5 اگست 2019ء کوں بھارت آپݨے آئین دے آرٹیکل 370 تے 35 اے کوں منسوخ کر تے جموں تے کشمیر دی خصوصی آئینی حیثیت کوں غیر قانونی طور تے ختم کیتا۔ سردار ایاز صادق

اسلام آباد۔ 5 اگست (اے پی پی) سپیکر قومی اسمبلی سردار ایاز صادق آکھیا جو 5 اگست 2019ء کوں بھارتی آئین توں آرٹیکل 370 تے 35-اے دی غیر قانونی منسوخی دے ذریعے مقبوضہ جموں تے کشمیر دی خصوصی حیثیت ختم کرݨ دے نال نال کشمیری عوام دے بنیادی حقوق تے شناخت کوں پامال کیتا ڳیا۔ اے گالھ انھاں یومِ استحصالِ کشمیر دے موقع تے جاری سنیھے اچ آکھی۔ انھاں کشمیری عوام دے حقِ خودارادیت حاصل کرݨ کیتے پاکستان دے پختہ عزم دا اعادہ کریندیں ہوئیں آکھیا جو ہر علاقائی تے عالمی پلیٹ فارم تے مقبوضہ جموں تے کشمیر دے عوام دی منصفانہ جدوجہد دی حمایت تے انھاں دے حقِ خودارادیت کیتے آواز بلند کریندے رہسوں۔ سردار ایاز صادق آکھیا جو کشمیری عوام  آپݨے بنیادی حقِ خودارادیت، آزادی تے شناخت دے تحفظ کیتے بے مثال قربانیاں ݙتن جئیں کوں پوری پاکستانی قوم قدر تے احترام دی نگاہ نال ݙیکھدی اے۔ انھاں دا آکھݨ ہئی جو موجودہ نازک عالمی حالات ایں گالھ دا تقاضا کریندن جو پاکستانی قوم آپݨی صفاں اچ اتحاد تے یکجہتی کوں پہلے توں ودھ مضبوط بݨاوے۔سپیکر آکھیا جو مسئلہِ جموں تے کشمیر دا منصفانہ حل جنوبی ایشیا اچ پائیدار امن، سلامتی تے استحکام کیتے ناگزیر اے۔ انھاں مسئلہِ کشمیر کوں اقوامِ متحدہ دی سلامتی کونسل دیاں متعلقہ قرارداداں تے کشمیری عوام دی امنگاں دے مطابق حل کرݨ دی ضرورت تے زور ݙتا۔ایں موقع تے، ڈپٹی سپیکر قومی اسمبلی سید غلام مصطفیٰ شاہ آکھیا جو جموں تے کشمیر دا تنازعہ اج وی اقوامِ متحدہ دے ایجنڈے تے موجود دیرینہ تے حل طلب مسئلہ اے۔ انھاں آکھیا جو آرٹیکل 370 تے 35 اے دی بھارتی آئین توں غیر قانونی منسوخی فاشسٹ تے انتہائی قابلِ مذمت اقدام اے۔  انھاں آکھیا جو پاکستان دی پارلیمان کشمیری عوام دے نال آپݨی غیر متزلزل یکجہتی دا اعادہ کریندی اے اتے انھاں دے حقِ خودارادیت حاصل تھیوݨ تئیں حمایت جاری رکھیسی۔