5 اگست 2019ء دا ݙینہہ کشمیریاں دی سنڄاݨ، حقوق تے خصوصی حیثیت تے حملہ ہئی جئیں کوں پاکستان کݙاہیں تسلیم نہ کریسی، مریم نواز شریف

لاہور۔ 5 اگست (اے پی پی) وزیراعلیٰ پنجاب مریم نواز شریف بھارت دے غیر قانونی زیرِ تسلط جموں تے کشمیر دی عوام دے نال غیر متزلزل یکجہتی دا اظہار کریندیں ہوئیں آکھیا جو 5 اگست 2019ء دا ݙینہہ کشمیریاں دی سنڄاݨ، حقوق تے خصوصی حیثیت تے حملہ ہئی جئیں کوں پاکستان کݙاہیں تسلیم نہ کریسی، کشمیری عوام دی سیاسی، سفارتی تے اخلاقی حمایت جاری رکھیسوں۔ یومِ استحصالِ کشمیر دے موقع تے آپݨے سنیھے اچ وزیراعلیٰ آزادی دی جدوجہد اچ قربانیاں ݙیوݨ آلے شہداء دے خانداناں دے صبر و استقامت کوں خراجِ تحسین پیش کریندیں ہوئیں آکھیا جو حقِ خودارادیت دی طویل جدوجہد اچ پاکستانی عوام آپݨے کشمیری بھراواں تے بھیݨیں دے نال کھڑن اتے ہمیشہ رہسن۔ انھاں اقوامِ متحدہ سمیت انسانی حقوق دی تمام بین الاقوامی تنظیماں توں اپیل کیتی جو او بھارت دے غیر قانونی زیرِ تسلط جموں و کشمیر اچ انسانی حقوق دیاں سنگین خلاف ورزیاں دا فوری نوٹس گھنن تے کشمیری عوام کوں انھاں دا بنیادی حقِ خودارادیت ݙواوݨ کیتے آپݨا کردار ادا کرن۔