوامِ متحدہ دی سلامتی کونسل دیاں متعلقہ قرارداداں تے کشمیری عوام دیاں اُمنگاں موجب حل نی تھی ویندا۔انھاں آکھیا جو جنوبی ایشیا اچ پائیدارتے منصفانہ امن دا قیام جموں و کشمیر دے جھیڑے دے پرامن حل نال جڑیا ہویا اے۔ صدر آصف علی زرداری بین الاقوامی برادری بالخصوص اقوامِ متحدہ تے زور ݙتا جو او بھارتی غیر قانونی مقبوضہ جموں و کشمیر اچ انسانی حقوق دی سنگین صورتحال دا نوٹس گھنے تے ایں جھیڑے دے منصفانہ حل کیتے اپݨا مؤثر کردار ادا کرے۔ انھاں آکھیا جو اپݨے کشمیری بھراواں تے بھیݨاں کیتے میݙا پیغام اے جو پاکستان تہاݙے نال تکڑا تھی تے کھڑے، اوکھ دے باوجود تہاݙی ثابت قدمی تے حوصلہ اساݙے کیتے باعثِ تحریک اے، تساں کھے کائنی ، پاکستان دے عوام تہاݙے جائز حقِ خود ارادیت حاصل کرݨ تئیں تہاݙے رلے رہسن۔ صدرِ مملکت دعا کیتی جو اللہ تعالیٰ جموں و کشمیر دے عوام کوں قوت، صبر تے استقامت عطا فرماوے تے انھاں کوں انصاف تے امن دی نعمت نال سرفراز فرماوے۔