سرکاری ڈیٹا دے موثر نظام، تحفظ، تبادلے تے ذمہ دارانہ استعمال کیتے ہک جامع قومی فریم ورک دا ہووݨا ٻہوں ضروری اے، شزا فاطمہ خواجہ

اسلام آباد۔ 5 اگست (اے پی پی) وفاقی وزیرانفارمیشن ٹیکنالوجی و ٹیلی کمیونیکیشن شزا فاطمہ خواجہ ڈرافٹ نیشنل ڈیٹا گورننس پالیسی کوں پاکستان دی ڈیجیٹل تبدیلی اچ ہک اہم پیش رفت قرار ݙیندیں ایں ڳالھ تے زور ݙتا جو سرکاری ڈیٹا دے موثر نظام، تحفظ، تبادلے تے ذمہ دارانہ استعمال کیتے ہک جامع قومی فریم ورک دا ہووݨ ٻہوں ضروری اے۔ وزارتِ آئی ٹی و ٹیلی کام توں جاری بیان موجب وفاقی وزیرانفارمیشن ٹیکنالوجی و ٹیلی کمیونیکیشن شزا فاطمہ خواجہ دی زیرِ صدارت “ڈرافٹ نیشنل ڈیٹا گورننس پالیسی 2026” تے ہک اعلیٰ سطحی مشاورت دا انعقاد کیتا ڳئے جیں دا اہتمام وزارتِ انفارمیشن ٹیکنالوجی و ٹیلی کمیونیکیشن پاکستان ڈیجیٹل اتھارٹی دے تعاون نال اسلام آباد اچ کیتا۔ اجلاس اچ وفاقی وزارتاں، صوبائی حکومتاں، پبلک سیکٹر دیاں تنظیماں تے ٻئے سارے متعلقہ سٹیک ہولڈرز دے سینئر نمائندیں شرکت کیتی۔مشاورتی اجلاس نال خطاب کریندیں وفاقی وزیر شزا فاطمہ خواجہ ڈرافٹ نیشنل ڈیٹا گورننس پالیسی کوں پاکستان دی ڈیجیٹل تبدیلی اچ ہک اہم پیش رفت قرار ݙتا۔ انھاں ایں ڳالھ تے زور ݙتا جو حکومت ڈیٹا دی ساریں توں وݙی امین اے، ایں کیتے سرکاری ڈیٹا دے موثر نظام، تحفظ، تبادلے تے ذمہ دارانہ استعمال کیتے ہک جامع قومی فریم ورک دا ہووݨ ٻہوں ضروری اے۔ انھاں مزید آکھیا جو پالیسی کوں عملی، قابلِ عمل تے قومی ڈیجیٹل ترجیحات دے عین موجب بݨاوݨ کیتے سارے سرکاری اداریں دیاں تجویزاں تے آراء کلیدی حیثیت رکھیندن۔چیئرمین پاکستان ڈیجیٹل اتھارٹی، ڈاکٹر سہیل منیر پاکستان دے نیشنل ڈیجیٹل ماسٹر پلان، شعبہ جات دی ڈیجیٹل تبدیلی دے منصوبیں تے ڈیجیٹل پبلک انفراسٹرکچر دی معاونت اچ ایں پالیسی دی حکمتِ عملی تے اہمیت کوں اجاگر کیتا۔ ڈاکٹر سہیل منیر آکھیا جو اے پالیسی بلا تفریق ڈیٹا شیئرنگ یا سارے سرکاری ڈیٹا کوں کہیں ہک جاہ جمع کرݨ دی تجویز نی ݙیندی۔ ڈیٹا دی حفاظت تے صدارت متعلقہ اداریں ہی کنے رہسی جݙاں جو “وصل” فریم ورک ڈیٹا دی مناسب درجہ بندی دے نال محفوظ تبادلے تے سانجھے رابطے کوں ممکن بݨیسی۔ایں مشاورت اچ وفاقی و صوبائی حکومتاں تے اہم پبلک سیکٹر اداریں دے نمائندیں ڈیٹا گورننس، سانجھے رابطے، قانونی ہم آہنگی، ڈیٹا دی درجہ بندی تے ایں دے نفاذ متعلق اپݨی اہم سفارشات پیش کیتیاں۔ پاکستان ڈیجیٹل اتھارٹی سٹیک ہولڈرز دیاں سفارشات دا جائزہ گھن تے ڈرافٹ نیشنل ڈیٹا گورننس پالیسی کوں مزید حتمی شکل ݙیسی جیں اچ مرحلہ وار نفاذ دی حکمتِ عملی، صلاحیتاں اچ ودھارا تے انتظامی امور شامل ہوسن تاں جو ہک جامع تے مستقبل دیاں ضرورتاں موجب قومی ڈیٹا گورننس فریم ورک قائم کیتا ونڄ سڳے