وفاقی وزیر اورنگزیب خان کھچی نال سپین دے سفیر کارلوس آراگون گل دے لا سرنا دی خیرسگالی ملاقات

اسلام آباد۔ 5 اگست (اے پی پی) وفاقی وزیرقومی ورثہ و ثقافت اورنگزیب خان کھچی نال پاکستان اچ سپین دے سفیر کارلوس آراگون گل دے لا سرنا وزارت اچ خیرسگالی ملاقات کیتی۔ملاقات اچ ثقافت، ورثے دے تحفظ، آثارِ قدیمہ، عجائب گھراں، ادب، تعلیم تے ثقافتی سفارت کاری دے شعبیں اچ پاکستان تے سپین وچال ݙوطرفہ تعاون کوں مزید ودھاوݨ دے مختلف پہلواں تے تفصیلی ڳالھ مہاڑ کیتی ڳئی ۔ملاقات اچ ݙوہیں ملکاں وچال پراݨے دوستانہ تعلقات کوں ثقافتی رابطے تے ادارہ جاتی تعاون دے ذریعے مزید مستحکم بݨاوݨ دے سانجھے عزم دا اظہار کیتا ڳئے۔وفاقی وزیراورنگزیب خان کھچی سپین دے سفیر دا خیرمقدم کریندیں آکھیا جو پاکستان سپین دے نال اپݨے تاریخی تے ثقافتی تعلقات اہمیت ݙیندے تے ورثے دے تحفظ، آثارِ قدیمہ دی تحقیق، عجائب گھراں دی ترقی، ادبی تبادلیں، ثقافتی میلے تے تعلیمی شراکت داری دے شعبیں اچ تعاون کوں مزید وسعت ݙیوݨ چاہندے۔ وفاقی وزیر بارسلونا دے اپݨے دورے کوں یاد کریندیں ایں کوں ہک یادگار تجربہ قرار ݙتا تے سپین دے شاندار ثقافتی ورثے، مہمان نوازی تے منفرد طرزِ تعمیر دی تعریف کیتی۔ انھاں آکھیا جو سپین اچ پاکستانیاں دی ہک وݙی تعداد کاروبار، ملازمت تے ٻئے شعبیں اچ نمایاں خدمات انجام ݙیندی پئی اے جو ݙوہیں ملکاں دے تعلقات کوں مزید تکڑا بݨاوݨ اچ اہم کردار ادا کریندی پئی اے۔ انھاں ہسپانوی کھاݨیں کوں وی پسند نال یاد کیتا۔اورنگزیب خان کھچی 25 اپریل 2007ء کوں میڈرڈ اچ پاکستان تے سپین وچال طے پاوݨ آلی ثقافتی، تعلیمی تے سائنسی تعاون دی مفاہمتی یادداشت (ایم او یو) دا حوالہ ݙیندیں آکھیا جو ایں دے تحت ادارہ جاتی رابطے، طلبہ و ماہرین دے تبادلے، تعلیمی تعاون، معلومات دے تبادلے، سنداں دی سانجھی تسلیم شدگی تے ثقافتی سرگرمیاں دے ودھارے کیتے مشترکہ اقدامات دی تکڑی بنیاد موجود اے۔ انھاں آکھیا جوعلامہ محمد اقبال دی شاعری تے فلسفہ سپین اچ خصوصی اہمیت رکھیندن۔ انھاں “مسجدِ قرطبہ” تے “The Reconstruction of Religious Thought in Islam” سودھے اقبال دیاں تصانیف دے ہسپانوی تراجم دا ذکر کریندیں تجویز ݙتی جو ݙوہیں ملکاں دیاں جامعات، کتب خانیں تے ثقافتی اداریں وچال اقبالیات، ادبی تبادلیں تے تراجم دے شعبیں اچ تعاون کوں مزید ودھارا ݙتا ونڄے۔انھاں قومی ورثہ و ثقافت ڈویژن تے سپین دی وزارتِ ثقافت وچال ثقافت تے ورثے دے شعبے اچ ہک نویں مفاہمتی یادداشت تے مذاکرات دی وی تجویز ݙتی جیں اچ مشترکہ آثارِ قدیمہ دی تحقیق، تحفظ دے منصوبے، عجائب گھراں دے تبادلے، پاکستانی ماہرین دی خصوصی تربیت، ثقافتی میلے، فنونِ لطیفہ دیاں نمائشاں، ادبی تراجم تے تعلیمی تعاون کوں شامل کیتا ونڄ سڳدے۔وفاقی وزیر ثقافتی سفارت کاری کوں مزید موثر بݨاوݨ کیتے تشہیری مواد، ثقافتی نمائشاں، آثارِ قدیمہ دیاں نمائشاں تے علمی وفد دے باقاعدہ تبادلیں دی اہمیت تے وی زور ݙتا۔ انھاں سپین دے سفیر کوں وزارتِ قومی ورثہ و ثقافت دے سالانہ ثقافتی میلے “لوک میلہ” اچ شرکت دی دعوت ݙیندیں آکھیا جو گزریل سال ایں میلے اچ تقریباً 40 لکھ لوکاں شرکت کیتی ہئی۔ انھاں سپین کوں دعوت ݙتی جو او اپݨے روایتی کھاݨیں، موسیقی، رقص، دستکاری تے ٻئے ثقافتی رنگ ایں میلے اچ پیش کرے تاں جو ݙوہیں ملکاں دے عوام ہک ٻئے دی ثقافت نال مزید نیڑے آسڳن۔