وفاقی وزیر بحری امور محمد جنید انور چوہدری دا مشترکہ “ٹرانس شپمنٹ ترغیبی پیکیج” دا اعلان

اسلام آباد۔ 5 اگست (اے پی پی) وفاقی وزیربحری امور محمد جنید انور چوہدری ہک مشترکہ “ٹرانس شپمنٹ ترغیبی پیکیج” دا اعلان کیتے جیں دے تحت کراچی پورٹ تے پورٹ قاسم تے کارگو ہینڈلنگ دے خرچے گھٹ کرݨ تے علاقائی شپنگ ٹریفک کوں راغب کرݨ کیتے وݙیاں مراعات ݙتیاں ڳئن۔وزارت توں جاری پریس ریلیز موجب کراچی پورٹ ٹرسٹ (کے پی ٹی)، پورٹ قاسم اتھارٹی (پی کیو اے) تے انھاں دے کنٹینر ٹرمینل آپریٹرز دی طرفوں مشترکہ طور تے متعارف کرائے ڳئے ایں پیکیج اچ کنٹینرائزڈ، بلک تے بریک بلک ٹرانس شپمنٹ کارگو کیتے “ویٹ چارجز” (بحری جہازاں متعلق اخراجات)، وارفج، سٹوریج فیس تے ٹرمینل ہینڈلنگ چارجز اچ کمی شامل اے۔ایں فریم ورک دی تفصیل ݙسیندیں جنید انوار چوہدری آکھیا جو اے ترغیبی نظام ٹرانس شپمنٹ کارگو (کنٹینرائزڈ تے بلک/بریک بلک کارگو) گھن ونڄݨ آلے جہازاں کیتے “پورٹ ویٹ چارجز” تے سلیب (درجہ بندی) دی بنیاد تے رعایت متعارف کرویندے۔ 5 توں 10 فیصد ٹرانس شپمنٹ کارگو آلے جہازاں کوں 20 فیصد رعایت ملسی، 11 توں 25 فیصد کارگو تے اے رعایت ودھ تے 30 فیصد، 26 توں 50 فیصد تے 50 فیصد، 50 توں 90 فیصد کارگو آلے جہازاں (کنٹینر جہازاں کیتے گھٹ توں گھٹ 2,000 ٹی ای یوز) کیتے 70 فیصد، تے 90 توں 100 فیصد کارگو آلے جہازاں (کنٹینر جہازاں کیتے گھٹ توں گھٹ 3,500 ٹی ای یوز) کیتے 80 فیصد رعایت ݙتی ویسے۔ایں توں انڄ کے پی ٹی وارفج دے خرچے اچ 20 فیصد توں 80 فیصد تئیں رعایت ݙیسی (جیں اچ 70 فیصد رعایت کیتے کنٹینر بردار جہازاں کیتے گھٹ توں گھٹ 2,000 ٹی ای یوز تے 80 فیصد رعایت کیتے گھٹ توں گھٹ 3,500 ٹی ای یوز دی شرط ہوسی)۔ ایں دے علاوہ ٹرمینلز تے 14 ݙینھ تے ایجنٹ دی ذمہ واری دے تحت کے پی ٹی دے ٹی پی ایکس کارگو ایریا اچ 30 ݙینھ تئیں مفت سٹوریج دی سہولت وی ݙتی ویسے۔ پی کیو اے وارفج اچ 100 فیصد رعایت دے نال نال ٹرمینلز تے 7 ݙینھ دی مفت سٹوریج دی سہولت ݙیسی جیں کوں ایجنٹ دی ذمہ واری دے تحت کارگو دی نقل و حمل کیتے 21 ݙینھ تئیں ودھایا ونڄ سڳدے۔بندرگاہ دی طرفوں ݙتیاں ونڄݨ آلیاں انھاں مراعات دے نال نال پاکستان دے چار وݙے کنٹینر ٹرمینلز وی ٹرانس شپمنٹ کنٹینرز کیتے “ٹرمینل ہینڈلنگ چارجز” (ٹی ایچ سی) اچ نمایاں کمی دا اعلان کیتے۔ کراچی انٹرنیشنل کنٹینر ٹرمینل (کے آئی سی ٹی)، ساؤتھ ایشیا پاکستان ٹرمینلز (ایس اے پی ٹی ایل)، کراچی پورٹ ٹرسٹ دا کراچی گیٹ وے ٹرمینل لمیٹڈ (کے جی ٹی ایل) تے پورٹ قاسم اتھارٹی دا قاسم انٹرنیشنل کنٹینر ٹرمینل (کیو آئی سی ٹی) ٹرانس شپمنٹ کارگو مینیفسٹ (منصوبہ بند فہرست) دے 5 توں 10 فیصد حصے تے 10 فیصد، 11 توں 25 فیصد حصے تے 20 فیصد تے 25 فیصد توں ودھ حصے تے 25 فیصد تئیں ٹرمینل ہینڈلنگ چارجز اچ رعایت پیش کریسن۔ اے مراعات 20 فٹ تے 40 فٹ، ݙوہیں طرح دے کنٹینرز تے لاگو ہوسن تے شپنگ لائنز کیتے ہینڈلنگ دی مجموعی لاڳت اچ نمایاں کمی گھن آسن۔وزیر آکھیا جو اے نواں فریم ورک ٹرانس شپمنٹ رعایت متعلق سارے سابقہ نوٹیفکیشنز تے ایس آر اوز دی جاہ ہک ایہوجیھے واحد، شفاف تے کارکردگی تے مبنی نظام دا نفاذ کریسی جو کراچی پورٹ تے پورٹ قاسم، ݙوہیں تے لاگو ہوسی۔ کے پی ٹی دے چیئرمین ریئر ایڈمرل (ریٹائرڈ) شاہد احمد آکھیا جو ایں پیکج نال ٹرانس شپمنٹ دے خرچے اچ کمی، اضافی مین لائن شپنگ سروسز دی آمد، جہازاں دے ٹرن اراؤنڈ ٹائم (آونڄ دے دورانیے) اچ بہتری تے پاکستانی بندرگاہواں دے ذریعے علاقائی کارگو دے حجم اچ ودھارے دی توقع اے